NEHEMIA 5
5
Inriang intak tuangna
1Khanchu mipuihai le an dôngmahai chu an urêng Judahai chunga nuarin an khêk sup supa. 2“Keinihai hi kin nâihai le kin tama, fâk nêk khom kin neia,” an tia. 3Senkhatin, “Kin tama, fâk hrang nei ma ung. Kin loihai mi kuta kin pêka,” an tia. 4“Reng kuang khazana chôi hrangin sum kin pûka, ama hranga khan kin loi le grep irhuan mi kuta bânda kin intunga, 5kin taksa laka kin urênghai taksa ang a nia, kin nâihai khom an nâihai anga om an nia: khannisian hi kin nâinuhai le kin nâipasalhai hi mi siahlo hrangin suaka kin ithunhai zoi hrang a nia: kin nâi senkhathai chu suaka an ilût zel a ni ta: a san hrang dân inhre loi, mihaiin kin loi le kin grep irhuanhai an inei a ni tâka,” iti pâl khom an oma.
6Kha ang thu hai khan an khêk irhâi kin hriatin, ki ning an mura. 7#Fes 22.25; Lev 25.35-37; Dhn 23.19-20 Khanchu ki lungrîla hiang hin ki ngaituaa, mi sahai le roirêltuhai laia khan, “Mi tinin nin urênghai sumsût omin nin inpûktirhaia,” ki tia. Khan an chungthu ngaitua hrangin mi ki bukhaia. 8Anni laia, “Nam danghai laia zuara om, kin urêng Judahai chu thei lalamin kin irtanhaia; nangni’n nin urênghai zuar nin itum a ni mo? keini kuanga hin zuar an ini thei hrang ma ni?,” ki tia. Khanchu an dâihreka, a sâmna lam ite inhre mahai.
9“Nin sintho hi a isa viat loi a ni; kin râlhai nam danghai insîrinsiatna sikin kin Pathian ngîka nin iom mo ni ma? 10keima le ki urênghai, ki ruathartehai khomin khaang khan a sût omin sum kin inpûktirhai a ni, a sût oma ei itho hi masan ta ei ti. 11A vuan sûn ngêt hin nin loihai, grep irhuan, oliv irhuan, an in le sum, an bu le uain, sahriak hmun irzakhat sûnga hmunkhat nin ilâk ngai khom kha pe nôk ving ta roi,” ki tia.
12Khanchu anni khomin, “Pe nôk ving ta kin ti, anni ata ite irdon loiin, ni iti ang lam takin tho kin ti,” an tia. Khanchu ochaihai ki koihaia, an kuanga an chonginkung ang lam taka pe hrangin khomâk ki’rsâmtirhaia. 13Ki puanbom chu kin thika, “Hi chonginkung anga tho loihai chu Pathianin a in ata le a sin thôna ata hiang hin inthikpai ri se; inthikpaia omin, a korongin om ri se,” ki tia. Khan a hong irbukhai murdi’n, “Amen,” an tia, Rengpa an inpâka. Khan mipuihaiin kha chonginkung ang tak khan an tho tâka.
Nehemia irphalzia
14Kha ti no khomin Judai rama annihai optu hranga inkung ki ni ata, rêng Artazerzia kum sômhni an lal ata kum sômthum inhni an lal kum dênin, kum sômhleihni sûng chu kei le ki urênghaiin ram optu bu vai la ma unga. 15Khannisian matona ram optu chu a le’rchong oka, tangka sekel sômminli tep loiin, an bu le uainhai an lâk pehaia; a hnung le a mân tianga siahlohai chu an inlal oka; khannisian keima’n chu Pathian chitna’n khaang khan tho ma unga. 16Hi kul sintho hrang hin ki om maia, ram khom ite ircho ma unga; ki ruathartehai khom sintho’n kha hmuna khan an iom a ni. 17Kha vai kha ni loiin, kin kôla nam danghai lai ata honghai tep loiin Judahai le roirêltuhai laia ki bu khalâi ottuhai chu mi irzakhat sômringa om mai an ni. 18Khan sûn khata fâk hrang khom sehrâtchal inkhat le kêlbelra kiruk a sa tatak a nia; khan keima hrang khom âr an that saa, sûn sôm dan uain chi dadang tam uala in a nia; kha dôr khan sinsiamhai khomsian, hi mihai ituang hi an takin, ram optu ni hi ki irphu loi a ni. 19O ki Pathian, hi mihai hranga ki sintho murdi hi, ki sa theina hrangin inhre mai roh.
Currently Selected:
NEHEMIA 5: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
