2 TIMOTHI 2
2
Krista Jisumah saryiimei
1Teijangpii gunah sapfii mpou Krista Jisu dato kalei jumage kapyii kiteito nang sangtingsii bamlo. 2Sateichii sakchyii meihangkii doito nangnii gudato shiikalu tei mei kakimei dakiido ralipyii kabuimei dakii tiilosii tampyiilo.
3Krista Jisumah saryii kabimei hangninii tiisii kamage tei njai poi njoilo. 4Saryii katiimei kata hangni- naniido mpougo saryii tiimatu tang karam jangpii zei kaikapyiipii gotei dzyii karanga tiitang karam jangpii meida tiisii kalei mei machiimah tha hang kiteikii mpoupumgo poi nja leimakle. 5Pak kamaga katu ki haikalei nhok kamaga katumei hangninanii nhok mah ajai gotei swikasuta teinii mpounii alangh tei doupei wolakle. 6Kamagesii teisii tha tiikalei lu tha katamei teinii rachet kareimah njai tei doutang karamle. 7Inii kadapei tamleipo swi mashaklo, daponii mahlyiihang kito kati tei Abangpiinii n-go pyii tangle.
8Inii tam ralikapyii kabi rasam taiswisii kataimei kak kito ringkhii kalu, Devit mah tatreng kito kagong Jisu Krista gotei maninglo. 9Inii kabi rasam katam karali jangpii mei tiikanhii tiikaleimeigo takumpii reng kapei katang kamage kalak tei Inii leh takle; nlenii Saraamah samtam teinii peinei aimakle. 10Teijangpii kalai kalumei teiniido kalui kaga pumtei kava tei njasii Krista Jisu dato kalei keikapyii karing tei doumatu tang karam jangpii ahnyii jangpii Inii mahlyiihang pungpyii takle. 11Tam kalei sam ai malum wobuile.
Nyiinii mpougo kaswisii tai aitakleponii,
nyiinii mpougo kaswisii ringdo ring njoitangle.
12Nyiinii kamage kalak hangtei pungwo leponii,
nyiiniido mpougo kaswisii sagong tiisii magongsii lung tangle;
nyiinii mpougo mazhiisu leponii,
mpouniido nyiigo mazhiipyii lakle.
13Nyiidato malum kabui tei galeponii mpounii malum kabwi tei taksupii leile,
dapokii mpounii mpouroinapii mpougo mazhii kasu tei tiipei wolakle.
Kamazhii lukai kalu tha katiimei
14Ahnyiigo aihang ai tam maningpyiilo sateichii samah kado kabi kaga; kashiimei hang go tiika- maga sam kasousii kajyii matulak tang karam jangpii, Bangpii doito ahnyiigo tam kakhat pyiilo. 15Kasang mah samtei tiigatpii jum majyiisii kalei nroutang karam kaang kaga tha katiimei, Saraanii lukai kalumei hangninii tiisii gopum Saraa dakii pyiitang karam tei mahunglo. 16Saraa dato meigo kisii kisii chyiitai katu kakadak ninado kapang ka- mang mah sam karashii katu kiteito mpaa wolo. 17Teikakum ralikapyii teinii kamyiikang go chii kalei kataam rajam kapung takumle. Tei kakum ralipyii kaleimei hangna teinii Haimeneos ninado Filitas le. 18Aitoinii katai kito ringkakhii ai maju taklesii tamsii kasangmah pwidi kito mpaasii tat tukaleimei ainii mei kangkiimah kamalum tei tiimagasii leitakle. 19Teitii kido Saraamah bangmaa kasangting teinii nlaisupii satsii leile, aimah siiti ai pungsii; katunii “Bangpiinii mpoumah katu- mei hang go tile,” sateichii “Bangpii zeigo latsii kaleimei hangteinii kakui kama kiteito mpaa matulo.”
20Sateichii ki kadi kitei sanah mah sateichii sanah raguibamah koklat roinii makle; nlenii ting mahdo sazyii rangrhii mahdo leile; sateichii koklat kangkago hungsii jumle sateichii kangkagonii mai malasii jum leile. 21Teijangpii mei kata kangkanii mpou roinapiinii mpougo kamala kito aihang tiimatei aitakle- ponii, mpounii maihungsii kajum tiimatei kalei ki apumpiinii jumtang karam jangpii kabi, sateichii tha kabi hang jangpiinii tiida kabam koklat hangninii tiitangle. 22Teijangpiinii rahang ralhii mah marai majang hang kiteito nlek wole, kamatei lung- swi kiteito Abangpiigo kalatmeigo kaswisii kasang kamajyii lungkasyii sateichii kamajung teitei swilo. 23Nlenii kapang kamang ninado tikasu ngoukasu sam kajyii katu teipiinii n-gi razyii tii-mpatle katu tei tisii teiki teito nlek wole. 24Sateichii Bangpii ki kaleimeinii ka n-gi kajyii leimakle, nlenii bamlyiihang kito lung kamanoi rali kati lung leh kati, 25ngou karoumeigo manoisii tiima- jyiipyii tang karamle; ahnyiinii lung kalisii kasang tigong matu tang karam jangpii. Saraanii ahnyiigo tinglang kabi pyii leido malahle. 26Sateichii ahnyiinii ahnyiimah swi kitei swiling gongsii ahnyiigo jumsii mpoumah kamaning kamarei teitei swi matusii kalei seitan mah mphee kiteito ahnyiinii nlek aido malahle.
Currently Selected:
2 TIMOTHI 2: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
