MATHAIA 27

Pilata kuang Jisua an hruai

(Mk 15.1; Lk 23.1-2; Joh 18.28-32)

1Zîng tiang inmân taka Ochai inlalhai le vântâng upa murdihai khan Jisua that hrang dân an rêla. 2An khita, an tuanga, Pilata, Rom Ramoptu kuang an pêk tâka.

Juda thi thu

(Tîr 1.18-19)

3An cheltirtu Juda khan Jisua kha thiamno an changtir ti an hriat le ar sîra, sum sôm thum kha Ochai inlalhai le upahai a pêk khîrhai nôka.#Tîr 1.18-19 4“Mi fel thi hrangin kin cheltir kha ki lei tho insual a ni,” a tia. Anni khan, “Kha kha kin ta hrangin imo a poina om? Nangin ni nuam nuamin lo roh,” an lei ti pea. 5Khanchu, sum kha Tempila a pai inlûta, a fea, a va irkhâi that tâka. 6Ochai inlalhai khan sum kha an lâka, “Hi hi Tempil suma sia chu irthiang mah, thisen man kêng a ni,” an tia. 7Khanchu an chonga, mikhual phûmna hrangin bêl suktu hmun an lâk tâk. 8Khasika khan, kha hmun kha, atûn ten “Thisen Hmun,” an ti mai tâka. 9Khanchu deipu Jeremia’n,

“Israel nâi tuhaiin mo,

sum sômthum an tepa,

a man kha an lâka,#Zak 11.12-13

10Rengpa’n thu a ipêk ang khan,

Bêl suktu hmun man hrangin sum kha an hmang ta,”

a iti kha a hong idik tâk a ni.

Pilata’n Jisua chongirdon a pêk thu

(Mk 15.2-5; Lk 23.3-5; Joh 18.33-38)

11Jisua kha Rom ramoptu#27.11: Ramoptu ti hi Governor tia ei lei ihmang ngai kha a ni. makunga a ngîra, ramoptu khan, “Judahai rêng mo ni ni?” tiin ar dona. Jisua’n, “Ki ni,” tiin a sâma. 12Khannisianlân, Ochai inlalhai le upahaiin an isêlna thua chu ite khomin sâm mah. 13Khasikin Pilata’n a kuang, “Nang an isêlna thua hin ni inhriat loi ma ni?” a tia. 14Khannisianlân, Jisua’n bâikhat khomin sâm maka, Ramoptu chu a sân ar ngai a’rkhêl tâka.

Jisua that hranga thupêk

(Mk 15.6-15; Lk 23.13-25; Joh 18.39—19.16)

15Khan, Rom Ramoptu khan Ferkân kût zoro rikipin mi intâng inkhat mipuihaiin an iti tak an sua pehai ngaia. 16Kha laia khan mi intâng irhming Barabba an iti kha a oma. 17Khasikin mipui an hong irbûmin Pilata’n an kuang, “A tu hi mo nangni insua pe inlân nin inuam? Barabba hi mo, Jisua, Mesia an iti pu hi mo?” tiin ar donhaia. 18Juda irchamneipuhai khan Jisua kha an hnarsa sika a kuta an hong ipêk a nih ti fel takin an hriata.

19Khan Pilata kha roirêl hmuna a toi laiin, a dôngma’n, “Kha mi fel chunga khan ite tho no roh, zânin ki’rmangin ama sikin ki ituang ok kêng,” tiin he a bêa. 20Ochai inlalhai le upahaiin Barabba kha insuaa, Jisua that hranga Pilata ngên hrangin mipuihai an inthêmhaia. 21Khannisianlân, Pilata’n mipuihai kuang, “Hi mi inhnihai laia hin tu hi mo nangni insua pe inlân nin inuam?” tiin ar donhaia. Anni khan, “Barabba,” tiin an sâma. 22Pilata’n an kuang, “Khan Jisua, Mesia an iti hi imo ki ilo hrang tâk?” tiin ar donhaia. Anni khan, “Krosa hembe roh,” an tia. 23Khannisianlân, Pilata’n an kuang, “Imo a itho insual,” tiin ar donhaia. Khanchu, anni khan, “Krosa hembe roh,” tiin an hrât do dôrin an khêka.

24Pilata’n i ang khomin ite ar fêna om no nia, buaina vai kêng a isuakna hrang ti an hriatin chu tui a lâka, mipuihai makunga a kut a’rsûka, an kuang, “Hi mihriam, thina hin ite mophurna nei ma ung! Ama hi nin nuam nuamin lo ta roi,” a tia.#Dhn 21.6-9 25Mipui murdi’n, “Hi mi thisen mophurna chu keini le kin nâihai chunga tung ri se,” tiin an sâma. 26Khanchu, Pilata’n Barabba kha an sua pehai tâka, Jisua kha sipaihai an zêmtir zoiin, Krosa hembe hrangin an kuta a pêkhai tâka.

Sipaihaiin Jisua an soisak

(Mk 15.16-20; Joh 19.2-3)

27Khanchu, Pilata sipaihai khan Jisua chu Ramoptu omna praitoriana an hruaia, an pâla mi murdi a kôlvêla an irbuka. 28A puanhai an hlîk pea, puan senduk an insiltira. 29Khanchu, ilhling lukhum an phana, an inkhumtira, a kut chang tiang khianghrol an inchôitira; a makunga khûksadelin, “Judahai Reng, hring sôt roh!” tiin an innuisana. 30An inchila, a khianghrol kha an suta, a lu-a an zêma. 31Khan, nuiza siamna’n an hmang zoiin chu puan senduk kha an lâk nôka, ama puan ngêt kha an insiltir nôk ta. Khanchu, Krosa hembe hrangin, an hruai ta.

Jisua hembea a om thu

(Mk 15.21-32; Lk 23.26-43; Joh 19.17-27)

32Khan, an fe laiin Kurini kho mi inkhat ar hming Simona an hmua; Sipaihaiin Jisua Kros irput hrangin an dândea. 33Golgotha, “Luru hmun,” an iti kha an va tunga. 34Khan Jisua chu uain, thil khâ leh irpol an pêka, khan, a’rtem zoiin chu in nuam ta maka.#Ipn 69.21 35Khan, Krosa an hembea, khanchu, tasânin a puansilhai an irsema.#Ipn 22.18 36Kha hnung chu, an toia, an nghâk tâka. 37A lu chunga an sêlna irziak, “Hi mi hi Jisua, Judahai Reng a ni,” tiin an inkhopa.

38Khan, ama pâlin inru inhni an hembe saa, a chang tiang inkhat, a vei tiang inkhat.

39Khan, ar lôi murdi’n an lu inthikin Jisua an êroa.#Ipn 22.7; 109.25 40“Tempil insiat ni ta, sûn thum niin inding nôk ni ti na! Pathian Nâipa ni ni’n chu, ni bingin zôk roh! kros rêla irthokin zuang chum ta roh!” an tia.#Mt 26.61; Joh 2.19 41Khaang dênin Ochai inlalhai le Dân irchutirhai le upahai khomin ama an êroa: 42“Mi danghai lak an zôk ngaia, ama chu zôk thei maka! Israelhai rêng mo ni ma? Atûn hin kros rêla irthokin zuang chum sian chu iam ei ti! 43Pathian a iama, Pathian Nâipa’n a’rbêa; Tho lei en rei, Pathianin an zôk nuam mo?” an tia.#Ipn 22.8 44Hrâtlâksong ama pâla an ihembehai khom khan khaang dênin an êroa.

Jisua thina thu

(Mk 15.33-41; Lk 23.44-49; Joh 19.28-30)

45Khan, sûn dâr sômhleihni ata khohloi dâr thum ten chu rammual a zîng khak tâka. 46Chohnung dâr thumin chu Jisua kha hnuk irhai inring takin a khêka, “Eli, Eli, lema sabakthani?” a tia. Kha kha “Ki Pathian, Ki pathian itho mo ni ni imâksan?” tihna a ni.#Ipn 22.1 47Kha hmuna ngîr senkhathaiin ama kha an inhriatin, “Elija a ikoi kêng,” an tia. 48Khanchu, an laia mi inkhat an tân zôia, sponj a lâka, uain thûra an chiea, khianghrolin a târa, Jisua kha in intir a tuma.#Ipn 69.21 49Khan, mi danghaiin, “Dâihrek roi, a san hrangin Elija mo a zuang lei en rei,” an tia. 50Jisua kha hnuk irhai inring takin a khêk nôka, a hrang a chat tâka.

51Khanchu, tempil sûnga puanzâr kha a chung ata a mong dênin a têr thai ta. Kha hnung chu irnêng an hnînga, lungpuihai an koia,#Fes 26.31-33 52thânhai an hong irhonga, Pathian mi tamtak a thi tâkhai, taksa kha kaithoiin an oma, 53Thânhai kha an mâka, Jisua, thina irthoka thoinôk hnungin khopui irthianga an lûta, kha khan mi tamtak kuang an inlâr ta. 54Sipai sâp le a kuanga sipai om Jisua thîrhai khan hnîngnupui inhnîng le thil omzia kha an hmu’n chu, “Hi mi hi Pathian Nâipa a ni lele hi te!” an tia. 55Kha hmuna khan nupang tamtak, Galili rama irthoka Jisua hnung zuia, a ichangpui ngaihai khan hla vit ata an thîra,#Lk 8.2-3 56Khahai kha Mari Magdala hai, Mari, Jakoba le Josia nu Mari hai an kop saa, Zebedaia dôngma khom a kop sa a ni.

Jisua an phûm thu

(Mk 15.42-47; Lk 23.50-56; Joh 19.38-42)

57Khan, khohloi a hong ni’n chu, irchongpa Arimathaia kho mi, ar hming Josefa a hong tunga; ama khom kha Jisua irchutir a ni saa. 58Kha mi kha Pilata kuang a va fea, Jisua ruak chu a va nghia. 59Pilata khan a phala. Khanchu, Jisua ruak kha Josefa khan, puan irnêm fâi takin a tuama, 60ama thân, lunga inver zoi phinga khan an zâl ta. Khanchu, thân bâi kha lung lian takin a sîng zoiin chu a fe tâka. 61Mari Magdala le Mari dang kha thân tiang nghain an toia.

Thân nghâkhai

62A tûk zîng, Sabat ni sûna Ochai inlalhai le Farisaihai kha Pilata kuang an honga, 63a kuang, “Ka pu, kha milakpa khan a hring laiin sûn thum hnungin chu thoinôk ki ti,” a iti kin inhriat.#Mt 16.21; 17.23; 20.19; Mk 8.31; 10.33-34; Lk 9.22; 18.31-33 64Khasikin thân kha sûn thum sûng chu sataka nghâk hrangin thu pe ro, khano’nchu a irchutirhai kha hong an ta mipui laia, ‘Thina irthokin a thoinôk tâk,’ tina an ti. khano’nchu hi thêmna hnungkhôn hi matona nêkin a isiat ual hrang kêng,” an tia. 65Pilata’n an kuang, “Sipai nin inei mo ni ma, fe unglân nin thei la lamin inhrungtirhai roi ba,” a ti pehaia. 66Khanchu, an fe a, thân lung kha irsinsiana siain, a nghâk hranghai kha an innghâktirhai tâka.

Currently Selected:

MATHAIA 27: HRACLBSI

Highlight

Copy