ISAIA 5
5
Grep irhuana hla
1 #
Mt 21.33; Mk 12.1; Lk 20.9 Ki inuamtak ta hrangin hla hong sak ki ti,
Ki inhroi tak grep irhuan hla chu.
Ki indit takin grep irhuan a nei ta,
Mual chung le irnêng sana taka khan.
2Khur a choia, lung irkhamin,
grep sa zât chi a phuna,
A laia a enna hrang irpuk a siama,
Grep tui sômna hrang khur a choia;
A ra irchang a nghâkhmoa,
a hong ra’n chu a dol an ni vinga.
3Jerusalem le Judai rama mihaio, Grep irhuan le ei irhla lam dân hi, hong ngaitua ta hi roi. 4Ki insâp nêka tam ki grep irhuana, Imo ki la insâp mai hranga? Grep ra sa hmu ngêt hrangin ki tuma, a dol inzenin a ni ra pea;
5Itin ual takin mo ki la isoisakhai hrang? Nang hong hril nôk ki ti, a dôn chin ki ta, inramtir ki ti, a dôn irdoihai insiatpai ki ta, ramsahaiin sirpha an ti. 6Mapai ki ta, a ôn sât ta no ning. A hmun khom chuan infâi ta no ning, hloi ilhling neiin sip zoi a ta, sûmhai thu pe ki ta, rua inthotir ta no ning. 7Itinrêng Rengpa irhuan chu Israel in sûng mihai hi an nia, Judai rama mihai hi a inhroihai tak chu an ni. Diktaka roirêl sabeiin, mi that an nuam ngaia, khannisian chardonga an khêk irhâi a hmu intamhai ta.
Mi sintho saloi
8Mi danghai nêka, tam ualin, irhuan hmun lian thohaio, nangni intak pe a ti. Tûte irleng ta no nihaia, beidong tuangin nin bingin la om nin ti. 9Itinrêng Rengpa’n ki mikuar inhriata hin, “Hi in lian le satak takhai hi, ram zoi a ta, a lua hrang mi om no nihai. 10Grep irhuana a ra tîn sôm suakna hmuna, tîn hni vai a ra hmu ni ti, phur sôm suakna hmuna, phur khat vai ra suak a ti,” a ti. 11Zînga zu hrût phutin, zân sôta inrui ngaihai chu, intak pehai a ti. 12Zu hmuna serânda le perkhuang hmanga, têngrep le belemhai hmanga, zu inruia omhai chu, Rengpa sintho en nuam loiin. A kut sintho khom en nuam loiin. 13Ki mihaiin an inhriat nuam no sikin, sala intâng ngêt an ti. An milianhai phîngchâmin thi an ta, mipui vântânghai khom tui inhrâlin thi an ti. 14Mi thi khuahaiin an lei nghâka, an bâi an lei âng khum mai. Jerusalem songa milian le michînhai raifân taka omhai chu an ngûi zoi ta, 15Mi lian le mi chîn irhnuai ving an ta, tukullianhai dok an ti. 16Dik takin roi a rêl sikin tinrêng Rengpa chu chôiindômin om a ti, thil diktaka Pathian irthiangin, a’rthiangzia inlangtir a ti. 17Khanchu an lêngna hmuna belrahai an irhmang ngai angin, hmun ramna hmuna sûlhai chu kêlin fa an ti.
18Sual ata irdînthei loihai, suala irlet nuam loihai chung chu rik pehai a ti. 19Hor hnothai sian kin hmu theina hrangin, hong tho lat ta ri sehai, Israelhai mi irthiangin a thiltum chu, ei inhriat theina hrangin, zuan tungtir ta ri se, tituhai chu. 20Thil sual le thil sa thoa, thil sa le saloi thoa, a vâr chu a zîng anga bêin, a zîng chu a vâr anga irngaiin, thil thum chu a khâ a tia, thil khâhai a thum tituhai chu, 21An binga ki vâr irtia, fel irtihai ngai chu an chung rik pehai a ti. 22Zu ina pasal sa! zu sangol irveia hrânghai chu, an chung rik pehai a ti. 23Fâkinrûk lâkin mi sual a sa inchangtir nuamhai ngai, mi sahai chu saloi an inchangtir ngai. 24Annihai sika hin meiin fapôl a ikâng angin, ilhling a ikâng inhek angin, an irzunghai kâng inhekin, an sa lai takin hek zoi a ti; itinrêng Rengpa dân chu zôm loiin. Israelhai mi irthiang an hnôl sikin. 25Khasika khan a nih Rengpa ningmurna chu mihai chunga a zuang itung a ni. A kut irlekin a vîkhaia. Khanchu tânghai hi inhnîng a ta, mithi ruak chu sahrok angin, kholaidunga irthek rumin, kha dôr khom khan a ningmurna hek ual maka, a kut a la thâk maia. 26Rengpa’n ram hlataka omhai hrang, irsinsiana a târ suaka, kôlkil dêna mi ikoi irhâiin a koia, irhnot takin a hong ta so. 27Sôl reng inhre loiin, irtet khom irtet loiin, a inuam khom om loiin, a in khom mu pe ngai mah, kongkhit sût khom om loiin, kekok hrui sût khom om mahai. 28An thalhai chu a’rzum insa pehai, an thal ngul khom irfûk saiin an chôia; an sakor ke mitinhai khom ngaih tak a ni, an tâli kehai khom kêllaiher angin a’rhêl dût dûta. 29An khêk irhâi khom kâmkeibaknei inrûm ang a ni, an sa sê lai chu inrûm pumin an irputpaia; tûte sut thei zât ni mah.
30Kha zoro kha a hong tungin chu, tuikhanglian irhâi nêka siatin Israel ram sûnga la hong irsok siat a ti. Ramhai chu chardong le lungzîngna’n a sipa, vâr chu zîngin a’rkhu zoi tâka.
Currently Selected:
ISAIA 5: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
