HLAHAI HLA 7
7
Ruatharte
1O rêng nâinu,
ni ke chu ni sendel leh khan a’rhme bâka,
kuttheithiam takhai isin angin,
ni teêlhai chu lunghlu ang a nia.
2Ni milâi irbu chu,
khuri uain tui irsam loi ang a ni,
ni phîng chu lili pârhai laia bumût ang a ni.
3Ni’rhnuhai chu sakhite inhni,
sakhipuiin te inphîr an ineihai ang a ni.
4Ni ring chu sâiha irsâng ang a nia.
Ni mithai chu Bath-rabbim dâi mikot kôla Hesbon dîlhai ang a ni.
Ni hnâr chu Lebanon in irsâng,
Damaska tianga ngha ang chu a ni.
5Ni lu chu Karmel tâng angin a’rsânga,
ni lua samhai chu patzâi irhmi ang a ni;
ni sam tâk bon bona om hi rêngin a hmu’n chu tuang zoi ngai mah.
6O lungdi, raifân ni omin,
ni hmêl khom a saa,
milung nin tâitir hen hi te na!
7Ni dung khom tûm thing angin a’rsânga,
ni’rhnuhai chu grep ra bôr angin a’rbôra.
8Kha tûm thing kha luiin,
a rahai irhmal ki nuama,
keima ta hrangin chu ni’rhnuhai kha grep ra irbôr ang a nia,
ni mirim khom apple thei mirimhai ang a ni.
Dôngmate
9Ni bâi chu uain satak ang a ni.
Khaang kha a lei nia ni’n chu,
Uain kha ki lungdi kuang luang sianlân,
a hmûr le a kehaia va luang pe ri se.
10Ki lungdi chu ki ta a nia,
keima hi a irngai tak chu ki ni.
11O ki lungdi,
hongin lân, so rama son va fe ei ti,
thingtâng khuahaia lei riak rei.
12Zînga thoiin grep irhuana son va chai ei ta,
grep rânghai so a pâr ta mo ti le dalim kunghai pârvângin mo an fîm ta tihai va en ei ti;
Khataka khan ki lung nang inkham dân hi nang pe ki ti.
13Zôlaidi’n mirimhai chu an suaa,
thei sa chi tinrênghai chu ei mikot kôla hin an oma,
O ki lungdi,
nangma ta hrangin a milui le a thar an rêngin ki sia ving.
Currently Selected:
HLAHAI HLA 7: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
