ISAIA 3
3
Jerusalem buaina
1 Rengpa, itinrêng Rengpa’n Jerusalem le Judai ram ata, an irnghatna tinrêng a lâk thiai a ni ta, An itûng bu le tuihai khom, 2An pasal sahai le an mi hrâthai khom, roirêltuhai, deipuhai, kutzia entheihai le sipaihai, 3sômringa hruaituhai le an isong ualhai khom, ni ihmanghai le dôi theihai, tasân theihai a lâkhai thiai ta, 4An hruaitu hrangin nâipang sia ki ta, an chunga nâipanghaiin roirêl an ti. 5Mipui ir-ep sup sup an ta, pasal le pasal irsual an ta, rual le rual irdoi an ti. Ruatharhaiin an ulianhai chitna nei no nihaia, mi chîntehaiin mi inzakomhai ite bêin bê no nihai.
6Mihaiin an urêng an pa ina om chu chel an ta, “Nang chu sil le kai chu ni neia, kin hruaitu ni chang pe’n lân, hihai ang hi, ni kuta om ri se,” la ti an ti. 7Kha ni tena chu ama’n sêlhai a ta, “Hihai hi ensuihai thei no ning, bu le sil le kai nei ual ma ung, mipuihai hruaitua chu ni siam no roi,” la ti a ti. 8Jerusalem chu a ichim a ni ta hi, Judai ram khom a isiat zoi a ni ta. Rengpa doiin an chonga, sin an tho ngai a ni, a roiinpuina an êsêl sikin. 9A nuama omin, an thei loina an langa, Sodom mihai angin an sualna mualinphoitirin, irthup thei ta mahai. An chung a rikin, a binga siatna an intungtir a ni. 10Mi sahai laia chu, “Nin tho insa, nin sinthôna ra ât nin ti,” ti unglân; 11Mi sualhai chung chu a rik, an siat hrang sikin. An itho angin an chunga khom tho ni a ti. 12Ki mihai hrungtu chu nâipang an nia, nupanghaiin an chunga roi an rêla; an ihruai irhmangtir a ni, fena hrang lampui inhre loiin, nin ibuai a ni ta.
Rengpa’n a mihai roi a rêl
13A mihai sual târinlang hrangin Rengpa ar siam ta, an chung thu rêl hrangin a ngîr ta. 14Rengpa’n an ulianhai le an hruaituhai chung thu a hong rêla. Nangnihai hi grep irhuan inram zoitu nin ni, mi inrianghai thil nin lâka, nin ina nin bukkhôma. 15Ithoa mo hianga ki mihai nin isoisakhai, mi inriang an ineisun nin lâk pehaia? Rengpa, tinrêng Rengpa thu suakin a ti.
Jerusalem nupanghai irchûna
16 Rengpa’n hiang hin a ti: Jerusalem nupanghai chu an irpâk bâka na! ir-ân otin an fea, an mit leh mi an kâp thiaia, silniang irhâi sirim sirim tiin an ke an thîna. 17Rengpa’n Zion nupanghai lu inpântir a ta, Rengpa’n korongin inomtirhai a ti.
18Kha ni tena chu Rengpa’n an tukfam sahai kha la pai pehai a ta; an irtheihai, an samkhithai, an samkilhai, 19an kuarkâihai, an hmâi huinahai 20samkhit, bânhrial, kongkhitnahai rimhoi sianahai, an tâbithai, 21kutsabihai, hnâr irvônahai, 22songkol irfualhai, puanhai, songkolphal le kuta chôi zât, 23hlîmenhai, puan irphânhai, diarkai zât hai, le irvôna danghai sutpaihai a ti. 24Mirimhoi irthûlin mirimsia, kongkhit irthûlin hruihrual, sam tam irthûlin sam kol, tukrivo sa irthûlin bora puan, hmêlsa irthûlin hmêlsia an dongtum ni a ti. 25Ni mihai chu khandaia tuk that ni an ti, ni mi hrât inthanghai khom irdoina hmuna thi an ti. 26Kho sûnga hruaituhai khom chap khêka inrûmin om an ta, kho sûnga mihai khom korongin toi ta an ti.
Currently Selected:
ISAIA 3: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
