EZEKIELA 41
41
1Kha hnung chu mihriam khan tentan inlaina taka om, Hmun Irthianga khan a ni hruaia, khataka lûtna lampui kha ar khia. 2Mûk ruka inthûk le mûk sôma irza a nia, khanchu a sîr hni tianga banghai kha mûk ringaa irsa a ni. A sûnga tentan kha ar khia, a dung mûk sôm minli a nia, a khang chu mûk sômhni a ni.
3Khanchu tentan sûngrîla khan a lûta, khataka fena lampui khom kha ar khia mûk hnia inthûk le mûk ruka irza a ni. A banghai chu mûk saria irsa a ni. 4Khanchu kha tentan kha ar khia a dung tiang mûk sômhni, a khang khom mûk sômhni a ni. Khanchu ki kuang, “Hi hi Hmun Irthiang tak chu a ni,” a tia.
Biakbuk pên tianga tentanhai
5Khanchu mihriam khan biakbuk sûng tianga bang irsa dânhai kha ar khia, mûk ruk a nia. Khanchu hi bang pên tianga hin tentanhai mûk minlia irzat hi biakbuk irhîla khan a oma. 6Hi chontanhai hi irchuan thuma siam a nia, tentan chîn sômthum a sûnga khan a oma. Khanchu irchuan tin irdîna biakbuk pên tiang bang kha a hnuai tianga irchuanhai nêkin a’rphân uala, tentan kha biakbuk leh khan irzomna boia bang chunga a’rnghat theina hrangin. 7Khaang khan biakbuk banghai khom kha pên tiang ata enin chu, a chung dên thaiin ar sa dân kha hmunkhat angin an langa. Khanchu biakbuk pên tianga banga khan tentan pên tiang khan a luina irzatôk tak inhni siam a nia, irchuan hnuai ten kha fe thei a nina hrangin. 8Khanchu hi tentanhai pên tiang bang irsa dân chu mûk ringa a nia, khanchu biakbuk hmâr tianga tentanhaia khan mikot inkhat hi a oma. 9Khaang dênin sim tianga tentanhai khom khan inkhat a oma. Khanchu biakbuk irhîla khan mûk ringaa irzat hmun rong hi ki hmua; 10Biakbuk bang kôla tentanhai lungphun leh khan a’rten maia, irnêng ata mûk ruka irsâng hi a ni. 11Khanchu hmun rong le ochaihai omna inkârhaia khan hmun rong a khang tianga mûk sômhnia irzat hi biakbuk zuia khan a om sa.
Nitâk tianga in om chu
12Khanchu biakbuk nitâk tianga hmun ôla a mong taka khan in inkhat a dung mûk sômkuaka sei le a khang mûk sômsari hi a oma; a banghai chu mûk ringaa irsa a ni.
Biakbuk lian lam
13Khan mihriam khan, biakbuk pên tiang kha a’rkhia, a dung mûk irzakhat a nia, khanchu a hnung tiang ata hmun ôl lâksa’n nitâk tianga biakbuk hmor tena khan mûk irzakhat ngêt a ni. 14Khanchu biakbuk mân tianga a sîr hmun ôl kha lâksa’n, mûk irzakhat ngêt a ni. 15Khanchu biakbuk nitâk tiang khan a’rkhia, a sîr inhnia lampuihai lûtna ten kha lâkin, mûk irzakhat ngêt a nia.
Tempil om lam
16Khanchu biakbuk lûtna tentan le Hmun Irthiang le Hmun Irthiang tak kha a hnuai ata tukver omna ten kha thingphêk inkhop ving hi a nia, kha tukverhai kha inhong thei ving a ni. 17Khanchu biakbuk sûng tianga banghai kha mikot chung tena irsâng hi a nia, an rêng khan tûm thinghai le cherubhai irlim, a kera an iker insip ving a nia. 18Tûm thingkunghai chu cherub le cherubhai kâra khan a bang tuan khan a oma. Cherubhai khan hmâi inhni seng hi an neia. 19Mihriam hmâi angin an hmâi kha tûm thingkung tianga a nghaa, kâmkeibaknei hmâi kiangkhat tianga tûm kung tiang khan a oma. Khaang khan bang murdi, 20a hnuai ata mikot chunghai kha a sip zita. 21Khanchu Hmun Irthiang mikot chopuihai chu irki minli nei an ni.
Thing maichâm
22Khanchu Hmun Irthiang tak lûtna mân tiang khan, thil inkhat thing maichâm ni ômtak hi a oma, a’rsâng lam chu mûk thum a nia, a khang chu mûk hni a ni. Khanchu a’rkia chopuihai le a toinahai le a kôlhai kha thinga siam ving a nia. Khanchu mihriam khan ki kuang, “Hi hi Rengpa makunga dokâng chu a ni,” a tia.
Mikot omhai chu
23Khanchu Hmun Irthiang fena lampui mong taka khan mikot inkhat hi a oma, khanchu Hmun Irthiang tak fena lampui monga khan inkhat dang hi a oma. 24Kha mikothai khan inkhâr inhni seng an neia, a laia irhong thei a ni. 25Khanchu Hmun Irthiang inkhârhai khan, banga om ang ngêt tûm thingkunghai le cherub illima oma. Khanchu a lûtna mikot tentan chunga khan miliang lian tak hi a oma. 26Khanchu hi tentanhai hin tukverhai a neia, khan a banghai chu tûm thingkunghai leh irvôtir a ni.
Currently Selected:
EZEKIELA 41: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
