HABAKUKA 1
1
Habakuka’n dik loina a sêl
1Deipu Habakuka’n puakrik a ihmu chu;
2O RENGPA, idôr ten mo nang insam ki ta,
nir ngaitua loia ni iom hrang?
Irmanêpna tiin nang ki koia,
nangin saninzôk ual mak chea.
3Ithoa mo pualoinahai ni nin entira,
thil dik loi takhai hi ni ien mai?
irrokna le irmanêpna hai,
ki makunga an om maia:
Irkhalna le irngônahai a hong isuak a ni.
4Khasikin, dân thu khan ar fêna om thei maka,
Roirêlna thu suak ual ngai ma:
Mi felhai kha mi siahai khan an irhual vêla.
Khasikin roirêlna kha dikloi takin a suak ngai a ni.
RENGPA sâmna
5 #
Tîr 13.41
Nin vêla namhai kha en unglân,
thîr mai roi, a sate’n ar khêl ti roi;
Nin dam sûngin thil lamkhat ki itho hi,
Kha thiltho kha mi’n nangni hril khomhai sianlân,
Taksôn viat no chin ni.
6 #
2 Rng 24.2
Irngai roi, Kaldai mi,
Nam pualoi tak le milung inrem tak,
lêngna hmun, an ta ni loi khom nei tuma hmun tina irvâk vêl ngaihai kha!
ki ikaithoihai an ni.
7Anni kha ichiom tak le pangzaom tak an ni,
An roirêlna le an roiinpuina kha,
anni ata suak sa a ni.
8An sakorhai khom kâmkeite nêkin an chaninrang uala,
khohloi tianga inêhai nêk khomin ichi an om ual;
An sakor chung chuanghai kha an hong chum thiar thiara:
A ni, an sakor chung chuanghai kha hlatak ata hong an ni;
Irmupui âr chel hrang angin an zuang hrâta.
9Mi va rûnhai tumin an honga,
irzuk takin mân tiang an irhei ngit a ni;
bâli ang dôra tam salhai an chelhai ngai,
10A ni, rênghai khom an innuisana,
Mi lianhai kha an ta hrang khan hmusitom an nia,
kul det tinrênghai kha an innuisana,
irnêng an inpônga, an lâkpai ngaia.
11Phâivua ang dênin an hong inmuaia,
An fe theng zut zuta,
Aniachu, an hrâtna kha pathianin an nei sikin,
thiamno an ichang a ni.
Habakuka’n Rengpa a sêl nôkna
12O Rengpa ki Pathian, ki mi Irthiang,
kumtuang mi ni ini loi ma ni?
Thi ngai mak che.
O Rengpa, nangin anni kha roirêlna hrangin nin thang tâka,
O Lungpui, nangin anni kha ni sep hrangin ni inkunghai an ni.
13Nang chu sualna hmûna ngai nêpa mit irthiang ual nei ni ni,
irtheimâkna kha ni ien theiloi a ni,
Khasikin, pualoi taka thotuhai kha hmu chianin,
Mi siain ama nêka fel ual a inlem zoi lai khomin,
itho sika ni idâisan hrek ngai mo?
14Mihriam hi tuikhangliana ngahai le thilhring boka irvâk,
An chunga roirêltu nei ual loihai anga ni isiam a ini loi ma ni?
15Ama khan irkuai leh an kai suakhai zita,
A lênin a chelhaia,
A lênkhang leh khan an tomhaia,
khasikin raifânin a ilôm a ni.
16Khasika khan lên kuanga khan irbôlna an hlana,
A lênkhang kuang mirimhoi a hâla,
Anni sika a dongtum a hong liana,
Fâk hrang a nei intam tâk sikin.
17Khasikin a lên kha inrong nôkin,
Namhai that mai hrang chu a imâk loi hrang ma ni?
Currently Selected:
HABAKUKA 1: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
