NAHUMA 2
2
Ninevi siat thu
1Sukkhoi irnôitu kha ni makunga a zuang chum e: kulpui kha enkolin lân, lampui kha enkol ro; ni kong inngartirin lân, ni sinthotheina kha hrât takin siam insa ro. 2Israelhai roiinpuina angin Jakoba-hai roiinpuina kha Rengpa khan an dingtir nôka: inrongtuhai khan anni kha an inrong zoi tâka, an Grep ônhai kha an insiat zoi tâk a ni. 3A mi hrâthai pho kha thisen a nia, mi huaisenhai kha sen inlârin an irbela; an irsinsiamna nîa khan tâlihai kha kâpa thîr irtêkin a’rtêk zor zora, ufeihai kha irkhêl takin a’rtêk zor zor a ni.
4Tâlihai kha kholaia an intân mur mura,
lamlian irzathai khan an irsuk mer mura:
meiser angin an inlanga,
kôlirlek angin an intân zut zut a ni.
5A mi lianhai kha a koi suaka:
an fe’n rual kha an tûka;
kul bang tianga pan kha an irhnota,
thil irdîpna hrang an siama.
6Vadung mikothai kha inhong a nia;
rêng in kha inboipaiin a oma.
7Khan, rêngnu Huzzabi kha korongboiin an rotpuia;
a suaknuhai khan an rôp irchûmin vasu
inkur ang dênin an chapa.
8Tianlai ata kha Ninevi khua hi chu dîl ang a nia:
khannisianlân an intân irhmanga;
ngîr roi, ngîr roi, tiin an khêka;
khannisian tûte irheikîr mahai.
9Sumru sumhai kha lapai unglân,
rângachak sumhai chu lapai pehai roi.
Thil irtikkhôm le bungrua sa murdi roiinpuizia khan mong nî nei mah.
10Inrongtirin a oma,
a rong chiana, a iram a ni:
an milung kha a zôi tâka, an irkhûkhai kha a ngara,
An konghai khom a na zit tâka,
an hmêlhai khom a dông zoi zit tâka.
11Tûte inchitir loia an oma,
kâmkeibaknei chalhai,
kâmkeibaknei puihai,
kâmkeibaknei têhai an ichai vêlna,
kâmkeibaknei irbu zôl le kâmkeibaknei têhaiin an fâkna hmun kha khôn mo a ini?
12Kâmkeibaknei chal khan a têhai ruk dôr an pot irnôia,
kâmkeibaknei puihai hrang a sê thata,
a khurhai kha saruakin an siptira,
a’rbu zôlhai kha saruak inpot irnôiin.
13Sipaihai Rengpa khan, “Irngai ta, nang ki doi a ni, a tâlihai kha hâl khu ûl ûl ki ta, ni kâmkeibaknei têhai kha khandaiin irhmangtir a ta: khan, irnênga ni sa sê hi inmongtir ki ta, ni palaihai irhâi kha inhriat ni ta no ni,” a tia.
Currently Selected:
NAHUMA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
