2 KORENMEI 11
11
Pol ninado kasang kasu tiilamlwi kapyiimei
1Inii chengniikii swiga katu tinglangki kak katangdo gonyiinii n-gu kaswisii leh njoi kapyii tei Inii mareile, n-gu kaswisii leh njoi seilo! 2Saraanii lung kanhii takumpii, gonyii jangpii Inii lungkanhii hang- kapii leile; sapwimei hangninanii mpoupeigo manou tang lesii n-nhii- tak kalei sapfiimei hangniniigo bisii kalei, sateichii myiikapang leimik tei gong kasuta mateisii kalei takum- piinii, gonyiinii Jisu Kristago tiigatpii matwi mashangsii bisii kalei tei Inii mareile. 3Nlenii Sanhiinii mpoumah kasakai kamarek teipii Eve go satui sadzyii tiikalu takumpiinii, Krista dato pyiikalei gonyiimah kasang lungswi ninado kamatei kito tiimahong katugo Inii hingle. 4Ka- dapokii daziikapii tiinyiisii gonyiinii gonyiida kagongmei gotei leh pyiipo katu tei Inii ngoule. Inii tam rali kapyii Jisumah kabi rasam doito tham kido gonyiinii ahnyiimah kabi rasam gotei malum wole! Nyii dato gonyiinii doukalu rangii kamatei tei kasu, ahnyiinii pyii tanglesii riishii tiikapyii rangii gotei gonyiinii lukai wole! Nyiinii tam ralikapyii kabi rasam doi teito thamsii leikado ahnyiinii tam ralipyiisii kalei kabi rasam gotei gonyiinii lukai wole!
5Teikatii hangkapiinii bikaki gonyiimah tiilamlwi kapyiimei hang doito I-ai nkhiikimak lesii Inii maningle. 6Inii samtam kito tamti malhiiti sukido, swirek kati katunii makle, nlenii mahlyii hang kito tinglang kaleita nyiinii gonyii dakii kamakum gasii madupii ai ai tiimangou takle.
7Inii gonyii dakii Saraamah kabi rasam tamrali kapyii tinglang kitei Inii gonyii dato samah kado mai poipyii makle, gonyiigo poi sagoi tang karam jangpii gu roinapii Inii n-gu poisana pyiile. 8Inii gonyii kak kito gu tha tiitang karam jangpii Charsh kakimei hang dato tiikaha poi wosii, ahnyiimah njai tei sao wotakle. 9Inii gonyiigo kaswisii kalei kak sateichii Inii sana kamarei kak, Inii meigo kado tiikamage makle, kadaponii gumah kamarei hangtei Mesidoniya kito kagong kangsanameinii fiipyiisii leile. Teipiinii Inii gonyiigo tiikamage makle, sateichii aitoido mak-kii madou kado Inii gonyiigo tiikamage lakle. 10Kristamah kasang ai gudato kalei taiswisii Akaiyamah bang hang kito gumah det kadi ai makumpiinii bam lakle, 11Inii gonyiigo lungsyii kasu jangpiinii ai ai tamleipo? Saraanii tile Inii gonyiigo lungsyiile!
12Nyiinii tiikalei takumpiinii ahnyiiniido tiilei lesii tam katu sateichii tiilamlwi kapyiimei kaki- meinii detdi tang karam kaang gamatu tang karam jangpii Inii aitoi tiikalei ai Inii tiisii leihum tangle. 13Kadapokii tei kakum meihang teinii kashyii tha katii, ahnyii roi- napiinii Kristamah kasang tiilamlwi kapyiimei jai tiisii kalei, kasang kasu tiilamlwi kapyiimei teile. 14Sateichii ai ai kamadat makle. Kadapokii seitan katangpiinado ah roinapiinii kavamah rakot hangniniimah jai reisii tiiwo leile. 15Teijangpii mpouki ki kaleimei hangteinii ahnyii roina- piinii ahnyiigo kasang kamajyiimah kikaleimei takumpii jai reisii tiiwo kido, teiteinii sung kaga sam makle; ahnyiimah tha taiswisii doukamajyii tei kalui kito ahnyiinii doutangle.
Polnii mpoumah kamage kalak jangpii detkadi
16Inii tamloi leile: mei kaniido n-gu swi kagamei lesii maningsei matu sulo; nlenii gonyiinii maningle leponii, Iniido chengniikii detdi kabui jangpii, swi kagamei hangninii takumpii n-gu lukaipyiilo. 17Inii aitoi tam kalei ainii Bangpiimah teimaham kito tam makle; detkadi ai kaang ki aito Inii swikagamei hang- ninii takumpii tam leile. 18Nlenii mei hangkanii sazyii pouryii mah mah kaang kito detdisii kalei taiswisii, Iniido detdi tangle. 19Kadapokii gonyii roinapiinii kasakaipii tiisii, gonyiinii swi kagamei hang gotei ntasii lehpyiile! 20Kadapokii mei kata hangninanii gonyiigo tamsii kakhat katu kito, mak-kii gonyiigo mphee kaisii kalei kito mak-kii, gonyiigo satuisii kalei kito, mak-kii gonyiigo gonyiiju gamkii kaphyiisii kalei kito gonyiinii lehpyiile. 21Tei kakum hang tiitang karam kito nyii ai reiga beidiju takle katu tei Inii tam nroule, aitoi Inii swi kagamei hang- ninii takumpii tiitang takle sateichii mei kakimeinii detdisii kalei mahlyii hang kito Inii detdi tang takle. 22Ahnyii Hebrumei manii? I-dole. Ahnyii Isrelmei manii? I-dole. Ahnyii Abraham taa nahmei manii? I-dole. 23Ahnyii Krista ki kaleimeipo? Inii swibi kasumei hangninii takumpii tamsii leile. Nlenii Inii ahnyii sung bikaki kikaleimei hangniniile! Inii kisii teisii tha tiikile, Inii kabangki nlai nlailoisii liitle, Inii kisii tingrang kadat tei doule, sateichii nlai nlai loisii taitang karam kanatei Inii doule. 24Jehudimei bah kito tingrang kakache tei rekdai kito hangninii tang kasu ai Inii dou mangiikii takle. 25Rom kito kaleimeinii n-gu lak tumkiile; n-gu kuitupii binii rotle, malyii garyii nkak twumkii ki Inii haitakle sateichii tinghum hangninii tingna hangninii ai dwi kito Inii buineile. 26Gumah mbui hangkii kito sadoi kashyii tei Inii kadoule, dwi kadi kito sadoi kashyii sateichii karagamei bah kito sadoi kashyii, n-gu njoi katu Jehudimei bah kito sadoi kashyii sateichii lui kakimei hang bah kito sadoi kashyii; namdi hang kito sadoi kashyii, sazyii kamarong kito sadoi kashyii, dwijai kito sadoi kashyii sateichii kasang kasu kangsanamei bah kito sadoi kashyii. 27Tha katii ninado kamage leh katu, tinghum hangkii Inii zyiikasu, Inii moi kamazyii ninado kasaryii, tak chiisupii, sateichii peimani kaisupii leile. 28Sateichii mah kaki kaki hang phyiiryii todo Charsh hang jangpii gumah lung- kanhii teipii guphyiiryiikii sating kata rakatneisii leile. 29Mei kata hangninanii rangii suisii kalei tinglang kak, Iniido suisii leile; mei kata hangninanii kemki tak kaliit tinglang kak, Inii samou kasu teipii tokryiile.
30Inii detdi tangle leponii, I-ai daziikapii suipo katu kamangou mahlyii hangmah kaang kito Inii detdi tangle. 31Bangpii Jisumah Pfiido Saraado tiisii kalei, kalui gasii tam matoi tang karam ahnii I chuimakle katu tei tile. 32Inii Damaskas kito kalei tinglang kak, sagong Aritas kangto Governornii n-gu jumtang karam jangpii Damaskas namdi kimah kamwi hang kiteikii sangtang karam jangpii saryiimei kai aitakle. 33Nlenii n-gu razyii hangninii lungkii kaisii mbaang kachet kito m-mangpyiisii mpoubah kito nlek wole.
Currently Selected:
2 KORENMEI 11: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
