GALATIMEI 6
6
Hangni hangninii mah pot kamaswi punghalo
1Kangsanamei, kem kamaki takliit kaleimei hangniniigo jum woleponii, rangii lamto kalei, gonyii- nii ahgo tiimajyiipyii tang karamle. Nlenii teitei gonyiinii sotniimakpii tiitang karamle, sateichii n-godo hemwo kasu tiisii, goroinapii n-go julo. 2Hangninanii hangninii mah pot kamaswi tei punghasii Kristamah ajaitingshang tei gong matwi matulo. 3Kadapokii samah kado kasu mei kata hangninanii ah roinapii ahgo mah hangninii tiisii maning leponii ah roinapii chui aitakle. 4Nlenii mei nsang nsangnii mpou mpoumah tha tei samtak tiimatulo, mei kakimeinii tiikabam gotei ka-nda supii, tha tei bileponii, mpounii tiikabam kabi jangteipii mpounii detdi wobuile. 5Kadapokii meihangnii mpou mpou- mah pot tei pung tangle.
6Kristenmei mah samtam ralika- pyii doukalumei teinii ahmah kabam kabi hangtei mpoumah ralikapyii- piigo kaswisii njaitang karamle.
7Gonyii roinapii gonyiigo chui- sulo, Saraago hoksii nuilei makle, dapokii meinahnii mpoumah ling kakai ziikii rachetdo rachet tangle. 8Kadapokii mpou pum mpou zai sek kikii ralyii kakai mei teinii pumzai kiteito kaga tei rachet tangle, nlenii rangii kikii ralyii kakaimei teinii rangii kiteito kalui kaga karing tei rachet tangle. 9Teijangpiinii kabi tha katii kiteito nyiinii laksude. Kadapokii nyiinii lung nkhii suleponii, nyiinii rachet tang karam tinglang kabi tei gongtangle. 10Tei- jangpii nyiinii tinglang kabi kadouta tei, meihang dakii ninado routiisii kamalum kito ki kalungmei hang- ninii tiisii kaleimei dakii nyiinii kabi tei tiide.
Kalui samtam
11Julo, gubah sekpiinii kadazii- kapii gek kadipii gonyii dakii Inii ryii leipo! 12Pumpou lamto kabi tei tiigatpii mangou kanyiimei hang- teinii gonyiigo tiigyii malem matu tang karam jangpii pumtei tiisii leile, Krista mah krosh jangpii ahnyiigo kaset kalak pyii matulak tang karam jangpii roiniile. 13Kadapokii tiigyii malem kaleimei katangpiinado ahnyii sekpiinii ajaitingshang tei swimakle; nlenii ahnyiinii gonyiimah pumzai kito detdi wokabui jangpii, gonyiigo tiigyii malem matunyiile. 14Sazyii pouryiinii gudakii sateichii Inii sazyii pouryii dakii krosh kito taikapyii, nyii Bangpii Jisu Kris- tamah kaang kito supiinii detkadi tei gudato dhii matulo. 15Kadapokii tiigyii kamalem mak-kii tiigyii malem kasu teinii samah kado makle, nlenii kasatai baichem teile. 16Ajai aipii tat kaleimei hang phyiiryii sateichii Saraamah Isrel dakii kamajung ninado lungsyii kapyii tei matulo.
17Teijangpii meikaniido n-gu tiikamage matu sulo, kadapokii Jisu mah jam hangtei Inii gupum kikii pung leile. 18Kangsanamei, nyii Bangpii Jisu Kristamah jumage ka- pyii tei gonyiimah rangiigo kaswipyii matulo; Amen.
Currently Selected:
GALATIMEI 6: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
