Matie 27

À bɔò Jesu wajui Pilati

(Cɔ Maaku 15:1; Luku 23:1-2; Zãa 18:28-32)

1Ŋɔi daadaakɔ inɛ ngboi woo weei Ilaaɔ̃ ŋa do inɛ ngboi Zuifu ŋa fei à jilɔɔ si aŋa a kpa Jesu. 2Nɔ à dũu à koo à daa Pilati ilu ilɛu si awɔ.

Ikui Zudasi

(Cɔ Woo bɛ ŋa 1:18-19)

3Zudasi, nŋu iyi í zamba Jesuu, í yɛ bɛi à yɛ taaleɛ a kpaa, ŋɔi inɔɛ í fɔ. Nɔ í nyiò fiai isɔ fũfũ kuntaau bi inɛ ngboi woo weei Ilaaɔ̃ ŋa do inɛ ngboi Zuifu ŋau. 4Í sɔ̃ ŋa í ni, ǹ ce dulum si bɛi ǹ zamba inɛ dee deeu ihɛ̃ a kpaa. Amma à jɛaa à ni, yoomai í yɛ wa. Í jɛ idei iriɛ. 5Ŋɔi Zudasi í nyɔ fiau si kpasɛ̃i Ilaaɔ̃ bɛ í nɛɛ. Nɔ í koo í dasi kɔ̃ɔɛ ikũ lele í kpa araɛ.

6Inɛ ngboi woo weei Ilaaɔ̃ ŋau à so fiau à ni, bɛirei aa ka ceò fiau ihɛ̃. A kù nɛ kpãa ka dasi kpakoi kpasɛ̃i Ilaaɔ̃ si na iyi í jɔ̀ fia iyi à sã na a nikãò njɛi inɛ gɔi. 7Iyi à busi njɛ à tã, nɔ à so fiau à raò ikoi woo ma caka gɔ, à ce bi ku si isɛ mmu ŋa. 8Na ŋɔi í jɔ̀ à ya kpe ikou ikoi njɛ baa nnyi. 9Bɛɛbɛi idei Zeremii waliiu í ce si bɛi í ni, à so fiai isɔ fũfũ kuntaau, fia iyi inɛi Izirɛli ŋa à jɛsi aŋa a sã na iriɛu, 10nɔ à raò ikoi woo ma cakau, si bɛi Aɔ̃ Lafɛ̃ɛ í dasim.#27:10 Cɔ Zeremi 32:6-9; Zakari 11:12-13.

Pilati wa bee Jesu ide ŋa

(Cɔ Maaku 15:2-5; Luku 23:3-5; Zãa 18:33-38)

11Ŋɔi à koo à leekĩ Jesu si wajui Pilati ilu ilɛu, nɔ í beeɛ í ni, awɔi ì jɛ ilaalui Zuifu ŋa? Nɔ Jesu í jɛaa í ni, awɔi ì fɔɔ. 12Si anyii nŋu, inɛ ngboi woo weei Ilaaɔ̃ ŋa do inɛ ngboi Zuifu ŋau à waa máa ide, nɔ kù ni nŋa ide kãma. 13Ŋɔi Pilati í beeɛ í ni, i kù waa gbɔ ide ŋa iyi inɛ ŋa à fɔ à waa yɛò taaleɛ ba. 14Amma Jesu kù jɛaa baa gbakã hee biti í muu.

À yɛ taalei Jesu a ba a kpaa

(Cɔ Maaku 15:6-15; Luku 23:13-25; Zãa 18:39-19:16)

15Wee si jingaui Iku ku kua fei ilu ilɛu í ya jɔ̀ inɛi piisɔ̃ɔ akã iyi zamaa í bii. 16Waati bɛɛbɛ inɛ gɔ í wa ile piisɔ̃ɔ bɛ, à ya kpoo Barabasi, nɔ inɛ fei í màa. 17Ŋɔi í jɔ̀ iyi zamaau í tɔtɔɔ, Pilati í bee ŋa í ni, yooi ì bi n jɔ̀ nŋɛ, Barabasi de, mà Jesu iyi à ya kpe Kirisiu. 18Í fɔ bɛɛbɛi si na iyi í jɔ̀ wa mà sãa sãa iyi na igui í jɔ̀ à daa nŋu Jesu si awɔ.

19Waati iyi Pilati wa buba bi ku ce kiitiu, ŋɔi aboɛ í bɛ siɛ inɛ gɔ wa í ni, maà dasi idei inɛ dee deeu bɛ baa, domi idũ, iyi ǹ wa n sũ, ǹ yɛ wahala jiida jiida si ala na iriɛ.

20Amma inɛ ngboi woo weei Ilaaɔ̃ ŋa do inɛ ngboi Zuifu ŋau à wasi ku mante zamaau à waa ni a sɔ̃ Pilati ku nyaa aŋa Barabasi nɔ ku jɔ̀ a kpa Jesu. 21Nɔ Pilati í bee ŋa í ni, si amanɛ minji ŋau bɛ, yoo nŋai ì bi n jɔ̀ nŋɛ. Nɔ à ni, Barabasi. 22Nɔ Pilati í ni, to, bɛirei an cea Jesu iyi à ya kpe Kirisiu. Ŋɔi aŋa fei à ni, kpakpaɛ si jĩi ku gaau. 23Ŋɔi Pilati í bee ŋa í ni, laalɔ yoomai í bɛi í ce. Amma bɛi Pilati wa fɔ fei, bɛɛbɛ mɔi inɛ ŋau à ya dɔ̃ anu hee lele a maa ni, kpakpaɛ si jĩi ku gaau. 24Iyi Pilati í yɛ mii iyi nŋu wa ce fei ngbɛi, nɔ wakatau wa kɔ̃ɔsi mɔm nii, ŋɔi í bu inyi í wɔɔ si wajui zamaau í nyisi iyi baai nŋu kù wa si ideu, í ni, njɛi mɔkɔ dee deeu ihɛ̃ kunikãɛ kù yɛm, í jɛ idei iri nŋɛ. 25Ŋɔi inɛ ŋau fei à jɛ à ni, kunikãi njɛɛu ku jɛ idei irii awa do ama nwa ŋa. 26Ŋɔi Pilati í jɔ̀ nŋa Barabasi, nɔ í jɔ̀ à tɛa Jesu kpɔtɔɔ. Si anyii nŋu, nɔ í daa sooge ŋa si awɔ a koo a kpakpaɛ si jĩi.

Sooge ŋa à waa yaako Jesu

(Cɔ Maaku 15:16-20; Zãa 19:2-3)

27Si anyii nŋu, ŋɔi sooge ŋau à gbã Jesu à lɔòɛ kabai ilu ilɛu, nɔ à tɔtɔɔ soogeɛ ŋa iyi à gbe ŋau fei bɛ. 28À bɔ jĩnɛ ŋa iyi wa dasi nɔ à daa si ibɔ nkpa sisɔ gɔ. 29Nɔ à ba fulai agũ à lea si iri, nɔ à naa kpokpoo si awɔ njɛɛ, à bɛi à gulɛ si wajuɛ à waa yaakoɛ à waa ni, fɔɔ ilaalui Zuifu ŋa. 30Ŋɔi à tu siɛ antɔ nɔ à gba kpokpoou à cãa si iriɛ. 31Iyi à yaakoɛ à tã, ŋɔi à bɔaa ibɔ nkpau à bɛi à daa si ibɔɛ à gbãa à waa bɔ ku kpakpaɛ si jĩi ku gaau.

À kpakpa Jesu si jĩi ku gaau

(Cɔ Maaku 15:21-32; Luku 23:26-43; Zãa 19:17-27)

32Waati iyi à waa fita hai inɔ iluu, ŋɔi à ko inɛi Sirɛni gɔ à ya kpoo Simɔɔ. Ŋɔi sooge ŋau à tilasiɛ à kãa jĩi ku gaau bii aa kpakpa si Jesuu. 33Nɔ à waa bɔ inya gɔ iyi à ya kpe Gɔɔgɔta, waatɔ inya iyi í jɔ kokoi iri. Waati iyi à to bɛ, 34à na Jesu atɛ̃ vɛ̃ɛ iyi à yɔgɛɛ do alolo. Amma iyi í tiɛɛ kù bi nŋu ku mɔɔ.

35Ŋɔi à kpakpaɛ si jĩi ku gaauu nɔ à ta kpasa si jĩnɛ ŋa iyi wa dasiu à ce ikpɛ̃ɛ. 36Nɔ à buba à waa degbeɛ. 37Si antaii iriɛ do lele, à kɔ ide iyi wa fɔ taale iyi í ce à ni, inɛ ihɛ̃i í jɛ Jesu, ilaalui Zuifu ŋa. 38Ŋɔi à kpakpa ile minji gɔ ŋa bɛ má, inɛ akã ikpa awɔ njɛɛ, inɛ akã mɔ ikpa awɔ cangaɛ.

39Inɛ ŋa iyi à waa too do bɛ à ya maa gbugbã irii a buu 40a maa ni, kù jɛ awɔi ì ni aa lɛgɛ kpasɛ̃i Ilaaɔ̃ nɔ i maa má si afei ajɔ mɛɛta? To, bii awɔ Amai Ilaaɔ̃i, faaba araɛ bɛ bɛi, kita wa hai si antaii jĩi ku gaauu. 41Bɛɛbɛi inɛ ngboi woo weei Ilaaɔ̃ ŋau do woo kɔ inɛ ŋa si wooda ŋau do inɛ ngboi Zuifu ŋau à ya maa yaakoɛ a maa ni, 42í faaba inɛ gɔ ŋa amma í mɔngɔ ku faaba araɛ. Kù jɛ í ni nŋu ilaalui inɛi Izirɛli ŋai? To, ku kita wa hai si antaii jĩi nɔu ku ba ka dasiɛ naanɛ. 43Í dasi Ilaaɔ̃ naanɛ nɔ í ni nŋu Amai Ilaaɔ̃i. Debɛi, bii Ilaaɔ̃ í nɛ kubiɛ ntɔ ntɔi ku faabaɛ. 44Bɛɛbɛ mɔi ile ŋa iyi à kpakpa do Jesu ajɔu à waa yaakoɛ.

Waati iyi Jesu í ku

(Cɔ Maaku 15:33-41; Luku 23:44-49; Zãa 19:28-30)

45Ŋɔi dasã nkpau ilu í kuku si ilɛu fei hee í koo í to isɔ mɛɛtai alɛ. 46Nɔ si isɔ mɛɛtau Jesu í dɔ̃ anu hee lele í ni, Eli, Eli, lema sabatani, waatɔ Ilaaɔ̃ Lafɛ̃ɛm, Ilaaɔ̃ Lafɛ̃ɛm, na mii í ce ì fũsim awɔ.#27:46 Cɔ Iri ku kɔ̃ 22:2. 47Ŋɔi inɛ gɔ ŋa iyi à wa bɛu à gbɔ anu ku dɔ̃u. Nɔ à ni, wa kpe Elii. 48Ŋɔi gbakã inɛ akã nŋa í sɛi í koo í dĩ kanya si golo gɔ í sɔsi inyiikã í bɛi í naa í toa Jesu ku cɔ̃ɔcɔ̃ɔɛ. 49Amma inɛ ŋa iyi à gbe ŋau à ni, jɔ̀ɔ titã, ka cɔ bii Elii á naa ku faabaɛ. 50Nɔ Jesu í dɔ̃ anu má hee lele í bɛi í ku.

51Asee, waati bɛɛbɛ si ilui Zeruzalɛmu, ridoo iyi í wa kpasɛ̃i Ilaaɔ̃u í ga í kpɛ̃ minji hai lele hee ku bɔ ilɛ, nɔ ilɛ í yaya hee kuta ŋa à la. 52-53Balɛ ŋa à cĩ, nɔ woo dasi Ilaaɔ̃ naanɛ nkpɔ ŋa iyi à tako à ku wo à jĩ má, à fita hai inɔ balɛ. Si anyii kujĩi Jesu nɔ à bɔ Zeruzalɛmu ilu kumáu à tusɛ ara nŋa bi inɛ nkpɔ.

54Ŋɔi inɛ ngboi sooge ŋa do inɛ ŋa iyi à wa bi tɛɛ à waa degbe Jesuu à yɛ kuyayai ilɛu do mii ŋa iyi í ce fei. Ŋɔi njo nla nla í mu ŋa à waa ni, ntɔ ntɔ, inɛɛu ihɛ̃ Amai Ilaaɔ̃i. 55Inaabo nkpɔ gɔ ŋa à wa bɛ, à waa cɔ Jesu wa hai jĩijĩ. À too Jesu wai hai Galilee a naa a gbɔaa. 56Si inɔ nŋa Maari inɛi Madalau do Maari iyei Zaaki do Zozɛfu, do iyei amai Zebedee ŋa, aŋa fei à wa bɛ.

À dasi ikui Jesu balɛ

(Cɔ Maaku 15:42-47; Luku 23:50-56; Zãa 19:38-42)

57Iyi alɛ í lɛ, ŋɔi mɔkɔ ilu fia gɔ í koo bɛ. À ya kpoo Zozɛfu, inɛi Arimateei. Nŋu mɔ mɔcɔi Jesui wa jɛ. 58Ŋɔi í bɔ bi Pilati í tɔɔɛ ikui Jesu. Nɔ Pilati í yɔɔdaa í ni a naa. 59Zozɛfu í so ikuu í woo do acɔ fũfũ titɔ̃ gɔ. 60Nɔ í koo í suu si isai kuta gɔ iyi í jɔ̀ à gbea nŋu takaɛ wo. Si anyiɛ nɔ í bimbili kuta nla gɔ í dĩò andɛi balɛu í bɛi í nɛ.

61Maari inɛi Madalau do Maari iyi ihɔ̃u à wa bɛ à waa buba kɔkɔi balɛu.

Balɛ ku degbe

62Iyi iju í má, si ajɔi kusĩmiu, ŋɔi inɛ ngboi woo weei Ilaaɔ̃ ŋa do Farisi ŋau à bɔ bi Pilati ajɔ. 63À ni, lafɛ̃ɛ, à ye gigii ide iyi ilu ibou í fɔ si waati iyi í wɛɛ si andunya í ni si ajɔ mɛɛtasia nŋu á jĩ hai si balɛ má. 64Na nŋu, jɔ̀ a maa degbe balɛu hee ku to zakai ajɔ mɛɛta, ku ba mɔcɔɛ ŋa a maà naa a nya ikuu, a bɛi a koo a sɔ̃ inɛ ŋa a ni, í jĩ hai si balɛ. Waati bɛɛbɛ iboi ankãanyiu ihɛ̃ á na ku re baa ti takou má. 65Ŋɔi Pilati í sɔ̃ ŋa í ni, i gbã sooge ŋau a koo a degbeɛ bɛi ì bi ŋa. 66Nɔ aŋaò ŋa fei à bɔ bi balɛu. À ce nyinda gɔ si kutau ku ba inɛ gɔ ku maà cũu. Nɔ à jilɛ sooge ŋa bɛ à waa degbeɛ.

Currently Selected:

Matie 27: MKL

Highlight

Compare

Copy