HEBRUMEI 6
6
1Kaang aijangpii Krista mah karei roukatiimah samtam tei toi aisii, nyiinii mishang kaleilam teikii tatjou tude, katai tha kito lung kakali mah sateichii Saraa dakii kamalum mah, 2dwi ka-mpum hangmah kaang kito rali kapyiimah, bah poikamakhii mah, kataimei ringkakhii mah sateichii kalui kaga samtak katii mah bangmaa tei nlailoisii tiimakhii sude. 3Sateichii Saraanii mazhiipyii leponii, ai ai nyiinii tiitangle.
4Kadapokii binii swi tii-mvapyii kalei, sating gam mah luha masei kalei, sateichii rangii kamatei mah njai dou njoi kalumei, 5Saraamah samtak mah sateichii gong tang karam aha kanamah teimaham hang mah, chiikabi chiikashyii masei kalei ahnyii teinii koukalei kito, 6ahnyiigo nlailoisii lung kali matu katu katang kiteikii kailoi katu tei tiipeiwo lakle; dapokii ahnyiinii Saraa nah sapfii mpou gotei ahnyii jangpii Krosh gamki gisii, mpougo madurahapii tii nrou aitakle.
7Kadapokii sagoi gamto nlai nlai loisii satingryii kamang tei sak kalu, sateichii lu tha takalei ahnyii jangpii sagei ralui pokpat kapyii sazyii teinii Saraa dato satoi doule. 8Nlenii tu kapung sateichii rhiima pokpat lepo- nii, sazyii tei kadakle, sateichii ka- sheeng doutang karam natakle, teimah kalui teinii mipii rukatoi teile.
9Nlenii nyiinii teitiisii tam kado, lungkasyiimei, gonyii jangpiinanii gonyiimah keikapyii karing go reng karhiisii kalei kisii kabi satoi tei gonyiinii bamle katu nyiinii tiigatpii tile. 10Kadapokii Saraanii majyii kasu gale, gonyiinii kamateimeigo tiikaha ninado aitoido tiihasii kalei gonyiinii tiikabam tha ninado mpou jangpii mangou kabam lungkasyii tei mpounii mangai lakle. 11Sateichii gonyiinii mahat supii, kamalum ninado lung leh kati paikito riishii tiikabam tei doukalu ahnyiimah jai karalimei tiitang karam jangpii, 12gonyii hangnii kalui katang maning malum katu tiigatpii lung leh kati katang tei lungliit katu tei katang gonyiinii tiikamangou nyiinii mareile.
Saraa mah riishii
13Kadapokii Saraanii Abraham dakii riishii katii tinglang kak, riishii katiiki liit tang karam jangpii kisii dikaki mei zei kado kaga jangpiinii, mpou zei latsii riishii tiitakle, 14madou supii Inii n-go satoido pyii tangle, sateichii moido moibui matu tangle. 15Sateichii aitiisii mpounii lung lehti sii leh kalu kito riishii tiikapyii tei doutakle. 16Kadapokii meinahnii ahnyii sung kisii kadimah zei tei latsii riishii tiileile, sateichii kasou kalei hang kito tiitak tang karam jangpii riishii rasat ainii kaluile. 17Mpounii riishii tiikabam gotei doutang karam ahnyii dateikii, mpounii tiimatu kanyii tei mpounii tiisang tiikali lakle katu tei Saraanii matei sagaisii timatunyiile, tei- jangpii mpounii hangna kak kiteikii riishii teipii satpyiile. 18Teipiinii ai tha hangna katunii, kalipei wokalak ninado Saraanii chuipeiwo kalak kaang ai leile. Teijangpiinii mpougo kaswisii nsungbam doukalumei nyiihang go nyiidoito kalei maning kamalum kiteito makhiipyii takle. 19Nyiinii maning kamalum ai malyii ka-ntakbam takumpii nyiimah karing jangpii bamle. Ainii sadoi kashyii kito keikalu ninado soikalak sateichii Saraa kamaning kilungkii lam kabam peira tailam katang tatliit wokabui teile.
20Nyiihang tung tiisii Jisunii nyiidoi reisii teiki tei tat tutakle, sateichii Melkizedek taito adoidoi tiisii lung kadoihum kalei taiswisii kalui kaga kanat kajum Tingditupii hangninii tiiwo takle.
Currently Selected:
HEBRUMEI 6: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
