1 JON 4
4
Kasang rangii ninado kasang kasu rangii
1Lungkasyiimei, rangii hang go malum sulo, nlenii rangii hangtei Saraa datopo katu ai ajaijulo; kada- pokii kasang kasu lungkakalingmei hangkii sazyii pouryii lung tatpat takle. 2Aipiinii Saraamah rangii gotei gonyiinii tiwo buile: Jisu Kristanii pumzai pungsii gonglesii katam rangii hangtei Saraa datole; 3sateichii Jisugo mazhii kasu rangii hangtei Saraa dato makle, sateichii ai ai Kristago ngoukarou mah rangiile, mpou gong tanglesii katam mpoumah kaang kito gonyiinii shiitakle, sateichii aitoi mpou sazyii pouryii leitakle.
4Lungkasyii nahmei, gonyiinii Saraa mahle, sateichii gonyiinii ahnyiigo ngam wotakle, kadapokii gonyii dato kalei ah teinii sazyii pouryiito kalei ah sung kisii dikile. 5Ahnyiinii sazyii pouryii mahle, teijangpii ahnyiinii sazyii pouryii sam tamle, sateichii sazyii pouryiinii ahnyii sam tei shiile. 6Nyiinii Saraa mahle, Saraago katimei hangteinii nyii sam shiile, Saraamah kasumei hang teinii nyiisam shiimakle, aipii nyiinii kasangmah rangiigo ninado kasang kasu rangiigo tile.
Saraanii lungkasyii teile
7Lungkasyiimei, nyiinii hang- ninanii hangniniigo kalungsyiide, dapokii lungkasyii tei Saraa datole sateichii lungkasyiimei hang Saraa dato manaa takle, sateichii Saraago tile. 8Lungsyii kasumei hang teinii Saraago timakle, dapokii Saraanii lungkasyiile. 9Sateichii mpounah sapfii mpou fiilipiigo sazyii pouryiikii lang m-mangkapyii teipii Saraanii nyii jangpii mpoumah lungkasyii tei mangoule, dapokii mpoumah paikito nyiinii karing tei doumatu tang karam jangpiile. 10Lungkasyii ai ailung kito leile, katunii, nyiinii Sa- raago lungsyii takle katu mah makle, nlenii Saraanii nyiigo lungsyii pyiisii mpounah sapfii mpou gotei nyii kem jangpiinii pow ruimatu tang karam jangpii m-mangpyii takle.
11Lungkasyiimei, Saraanii nyiigo aiziikii lungsyiipyii leponii, nyiiniido hangninanii hangniniigo kalung- syiijyiile. 12Meikaniido Saraago ngousang ngoumakle; hangninanii hangniniigo nyiinii kalungsyii leponii, Saraanii nyii dato taksupii leile; teito mpougo lungkasyii tei nyii dato sajek gasii matwi mashang takle.
13Aipii nyiinii mpou dato ninado mpounii nyii dato taksupiinii leile katu nyiinii tile, dapokii mpounii nyii dakii mpoumah rangii sek tei pyiibam takle. 14Sateichii Pfiinii nah sapfii mpou gotei sazyii pouryiimah keikapyiipii tiisii lang m-mangpyii takle katu nyiinii ngoutakle sateichii sakchyii pyii leile. 15Jisu Kristago Saraa nah sapfii mpoulesii kata kangkanii tam mpat leponii, Sa- raanii mpou dato sateichii mpounii Saraa dato taksupii leile. 16Sateichii Saraanii nyii jangpii lungkasyii kalei tei nyiinii tile sateichii malumle. Saraanii lungkasyiile, sateichii lung- kasyii kito taksupii kalei ah teinii Saraa dato taksupii leile, sateichii Saraanii ah dato taksupii leile. 17Samtak katii piinei leimik nyiinii kamaning kamalum tei doumatu tang karam jangpii lungkasyii tei nyii dato sajek gasii tiimashang aitakle, dapodinchii mpounii ringsii kalei takumpii nyiiniido sazyii pouryii aito ringsii leile. 18Lungkasyii kito kahing gale, nlenii sajek kaga kamashang lungkasyii teinii kahing hangtei baatoile, kadapokii kahing teinii kadwi karat gonei kaswile, sateichii hingsii kalei ah- teinii lungkasyii kito matwi mashang womakle.
19Nyiinii lungsyiile, dapokii mpounii nyiigo karei kito lungsyii- pyii takle.
20Mei kata kangkanii, “Inii Saraago lungsyiile” sii tam takpokii, kangsanapiigo ngourou leponii, ahnii kachuimeile. Kadapokii ngoukalu kangsanapiigo lungsyii kasu ah teinii mikpiinii ngoukasu Saraago lung- syiipei wolakle. 21Sateichii Saraago lungkasyii ah teinii kangsanapii godo lungsyii tang karamle katu kakhatsam ai nyiinii mpou dato doule.
Currently Selected:
1 JON 4: NAG2
Highlight
Copy
Compare
Share
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.
