1 PITAR 1
1
Salam kapyii
1Jisu Kristamah tiilamlwi kapyii- mei hangninii tiisii kalei Pitar dato–
Pontas, Galati, Kepadosi, Asia, ninado Betani bamlyii hang kito sapumnah tiisii marou maruksii lungkalei Saraanii kalai kalumei hang dakii: 2Apfii Saraamah kama- ning kamarei ninado reipiinii tikalei taiswisii gonyiigo kalai wotakle, sateichii mpoumah rangii teipii gonyiigo kamateimei hangninii tiipyii takle; Jisu Kristanii katam swisii mpoumah zai teipiinii tiima- teipyii matu tang karam jangpii:
Jumage kapyii ninado kamajung tei gonyii dato moibui matulo.
Kristenmei mah maning kamalum
3Nyii Bangpii Jisu Kristamah Apfii ninado Saraa gotei tam matoile! Mpoumah kadi lungset kati teipii Jisu Kristanii katai kito ringkakhii teipii mpounii nyiigo karanu tiilung tei pyiile. Aipii nyiigo taikalak karing maning kamalum teipii tiitokryii pyiile. 4Teipiinii Saraanii mpoumah mei jangpii kaidek kabam raguiga kalak maikateeng gotei doutang karam jangpii nyiinii doilamkii ra- jangsii leile; gonyii jangpii gakalak, tiimahongwo kalak, ninado ragui- gawo kalak tei sating gamto mpounii kaidek bamsii leile. 5Keikapyii karing tiilung jangpii kalui ting- langki mangou tang karam jangpii tiida kabam, kamalum kito Saraa- mah teimahampii bisii kaidek kabam hangtei gonyii jangpiiniile.
6Aitoi tinglang shangniikii jang- pii kataam kataam tiisii jai kaju kamage kalak hang gonyiinii pungsii swi kamagetu kido, gonyii kaang aijangpii nta rangalo, 7Tiimashyiiwo kabui sona katangdo, ahmah matei kasu kahong hangtei rutoitang karam jangpii mipiinii jaijuleile; teitakumpii sona sung kisii maiteeng kaki gonyiimah kamalum tei gonyiinii dousii kalei kamage kalak hangteipii jaiju tang karamle. Gonyiimah kamalum teinii leh wosii satto leponii, Jisu Kristanii kagong piinei leimik gonyiinii tam kamatoi, pumtei kava ninado sadzyii ngariit katii tei Saraa dato doutangle.
8Gonyiinii mpougo ngoumak kado, gonyiinii mpougo lungsyiile sateichii gonyiinii mpougo aitoi ngoumak kido, gonyiinii mpougo malumle sateichii mwipiinii tampei kalak pumtei kava ninado hangkapiinii ka-nta karanga tei kaswisii gonyiinii nta rangale. 9Gonyiinii hangkapii nta rangale, dapokii gonyiinii Jisu Kristago kamalum kito doukalu, kei- kapyii karing tei gonyiigo pyiitakle.
10Gonyiigo jumage kapyii pyii- tangle katu mah sam saa ka-mpat lungkakalingmei teinii keikapyii karing aimah kaang kito tiigatpii fiile. 11Kristamah rangii teinii lungkakalingmei lung kito liit tosii, Kristanii kamage kalak pungtang takle, nlenii kamage kalak pung kaleitai mpounii ngam tangle katu tei rangiinii mati mangoupyiile. Ai ai kadadou pat tangpo sateichii kada takumpii pat tangpo katu tei Lung- kakalingmeinii fiile. 12Lungkaka- lingmeinii saa mpat kalei kabi rasam hangtei ahnyii roinii jangpii kabi tei roisupii, gonyii hang jangpiile katu tei Saraanii lungkakalingmei dakii mati mangoupyii takle. Ahnyiinii katam tei kabi rasam katam mei teinii gonyii dakii aitoi mati mangoupyii takle. Ahnyiinii kabi rasam tam kalei kitei, sating gamto Saraanii m-mang kapyii rangii kamatei teinii ahnyiigo kaswipyiile, sateichii aihang ai rangii kamatei katangniido tinyiisii kalei teile.
Kamalum meinii kamatei tiilung lungtang karam
13Teijangpii gonyiimah lungswi tei tiikada wolo, gonyii roinapii gonyii pumpotgo jum matwilo, sateichii Jisu Kristago kamangou kak, gonyiigo pyiitang karam satoi kiteikii roinii gonyiimah kamalum tei kai wolo. 14Katam kaswi nahmei takumpii, gonyiinii tikasu tinglang kareiki pumzai mah kamaning ka- marei hangtei fiiloi supii, 15gonyiigo lat kapyii ahnii kamatei takumpii gonyiimah jairali hang kito mateilo, 16kadaponii aitiisii ryiibamle, “Gonyii mateilo, dapokii Inii mateile.”
17Sateichii kaghu kapang mei- hangmah tha taiswisii samtak katii ah gotei gonyiinii Apfii sii lat leponii, gonyiimah sazyii pouryiimah tiilung tei ahgo hingsii lunglo. 18Kadapokii sana mak-kii sana raguiba aipii supiinii, kasui mak-kii sajek kaga jaonah takumpii, mai kating Kristamah zai teipiinii. 19Gonyiigo gonyii peipaomei dato adoidoi tiisii doukalu kakadak mah tiilung kito lai mpatpyii takle katu gonyiinii tile. 20Sazyii pouryii tii mpat kasunato Saraanii mpougo kalaiwo takle, nlenii kalui tinglang kinii gonyii jangpii mangoupyiile. 21Katai kito tiimaring kapyii sateichii pumtei kava kapyii Saraa gotei, mpou paikito gonyiinii malumle; teijangpii gonyii mah kamalum ninado maning kama- lum tei Saraa dakii mik leeng bamle.
22Kristamah kakhatsam hang gotei gonyiinii katam swiwo takle, teipiinii gonyiimah kem hangtei magapyii takle, sateichii rangii lamto gonyiinii matei takle. Aipiinii gonyii kangsanameigo mateisii lungsyii matu tang karam tei gonyiigo doumatu wole. Teijangpii gonyii mei hang- ninanii hangniniigo lung matum madumpii lungsyii tang karamle. 23Kadapokii gatuwo kabuimah lwirou kito supii, gatupeiwo kalakmah kito karing ninado Saraamah kalui kaga samtam paikito gonyiigo nlailoisii manaapyii takle. 24Kabi rasam kito katam takumpii, katunii,
“Meinah hang ai hiinhii takumle,
sateichii ah mah pumtei kava hangteinii hiinhii mah hiipa takumle.
Hiinhii teinii keetule sateichii hiipa teinii huiga tule.
25Nlenii Bangpiimah samtam teinii kalui tiisupii bamle.”
Gonyii dakii tam ralipyii kalei kabi rasam tei samkang aile.
Currently Selected:
1 PITAR 1: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
