ISAIA 2
2
Kumkhuaa irngeina
(Mik 4.1-3)
1Judai ram le Jerusalem chungchânga Amoza nâipa Isaia’n Rengpa Thu a idong chu: 2Zoro hnungkhôna chu Rengpa in omna tâng chu, tâng roiinpui tak ni a ta, tâng tinrênghai khêl a ta, Nam tinrêng hong nuam an ti. 3Mi tamtak hong an ta, hiang hin ti an ti, “Tho Rengpa tânga son fe ei ti, Jakoba Pathian in omna son, a lam ni le’rhmu an ta, a lampuia khan fe ei ti,” Zion ata dân hong suak a ta, Jerusalem ata hi, Rengpa’n thu a ihril ngai a ni. 4Nam tin chunga roirêl a ta, Irngeitirhai a ti, an khandaihai bu tûna hrangin incher an ta, an ufeihai khom theipui ôn tanna hrangin sin an ti. Nam dang chunga nam danghaiin chem hrei inlek ta no nihaia, irdoi dân khom irchu ta no nihai. 5Jakoba irchihaio, Rengpa vâra om ta ei ti.
Mi lârirpâkhai chunga Rengpa roirêlna
6Ni mi Jakoba nâihai hih ni mâkhaia, nisua tianga mihai le, Filistia mihai dôi an hmanga, nam danghai an kop tâk sikin. 7Annihai ram chu tangka le rângachakin a sipa, an sum nei dân khom inhre phâk zoi loi a ni. An ram sûnga sakor in an bita, an tâli nei dân khom tep zoi zât ni maka. 8An rama khan millim a bita, An kuta an isinhai chubai an mûka. 9Mi tinin an ibiak hrang a nia, ite tûng hrang dang nei loiin. 10#1 Thes 1.9; Thup 6.15 Rengpa inzôkna roiinpui le ichiomna khêl loi hrangin, lung ir-ônga lût unglân, pilvûnga irbi roi. 11Mihriamhai mualphoina hong dâi a ta, an irngaiirsângnahai hor hnuai a ti. Kha ni tena chu Rengpa vai hi chôiindôm ni a ti. 12Kha ni tena chu itinrêng Rengpa’n, lârirpâkhai, irngaiirsânghai, le mi huang hmang murdihai, irhnuaitirhai a ti. 13Lebanon tânga sidar thing irsâng murdihai, Basan rama sesua thinghai tanpaihai a ti. 14Tâng tin le mual tin, a’rsângnahai irhniamtir a ta, 15Râl hrungna irsâng le kulbanghai inchimtir a ti; 16Tarsis-a irkuang, a lian le a sa murdi, a rêngin ngîm zoi a ti. 17Mihriam irpâkna om ta no nia, An irngaiirsângna khom irhniamtir ni a ti. 18Kha ni tena chu Rengpa vai hi chôiindôm ni a ti. Millimhai chu om ta no nih.
19Irnêng nok inhnîng hranga a zuang tena chu, Rengpa inzak omna roiinpui le chiomna khêl hrangin, rôl ir-ônghaia lût an ta, khurpadopa irbi zoi an ti. 20Kha nikhua kha a hong tungin chu, an ibiak tangkaruaa siam millim le rângachak millim, an isiamhai chu a bong a bûiin pai suakhai an ti. 21Irnêng nok inhnîng hranga a zuang tena chu, Rengpa inzakna roiinpui le ichiomna khêl hrangin rôl le lung ir-ônga irbi zoi an ti. 22A thi thei mihriamhai chunga irnghat no roi. Ite lua ni mahai.
Currently Selected:
ISAIA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
