2 KORENMEI 5
5
1Kadapokii nyiinii lungkalei sazyii pouryii mah dwipeiki ai tiimaga aileponii, meinah bahpii tiikasu aki, sating gamto kalui gasii lungtang karam nitei, Saraa dato nyii jangpii leile katu nyiinii tile. 2Sateichii nyiinii sazyii pouryii mah ki ki aito lungkalei kak nyiinii ka- mage chiingai ngaisii leile, sateichii nyiimah sating gamto lung tang karam ki tei nat kai kalei takumpii nyii phyiiryiikii kaipyii matunyiisii nyiinii koisii bamle. 3Katunii, nat kai kalei takumpii kaiwo takle sekchii, peimani haikasu tei nyiigo ngoulakle. 4Nyiinii sazyii pouryiimah dwipeiki aito lung kalei kak, machang marang katupii nyiinii kamage chyiingai ngaisii bamle; sazyii pouryii mah pum kito nyiinii nlekwo nyiile katu makle, nlenii sating gam mah hangninii tei nyii phyiiryiikii kaipyii matusii, taiga tang karam gotei kalui kaga karing teipii tiikali matu kanyii jangpiiniile. 5Tiikakali aijangpii nyiigo tiida kapyii tei Saraale sateichii nyii jang- pii koikabam hangtei pyii mashang ling tangle katumah kamazhii tiisii mpoumah rangiitei mpounii nyiigo pyiile.
6Teijangpii nyiinii tinglang kaleita lung dile; sateichii nyiinii pumzai kito lungkalei tanii nyiinii Bangpii dato dhiisii leile katutei nyiinii tile. 7Kadapokii nyiinii mik kangoupii tat makle, nlenii nyiinii kamalum paikito tatle. 8Nyiinii lung disii bamle, sateichii nyii pum kito thamsii bam tang karam sateichii Bangpiigo kaswisii bam tang karam tei nyiinii mareisang mareibwile. 9Teijangpii Bangpii dzyii karanga tei nyiinii kalei bamlyii kito, nyiimah sazyii pouryiimah tiilung kito kado, mak-kii gongtang karam kana tiilung kito kado nyiinii tiinyiile. 10Kadapokii mpougo samtak tiimatu tang karam jangpii, Kristamah samtak katiibam doitei nyiihangnii gongtang karamle; sateichii pum- potmah tiilung kito mpou mpounii tiikabam hang katunii, kabi kado kashyii kado, mpou mpounii douka- majyii taiswisii mei nsang nsangnii doutangle.
Krista mah paikito Saraago kanghe katii
11Bangpiigo kahing katu tei kadapeigopo katu tei nyiinii tisii, malum kabui tiisii nyiinii meigo tampyiile. Nyiimah kaang kito matum madum tei Saraanii tile; sateichii gonyii lung kito gonyiinii n-gudo tile katu tei Inii maning malumle. 12Nyiinii gonyii dakii nyii roinapii nyiigo nlailoisii tam matoi katu mah makle, nlenii mpoumah lungswi kito supiinii meinah mah sabaju mikjot kito detdisii kalei ahnyiigo gonyiinii khela kabui jangpii, nyiimah kaang kito gonyiinii detdi kabwi jangpii gonyii dakii nyiinii pyii leile. 13Nyiinii n-gok leponii teitei Saraa jangpiiniile; nyiinii lungswi majyiisii leileponii, teitei gonyii jangpiiniile. 14Kadapokii Kristamah lungkasyii teipii nyiigo apum tiiwo takle; da- ponii nyiinii aitiisii malum wotakle katunii, meihang jangpii hangninanii taipyii takle, teipiinii hang ai taitakle. 15Sateichii ringkalei mei- hangnii ahnyii jangpiinii ringloi supiinii, ahnyii jangpii taisii ringkhii kapyii ah jangpiinii ringtang karam jangpii, mpounii meihang jangpii taipyii takle.
16Teipiinii aitoi sekpii, nyii mei hangninii kagodo meinah mah pum- zai lamto samtak tiisutakle, tinglang hangniniiki nyiinii meinah mah kamaning kito nyiinii Kristago samtak tiisii leikado, nyiinii mpougo teitiisii samtak tiiloi sutakle. 17Teijangpii mei kata hangninanii Krista dato leileponii, ahnii karanu baichemle; kaham tei tat maju aitakle; julo, karanu tei gong takle. 18Saraanii aihang ai nyii jangpii tiipyii takle, sateichii Kristanii nyii jangpii ai ai tiikapyii jangpiinii ngou karou saryiimei tiisii kalei kito Saraanii nyiigo nlailoisii mpou kangmei katii kikii tiikalipyii takle. Aitoinii mei kakimei hang godo mpou kangmei tiimatu tang karam jangpii tiitang karam tha tei nyiigo pyiitakle. 19Nyiimah samtam teinii Krista paito sazyii pouryiimei hang go Saraanii mpoumah tiipyiisii leile, ahnyiimah kem ajhii kamoi tei Saraanii fiipyii makle, sateichii mpounii ahnyiigo kada takumpii mpoumah kangmei tiipyiisii leipo katumah samtam tei mpounii nyiigo pyiibam takle.
20Teijangpii Krista tung tiisii nyiinii malhii leile, Saraa Ah sekpiinii mpoumah khang kalei tei nyii paikito khang kalei takumpii, Krista tung tiisii, nyiinii gonyiigo khang leile; ngou karou saryii kito mpoumah kanghe katii kikii gonyiigo Saraanii tiikalipyii matulo! 21Krista teinii kem tiisang tiimakle, nlenii nyiinii mpougo kaswisii hangninii tiisii nja kalu kito, Saraamah kasang kamajyii tei nyiinii jaihai matu tang karam jangpii Saraanii mpougo nyii jangpii nyiimah kemtei dou njoi matu takle.
Currently Selected:
2 KORENMEI 5: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
