HEBRUMEI 7
7
Kanat kajum atingpii Melkizedek
1Kadapokii Salem ki sagong, sagoi kaki Saraamah kanat kanhii kajum atingpii teinii, sagong madaigo ngam kalu kito nlaigong kalei Abraham go kadou wosii mpougo sa- toi pyiitakle, 2sateichii Abrahamnii mahlyii hangmah njai kearii kito njai hangninii mpougo pyiitakle. Melki- zedek zei mah kaang karei ainii “Kasang kamajyii mah sagong” sateichii mpou ai Salem mah sagong katu taiswisii mpou ai “Kamajung mah sagong” teitiile. 3Melkizedek pfii mak-kii, pwi mak-kii, mpoumah peipaomei hangninii mah kado ryiidek kabam tei gale, mpougo kalung mak-kii katai tinglang mah ryiidek kabam tei gale, mpounii Saraa nah sapfii mpou takumle; kalui gasii mpounii kanat kajum atingmei hangninii tiisii bamle.
4Julo, mpou ai kadaziikapiinii dipo! Abrahamnii saryii kito doukalu mpoumah mahlyii hangmah njai kearii kito njai hangninii tei mpougo pyiitakle. 5Sateichii kanat kajum atingmeimah bam doukalu Levi mah tatreng hang teinii ajaitingshang taiswisii meihang dato katunii, Abraham mah taa nahmei kado, Isrelmeinah dato njai kearii kito njai hangninii poi matu tang karam jangpii kakhatsam tei doutakle. 6Melkizedeknii Levi mah taa nahmei makle, nlenii njai kearii kito njai hangninii tei mpounii Abraham dato poiwo takle... Sateichii Saraanii pyiitanglesii riishii tiikabam doukalu mpougo tei satoi pyiitakle. 7Satoi pyiisii kaleipii teinii satoi kadoupii sung kisii dile katu ai mah kado maning kariirhii katu gale. 8Sateichii aikitonii taiga tang karam meinii njai kearii kito njai hangninii ai poileile, nlenii teiki tonii mpou ring leile katumah sakchyii kalei ah teinii poileile. 9Sateichii njai kearii kito njai hangninii dousii kalei Levi sekpiiniido Abraham paikito njai kearii kito njai hangninii tei pyiitakle sii tam buile. 10Kadapokii Melkizedeknii Abraham go kadou katu tinglang kak Levi tei mpou Pfii moilungto leile.
11Sateichii kanat kajum atingpii Levi sadung mah paikito bikamatui tei doutakle leponii, (Kadapokii tei kangto Isrelmeinah-nii ajaitingshang tei doutakle) Aron taito adoidoi tiisii lungkahum teisupii, Melkizedek taito adoidoi tiisii lung kahum kanat kanhii kajum Atingmei kaki hangninii pat tang karam kadapei kabi leipo? 12Kadapokii kanat kajum atingmei tei pikali katu tinglang kak, ajaitingshang kitodo poikali tang karam tei leile. 13Sateichii ai hang jangpii tam kalei, nyii Bangpii ai meilui kaki hangninii kitole, satei- chii mpou mah lui kak kito mei hangninii kado kakhatbam kiteito kanat kajum atingmei hangninii tiisii tha tiisang tiimakle. 14Kada- pokii Judah sadung kito nyii Bangpii gongle katu kasangpii titakle; teimah sadung mah kaang kito Mosesnii kanat kajum atingmei mah kaang kito samah kado tam makle.
Melkizedek takum katu kanat kajum atingmei hangninii
15Sateichii Melkizedek go njoi katu kanat kajum atingmei kaki hangninii kapat tinglang kak, nyiinii tam kalei ai hangkapii kisii kasang takle; 16Mpounii pumzai mah ajaitingshang taiswisii makle, nlenii kalui kaga karing mah teimaham taiswisii kanat kajum Atingmei tiiwo takle. 17Kadapokii ai ai mpoumah sakchyiile,
“Nang Melkizedek taito adoidoi tiisii lungkahum,
kalui tiikasu kanat kajum atingmei hangniniile.”
18kadapokii asung karei mah ajaitingshang tei kasui ninado mah kado kabi kaga jangpiinii toi aitakle. 19Kadapokii Moses mah ajaiting- shang teinii samah kado bimatwi matu womakle, sateichii kisii bikaki maning kamalum gotei pung gongpyiile, teimah paikito nyiinii Saraa mah bam kitei manang gongle.
20Sateichii ai ai riishii haisupii pat makle, 21sung kareiki kanat kajum Atingmei tiikalumei hang teinii riishii haisupii ahnyiimah bamtei poitakle, nlenii Saraanii mpou dakii tamle,
“Bangpiinii riishii tiiwo takle,
sateichii mpoumah lungswi kalilakle,
‘Nang kalui tiikasu kanat kajum atingmei hangniniile.’”
22Aitiisii Jisunii riishii tei njasii soikalak kisii kabi sat tang karam samtam tei tiitakle.
23Asung kareiki kanat kajum atingmei teinii mei hangkiile, kadapokii katai teinii ahnyiigo bam hang kiteito bamhumsanii tha tiimatu makle. 24Nlenii Mpounii kalui gasii leihum katu jangpii tak kasu kanat kajum atingmei bam tei doutakle. 25Teijangpii mpoumah paikito Saraada manang kagong mei hang go tinglang kaleita mpounii kei- kapyiido ngamle, kadapokii mpounii ahnyii jangpii riita khangpyii tang karam jangpii taksupii ringsii leile.
26Kadapokii ai kakum kamatei, tam kamashyiini kaga kahongrum kasu, kem katiimei hang dato poitaam kabam sateichii sating gam sung kisii poi kasagoi, kanat kajum Tingditupii hangninii nyiinii dou- tang karam sekle. 27Kanat kajum Tingditupii teinii karei reisang kito ahnyii mah kem jangpii, sateichii tei taito meihangmah jangpii sating kata kakarat pot pyiitoi kalei takumpiinii, mpounii tiitang karam kabi tei gale, mpounii mpou roinapii mpougo pyiikatoi tinglang kak, mpounii ai ai binii ahang jangpiinii tiitakle. 28Moses mah ajaitingshang teinii meinahgo ahnyiimah kasui kiteito kanat kajum Tingditupii tiisii kalaile, nlenii ajaitingshang tainii kagong riishii mah samkang teinii kalui gasii bikamatui nah sapfii mpou gotei kalaile.
Currently Selected:
HEBRUMEI 7: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
