JOELA 3
3
Namhai chunga Pathianin roirêl a ti
1“Irngai u ta, kha nikhuahai le kha zoi tika chu Juda le Jerusalem inding nôk hrang tika chu, 2nam murdi buk khôm ki ta, Jehosafata#3.2: Jehosafata ti hi “Rengpa’n roi a rêl” tihna a ni. irhôra hruai ki ti. Ki mi, ki’rchon dongtum Israel chunga an thiltho sikin an chungthu rêl ki ta; ram danga ki mihai an indartira. 3Tasânin ki mihai an irsema; nâipanghai kha nupang pasalin notizuar le uain lâkna hrangin an zuara. 4#Isa 14.29-31; 23.1-18; Jer 47.1-7; Ezek 25.15—28.26; Amos 1.6-10; Zef 2.4-7; Mt 11.21-22; Lk 10.13-14 Nangni Tura le Sidon, nangni Filistia ramhaio, ki chunga phubâ lâk nin itum ma ni? Ki chunga phubâ lâk nin itum a niin chu inrang takin nin chunga phubâ la kîr nôk ki ti. 5Ki tangkarua le rângachak nin lâka, ki thil satak inditomhai nin biak in sûnghaia nin chôi lût sa tâka, 6Juda nâihai le Jerusalem nâihai khom an ramri ata hlataka nin sonpai theina hrangin, Grik nâipahai kuang nin zuar lik tâka. 7Irngai u ta, nin zuarna hmun ata kha kaiharin insuaktir ki ta, nin thuanna kha nin lu chung ngeia thuanna ki ti; 8nin nâipahai, nin nâinuhai kha Juda nâihai kuta zuar ki ti, anni khan hlataka Seba mihai kuang, anni kha zuar an ta”: Rengpa khan a iti tâk a ni.
9Hi hi namhai laia inpuang unglân; irdoina sinsiam unglân: mi hrâthai inphût unglân; irdoi mi murdihai hong nâiin hong kâi ri sehai. 10#Isa 2.4; Mik 4.3 Nin irnêng âlkaina hmor irzumhai khandaiin incher unglân, nin thei kung tanpaina chemtehai kha ufeiin incher roi: mi hrât loi khomin, “Ki hrât a ni,” ti ri se. 11A kôla nam murdihaio, hong irhnot unglân, pung khôm roi: O, Rengpa, kha khan ni mi hrât takhai kha infetirhai roh. 12Namhai kha irphût irhlômhai sian, Jehosafata khurpadopa khan hong kâi ri sehai: kha khan a vêla nam murdi chunga roirêl hrangin ki itoi hrang a ni. 13#Thup 14.14-16,19-20; 19.15 Nin kôite kai dok unglân, bu ât zoro a ni tâka: hong unglân, hong sirpha roi; grep sômna khur kha a sipa, bêlhai kha a sip lêta, a sân an sual sikin. 14Mi sâng tamtakhai kha Jehosafata irhôra an om khôm ta; kha khan a ni, Rengpa nikhua zuang tung hrang a ni. 15Misa le thahai an inthima, ârsihaiin an vârna an thupa.
Pathianin a mihai satvur a ti
16 #
Amos 1.2
Pathianin a mihai satvur a ti. Khan, Rengpa kha Zion tâng ata inrûm dur dur a ta, Jerusalem khua ata ar hâi insua a ta; irvân le irnêng inhnîng a ta: khannisianlân Rengpa kha a mihai ta hrangin irsûnghualna ni a ta, Israel irchihai hrangin kulbang ni a ti. 17Khanchu Rengpa nin Pathianin ki tâng irthiang Zion-a lêng ki nih ti inhria nin ti: khanchu Jerusalem khua kha irthiang a ta, nam dang mi’n inhnê viat ta no nihai.
18Kha nikhuaa khan hiang hin hong ni a ta, tâng irsânghai khan uain thum inzungtir a ta, tânghai kha irhnutuiin luang a ta, Judai ram vadungte murdihai kha tuiin luang a ta: Rengpa in ata tuihnâr zuang pût suak a ta, Sitim irhôr irziltir a ti. 19Juda nâihai chunga saloi taka thoa an rama mi thiam thisen an insua sikin, Aigupta ram kha hong ram a ta, Edom ram kha ramchâr ram chârkhohroi nih a ti. 20Judai ram rêk chu kumkhua’n om mai a ta, Jerusalem khua kha irlo tin tin dênin. 21Khan, an thisen ki infâiloi kha infâi ki ta: Rengpa kha Zion-a a om mai sikin.
Currently Selected:
JOELA 3: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
