JONA 2
2
Jona lômthu hril chongchaina
1Khan, Jona kha nga phîng sûng ata kha, Rengpa a Pathian kuanga a chongchaia.
2Hiang hin a ti: “Kin takna sikin Rengpa kha ki koia,
Ama’n a ni sâma;
Seol phîng sûng ata kin sama,
Nangin ki’rhâi nin hriata.
3Inthûk taka, tuikhanglian sûngrîla khan nangin ni ni pai lûta,
Tui irsok le ni tui irsônhai murdi khan a ni vur thiaia.
4Khan, ‘Ni mithmu ata pai suak ki nia;
Khannisianlân, ni biak in irthiang tiang irhei nôk ki ta,’ ki tia.
5Tuihai khan ki hringna dênin a ni hual vêla;
Tui inthûk kha ki vêlin a oma;
Sûlhai khan ki lu a ituam vêl a ni.
6Tâng bul tôp rêthaia khan ki chuma;
Irnêng khan kumkhua hrangin a fenahai khan a ni khâr khuma;
Aniachu nangin, O Rengpa ki Pathian,
khurpadop ata kha ki hringna ni ilâk suak a ni.
7Ki hringna ki sûnga a’rzal lai khan,
Rengpa kha kin hriat maia:
Ki chongchaina kha ni biak in irthianga ni kuang a zuang itung a ni.
8Thil chanlamboi milak mai mai ngaisaktuhai khan anni iamomna kha an irheisan a ni.
9Kei rêkin chu lômthu insîrna irhâi leh ni kuang irbôlna inhlan ki ta;
Thu ki inkung tak kha hlensua ki ti.
Saninhringna kha Rengpa ta a ni,” tiin.
10Khan, Rengpa khan nga kha thu a pêka,
Jona kha muanga a hong insuak tâka.
Currently Selected:
JONA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
