ISAIA 19
19
Pathianin Aigupta hrem a ti
1Aigupta ram chungchâng thu: sûm irsâtak laia chuangin Rengpa chu Aigupta ram a pana. A makunga khan Aigupta rama millimhai inthing an ta, Aigupta mihai rot an ti. 2Aigupta mihai chu, Aigupta mihai ngêtin indoitirhai ki ta, ulenâi irhuang an ta, urênghai irdoi an ti. Khua le khua bial le bial irdoi an ti. 3Aigupta mihai chu irzûlhai ki ta, an irfûktirhai chu insiat pehai ki ti, millimhai, dôitheihai, mithi châ theihai, tasân theihai inpathai an ti. 4Aigupta-hai chu hruaitu pualoi tak kuta pehai ki ta, rêng sual takin an chunga roirêl a ti, Rengpa itinrêng Rengpa thusuakin a ti.
5Nail vadung chu kang a ta, lizôlhai khom inlang ving a ti. 6Vadungtehai le a lampuihai khom kang a ta, a mirim innam lul a ta, phâiruang le changpân khom chuai a ti. 7Ivapanghai chu châr rulin om a ta, an thil phunhai khom phâivua’n sêm inchâr a ti. 8Nga cheltuhai khêkin chap an ta, Nail vadunga irkuai pai le lên vôrhai chu, hlochuk thei no nihai. 9Puan pat thohai ngai khom, buai an ta, puan zerhmi không theihai khom an chardong a ti. 10Puan không theihai irzal an ta, irhlohai ngai beidong a ti. 11Zoan khua hruaituhai into lam chu! Faroa mi vârhai khom into angin an irfûktir pehaia; tianlaia mi vârhai le rênghai thu inhriattu kin ni, irti pumin. Itin mo Faroa kuang an ihril thei hrang? 12Kho tiang mo mi vârhai an om? Aigupta-hai hrangin itinrêng Rengpa sintho hrang hih hril infelin, irchutirhai ta ri se. 13Zoan khua hruaituhai chu into an ni, Nof khua hruaituhai khom mi huang hmang an ni. An hruaituhaiin an hruai insualhai ta. 14Rengpa’n an lungrîl inchong an siat pehaia, Aigupta mihaiin ite tho theina nei mahai; ikhêkin an khêk mai ta, zu’nruia miluaka irpol ang hi an ni. 15Milian le mi chîn, irchong le inriang, tûte Aigupta ram ta hrangin tho thei nei ta mahai.
Aigupta mihaiin Rengpa biak an ti
16Kha ni tena chu Aigupta mihai chu nupang angin an thâiindôp a ta; Itinrêng Rengpa’n anni soisak hrangin a kut thâk chi pumin inthing pumin om zoi an ti. 17Itinrêng Rengpa’n Aigupta a isoisak hrang dân, ar hâi an inhriat viat khomin Judai ramhaiin lei chi an ti. 18Kha ni tena chu Aigupta ram kho ringa sûnga Hebrai chong hmang an ta, itinrêng Rengpa irhming sâmin chonginkung an ti. Anni laia khua inkhat chu, “Haheres” ti an ti.
19Kha ni tena chu Aigupta ram sûnga Rengpa hrang maichâm siam an ta, Aigupta ramria lung phun an ti. 20Kha kha Aigupta rama, sipaihai Rengpa hrangin, irsinsiana le inhriatna ni a ta; dengintheitirtuhai sikin Rengpa la hong koi an ta, khanchu ama’n saninhringtu le inzôktu tîr a ta, ama khan annihai chu sansuak a ti. 21Rengpa chu Aigupta mihai kuanga inlang a ta, hâlirvôm thil inhlan le irbôlnahai inhlanin chubai mûk an ta, Rengpa makunga chonginkung an ti. 22Rengpa’n Aigupta mihai chu soisak a ta, khannisian indamtirhai nôk a ti. Rengpa tiang kîr an ta, an chongchainahai irngaiin, indamtirhai a ti. 23Kha ni sûn tena chu Aigupta ram ata Assuria ram dênin lamlian fe thei ta a ti, Aigupta le Assuria mihai chu irpan thei mai an ta, Pathian chubai mûk suam ta an ti. 24Kha zoro tena chu Israelhai chu Assuria le Aigupta irangpui ni a ti, kha nam inthumhai kha rammual ta hrangin satvurna ni a ti. 25#Jer 46.2-26; Ezek 29.1—32.32 Itinrêng Rengpa khan sat a vur ata, “Ki mi Aigupta mihaio, ki kut suak, nangni Assuria mihai, nangni ki irtan, nangni Israel mihaio, bor nangni pe ki ti,” la ti a ti.
Currently Selected:
ISAIA 19: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
