2 KORENMEI 6
6
1Nyiinii Saraago kaswisii tha tiisii leile, teijangpii Saraa mah jumage kapyii tei matapii kadaktoi sulosii nyiinii gonyiigo khang leile. 2Kadapokii Saraanii tamle:
“Kamazhii tinglang kito Inii n-go shiipyiile sateichii n-go keipyii tang karam mah leimik tei gujangpii kagong kak Inii n-go tiihale.”
Julo, aitoi kamazhii tinglangle; julo, keipyii tang karam mah leimik tei aitoile.
3Nyiimah tha kito kama tei mei kata hangninii kaniido doumatulak tang karam jangpii, mei kata hang- niniimah pwidi kikiido doikadang tei nyiinii kaimakle. 4Nlenii kamage, kalak kanhii ninado sadoi kashyii hang kito, leh kati teipii, nyiinii katii kapung hang kito nyii ai Saraa nga kangameile katu tei nyiinii ma- ngoule. 5Nyiigo datle, kabang kikii bangle sateichii nyii phyiiryiikii mei moinii koi nrung patle, nyiigo tha katei tiimatusii, maziit kasu ninado moi kamazyii tei nyiigo pyiile. 6Nyiimah kamateipii, swirek katipii, leh katipii sateichii Saraa nga ka- ngameile katu tei nyiinii nyii roinapii meigo mangoule...rangii kamateipii, nyiimah kasang lungkasyiipii. 7Nyiimah kasang samtam teipii sateichii Saraamah samtam teipii nyiimah saryii baitui takumpii, meigo saryii tiitang karam ninado dangtang karam jangpii kasang kamajyii tei nyii dato bamle. 8Nyiigo sadzyii ngariit tiile sateichii tiido tii-nrou tiisangam pyiile; nyiigo kalet kalou tiile ninado tamdo tam matoile. Nyiigo kachuimei takumpii tiile, nlenii nyiinii kasang tei tamle, 9Nyiigo juti kasumei takumpiinii tiile, nlenii meihangnii nyiigo tiigatpii tiipyiile, nyiigo kataimei takumpii tiile, nlenii gonyiinii ngousii kalei takumpii, nyiinii ringsii bamle. Nyiigo tiikamage pyiile, nlenii nyiigo girang aimakle. 10Nyiigo swi tiika- mage kado, tinglang kaleita nyiinii ntale; nyiinii mah kagamei takumle, nlenii mei hangkiigo nyiinii mah tiimani pyiile; nyiinii mah kado kaga takumle, nlenii kasangpii nyiinii mahlyii hangtei bamle.
11Koren kito kalei kanghemei! Gonyiigo nyiinii madupii tam takle; gonyii jangpii nyii lung disii laatpyii bam takle. 12Gonyii dakii nyiilung laatpyii kasu ai nyiinii makle, nlenii nyii dakii gonyii lung laatpyii kasu tei gonyiiniile. 13Aitoinii gonyii ai gunahmei takumpii Inii tam leile: Gonyii jangpii nyiinii maning kalei takumpiinii njoisii gonyiinii nyii dakii mangoulo. Gonyii lung disii laatpyiilo!
Karing Saraa mah kitei nyiile
14Malum kasumeigo masam katu takumpiinii kaswisii tha tiisulo, kadapokii teitei tiipeiwo lakle. Kasang kamajyii nei kakui kama tei kada takumpiinii kaswisii tha tiiwo tangpo? Kava nei kamyii tei kada takumpiinii kaswisii lungwo tangpo? 15Krista nei seitan tei kada takumpii mazhiiwo tangpo? Kamalum mei hangninanii malum kasumei hang- niniigo masam katu kadapei leipo? 16Saraamah Saraa kamaning ki tei nei tingtu hangteinii kadapei kamazhii leipo? Kadapokii nyiinii ringsii kalei Saraamah saraa kamaning ki teile; Saraanii tam kabam takumpii:
“Ahnyii lung kito Inii lung tangle,
sateichii ahnyii kak kito Inii nlai tangle,
sateichii Inii ahnyii mah Saraa tei tiitangle ninado ahnyiinii gumei tiitangle.”
17Teijangpii Bangpiinii tamle,
“Ahnyii kak kito gonyiinii sipat tosii thaam wolo,
sateichii matei kasu tei hangninii kado deng sulo;
teitii leponii Inii gonyiigo lukaipyii tangle.
18Sateichii Inii gonyii Pfii tiipyii tangle,
sateichii gonyiinii gunah sapfiimei ninado gunah sapwimei tei tiitanglesii katei kakhang Bangpiinii tamle.”
Currently Selected:
2 KORENMEI 6: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
