ISAIA 9
9
Reng hong om hrang
1 #
Mt 4.15
Chardong taka omhai hrangin chu ngûina rêng rêng om ta no nia. Tianlai khan Zebulun le Naftali ram chu, hnuaisia om tak a nia, zoro hnungkhôna chu la roiinpuitir a ti, tuipui kôl ata Jordan varâl Galili ram, Jentailhai omna ram chu. 2#Mt 4.16; Lk 1.79 Inthim hnuaia omhai namin chu, vâr roiinpui tak an hmu tâka, raminthim taka omhai hrangin khua a hong vâr ta. 3Kha namhai kha nin punghaia, an raifânna khom nin pung pehaia, bu ât le râllâk sum sem laia an raifânna angin, ni makunga hin an râi a ifân a ni. 4An puak pêlna ringkolhai le an thil inkhôna funghai chu, irdô tuanga vîkna hmolhai leh khan, Midian-hai an inhnê nikhua ang khan, ni tho pehaia. 5Sipai hongna rup rupa kekokhai chu, an tukfam thisen kâi neng nungin hâl a nia, a kâng zoi ta. 6Ei ta hrangin nâi a zuang suaka, nâipa pêkin ei oma, a dârsuama roirêlna irnghatin, A’rhming khom Irkhêl, Irfûktirtu, Pathian Hrât, Kumtuang Pa, Irngeina Rêng ti an ti. 7#Lk 1.32-33 A ram irzat thiai a ta, a ram sûnga irngeina’n hek nî nei no ni. Thudik hmanga fel taka roirêlin Davida Rêngtoihmuna toi a ta, indettir a tih, atûn ata kumkhontuangin. Rengpa sathnem irngaina khan, kha kha a itho hrang a ni.
Rengpa’n Israelhai hremhai a ti
8 Rengpa’n Jakoba irchihai demin thu a hrila, Israel mihai khom a huap sa a ni. 9“Efraima le Samari mihai khomin, hi hi a itho a nih ti lan hria an ti. Lârirpâkin an irsong khak ngaia. 10Pilrôngar bang chim khom sianlân, lung ngar sinsiamin irchuanhai ei ti, theipui thinghai kha sâtpaiin om khomsian, Sidar thinghaiin thûlpai ei ti,” tipuhai khan lan hriat an ti.
11 Rengpa’n râl an phûthaia, anni irhual hranghai khom. 12Nisua tianga Suria, nitâk tianga Filistia Israelhai doi hrangin an bâi an âng khumhaia. Kha dôr khom khan Rengpa ningmurna hek maka, a kut a la irlek mai a ni. 13Israel namhai chu anni soisaktuhai tiang kîr nuam loiin, itinrêng Rengpa kuang tiang fe nuam mahai. 14Khasikin kêng Israelhai lu le irmei chu sûn khat sûngin Rengpa’n a itanpai pehai a ni. An tûm ôn le hnâhai khom a lâkpai pehai, 15an luhai chu an ulian songhai an nia, an irmei chu deipu minlak tho ngaihai hi an ni. 16An nam hruaituhai hin an hruai insualhaia, an ihruaihai khom an irhmang zoi tâk a ni. 17Pathian inhre loiin, thil sual an thoa, an thu phorsuakhai lak, a nikhua ni pehai maka; khasikin an ruathartehai khom a ihôihai loi, farahai le meithâihai khom inrenhai loiin, kha dôra ni khomin Rengpa ningmur chum maka, a kut a la inlek mai a ni.
18Sual hi hloitharpa le ilhlingnei kâng theitu mei ang a ni. Rampui hnuaia sûlhai khom a kâng theia, a ikhu hlut hlut ngai a ni. 19Itinrêng Rengpa ningmurna khan, ram chu an kângtira, mihriamhai chu hâl hranga irtikkhôm mai mai an ni. Tûte mâni urênghai khom san thei loiin; 20an chang tianga mihai huangin fâk an zonga, an phîng a la châm pehai mai ngai. An vei tianga mi khom an fâka, khop inhre ual mahai, an nâihai khom an fâka. 21Manasea le Efraima mi an irdoia, Juda irchihaiin an tuang uala, khaang dôr a ni tâk khomin Rengpa ningmurna chum loiin, a kut a la inlek mai a ni.
Currently Selected:
ISAIA 9: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
