THUVÂRHAI 11
11
1Irtêna dikloi hmanghai chu Rengpa’n a hnôla;
irtêna dik hmanghai chu a lôm ngai.
2Mi lârirpâkhai chu mualinphoiin om zôi zel an ti.
Irngaiintômhai kuang khan vârna a om.
3Mi fel chu a dikna khan hruai a ti.
Mi vârirlethai chu dikloina’n irhmangtir a ti.
4Ningmurna nî sûn chu irchon sum puanin inlâpna nei ta no ni,
dikna’n chu thina ata ni hringna inzôk a ti.
5Mi sa dikna khan a hringnun an hoitir ngaia,
mi sia chu a sualna’n irhmangtir a ti.
6Mi diktak felna khan anni an zôktir ngaia,
iamom loituhai chu an huatirhamnaa an in-ôk ngai.
7Mi sia a thi’n chu a tûngna khom a thi sa ngai.
Irchona irnghat chu chanlamboi a ni.
8Mi felhai chu lungzîngna ata hrungin an oma;
mi siahai chunga a chum ngai.
9Pathian ngaisak loi mihai chong khan a tualbômhai an siat ngaia,
mi fel vârna chu mi dikhai a saninzôk ngai.
10Mi dikhai an tuanintung kârka chu khua le tui a raiinfâna,
mi siahai an thiin raifânna khêk mur mur a om ngai.
11Mi felhai satvurna’n khua chôiindômin a oma,
mi siahai chongbâi rêk chu an siattir ngai.
12Mi dang hmusit khan vârna nei maka.
Inhriatna nei mi rêkin chu a dâihrek ngai.
13Mi hmûr thiam chai chian chian ngai mi chu thu’rthup ip thei ngai maka,
lungrîl dik nei mi rêk chu a ip thei ngai.
14Irhruaina dik a om no’n chu nam ar hmang ngaia.
Mi roizêk thiam tamna chu zôkna a om ngai.
15Tukhom khual mi lâkai tuam pe hranga chonginkung chu irsîr a ti.
A thubuai a kop loi khan lungirngam riamin om a ti.
16Nupang sa’n chu mahrip a hloa,
khannisianlân, nupang om pai paiin chu mualinphoina a ni.
Mi thaboiin chu sum nei ngai maka,
khannisian mi takirtâi mi chu irchong a ti.
17Lungkham nei mi khan ama hringna hranga thil sa a isin a ni.
Mi nunrông rêkin chu ama takpum dengtheina an tungtir ngai.
18Mi siahai chu irhuangna hlo an man ngaia,
felna inthektu rêkin chu lômman an dong ngêt ngai.
19Tukhom sin sa sin tum ngit kai chu hring an ta,
tukhom thil saloi sintu chu thi an ti.
20 Rengpa’n lungrîl sual mihai kha a hnôla,
thil sa thohai chu lung a thung ngai.
21Mi siahai chu dengintheitirin om an ta,
mi felhai rêk chu zôk an ti.
22Nupang hmêl sa,
lunginchongnaboi chu vok hnâra rângachak irthei irhli ang kha a ni.
23Mi sain a inuam inthang chu satna inzen a nia,
mi siahaiin an inuam inthang an hmu’n chu mi tinrêng ningmurna a ni ngai.
24Mi tikhoi thil phalna’n ar chongtir sit sita;
mi tiksia intikna chu inriangna a ni.
25Mi tikhoi chu hong inchum pe ual mai a ta;
mi changpui ngai kakaiin changpui an dong ngai.
26A man tam hrang nghâka bu inhroitu chu mi’n khua sâl an ta,
a zuartu chu inpâk an ti.
27Takirtâi taka satna zongtu khan ngaisakna a izong a ni;
buaina hrang zongtu rêk chu ama chunga buaina tung a ti.
28Mâni irchon tûng ka chu sâla thinghnahai angin chil an ta,
mi fel rêk chu fûr thinghna angin hong indôn a ti.
29Mâni in sûng inbuaitu chu a hnungkhôna ite nei no ni.
Intohai chu mi vârhai suak chang mai an ti.
30Felna ra chu hringna a nia,
nunrôngna rêkin chu hringna a lâkpai ngai.
31 #
1 Pet 4.18
Mi fel ka chu hi irnêng chung ngeia hin lômman pêk an ni ngaia,
mi sia le thil tho’nsualtu khom dengtheina tong ngêt an ti.
Currently Selected:
THUVÂRHAI 11: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
