EZEKIELA 42
42
Biakbuk kôla in inhni omhai
1Khanchu mihriam khan pên tianga tualzôla khan a ni hruaia, khanchu biakbuk hmâr tianga in, biakbuk nitâk tianga in om hla rak loina khan a ni hruaia. 2Hi in hi a dung chu mûk irzakhat a nia, a khang kha chu mûk sômringa a ni. 3Khanchu sîr khat tiang khan biakbuk kôla om hmun ôl, mûk sôm inhnia irzat hi a nghaa; sîr khat dang khan pên tianga tualzôl lung dâp tiang kha a nghaa, chadan thum neia siam a nia, a hnuai tak nêka tôt uala siam zit a ni. 4Khanchu hi in zui hmâr tiang khan lampui mûk sôma irzat le mûk irzakhata sei, a lûtnahai leh hin a oma. 5Khanchu tentan in chung tianga omhai kha a laia le a hnuai tentanhai nêk khan ar têt uala, khahai kha a hnung tiang uala siam a ni sikin. 6Khanchu chadan thuma tentanhai kha an rêngin hmun ôla om an nia, tualzôla in danghai anga chopuia irnghat ni mahai. 7Khanchu tentanhai leh irdîn mai khan bang a oma, pên tianga tualzôl zuia khan a fea, mûk sômringa sei hi a ni. 8Khanchu pên tianga tualzôl zuia khan tentan irtânga omhai kha mûk sômringa sei an ni, biakbuk tianga in sei dân kha mûk irzakhat a ni. 9Khanchu nisua tianga in mongna khan bang irphutna hmuna tentan inhnihai hnuaia hin pên tianga tualzôl lûtna hi a oma. 10Khanchu biakbuk sim tiang, nitâk tianga biakbuk mongna rengata hla rak loia hin, kha in ang kha inkhat a om nôka. 11Khanchu tentanhai maton tiang khan hmâr tianga lampui om ang dên khan lampui dang inkhat a oma. A lian dânhai, a sei dânhai, a’rvo dânhai le a lûtnahai khom ar ang vinga. 12Khanchu kha in sim lam pang tiang, nisua tianga a mongna taka bang irphutna tentanhai hnuaia khan mikot hi a oma.
13Khanchu mihriam khan ki kuang, “Hi in inhnihai hi in irthiang a ni, khahai sûnga khan Rengpa nâitu ochaiin thilinhlan irthiang takhai chu an fâk ngaia, a tentanhai kha a’rthiang sikin, ochaihai khomin khataka khan thilinhlan irthiang takhai chu an sia ngai, bu thil inhlanhai, sual irbôlnahai, sual ngaidamnahai chu. 14Khan ochaihai chu biakbuk sûng ata pên tianga tualzôla khan an fe nuama ni’n chu hi tentanhai hin Rengpa sin an ithôna silkai irthianghai chu an imâksan hrang a ni. Khanchu mipuihai irbûmna an fe mân silkai danghai leh an irbel ngêt hrang a ni,” a tia.
Biakbuk hmun irkhîna
15Khan mihriam khan biakbuk sûng tiang a’rkhi zoi tena chu nisua tianga dâikot tiang khan a ni hruai suaka, khanchu a pên tiang kha a’rkhi tâka. 16Khanchu irkhîna hmol kha a lâka, nisua tiang kha ar khia, mûk irzaringa a ni. 17Khan hmâr tianga khom kha ar hîlin ar khîna hmol leh irkhiin mûk irzaringa a ni. 18Irkhîna hmol khan sim tiang khom mûk irzaringa a nia, 19khan nitâk tiang kha a’rkhî nôka, mûk irzaringa dên a ni. 20A sîr minli khan a’rkhia, a sei lam irzaringa, a khang khom irzaringa a nia, a irhîlin bang a neia, hmun papai le hmun irthiang theithâkna hrangin.
Currently Selected:
EZEKIELA 42: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
