FESUAKNA 9
9
Sahai chunga hripui inlêng
1Khanchu, Rengpa’n Mosia kuang, “Faroa kuang fe’n lân, ‘Rengpa Hebraihai Pathianin hiang hin a ti: ki sin an tho theina hrangin ki mihai infetirhai ro: 2Anni nin fetirhai noa, ni khaphai maiin chu, 3irngai ro, loia ni sa omhai chunga, sakorhai chunga, saringseihai chunga, sehrât pâlhai laia, ni kêlbelrahai chunga, 4Rengpa’n a kut thâk a ta, hri irkhêl tak hong om a ti. Khanchu Rengpa’n, Aigupta mihai le Israel mi sahai zêkhai a ta, Israel irchihai ta chu ite thi viat no ni,’ a tih ti’n hrilin lân,” a tia. 5Khanchu Rengpa’n zoro an kung pehaia, “Hi thil hi, hi rama hin zînga Rengpa’n zuan changtir a ti,” a tia.
6Khanchu zînga chu kha thilhai kha Rengpa’n an changtir tâka. Aigupta rama sa om murdihai chu an thi zoi tâka; khannisianlân Israel irchihai sahai chu inkhat khom thi viat mahai. 7Khan Faroa’n mi a tîra; irngai ro, Israel mihai sahai chu inkhat khom thi mahaia. Khannisianlân Faroa lungrîl chu a la ngar maia, mihai kha la’nfetir nuam mai maka.
Sakhuai
8Khan, Rengpa’n Mosia le Arona kuang, “Irtapa irvut nin kutkâng sipin chôi unglân, Faroa mit hmua Mosia’n irvân tiang hlôn ri se. 9Khanchu Aigupta ram pumpui chunga vâiphin khu a sipa, Aigupta ram pumpuia mihriam le sa om murdihai chunga sakhuai invûng chang a ti,” a tia. 10#Thup 16.2 Khanchu irtapa irvut kha an lâka, Faroa kôla an ngîra; Mosia’n irvân tiang a hlôna, khanchu mihriam le sahai chunga sakhuai an irvei ving tâka. 11Kha sakhuai irveina sika khan tasân theihai chu Mosia makunga ngîr ngam ta mahai, kha sakhuai kha Aigupta mi murdi le tasân theihai khomin an irvei vinga. 12Khan, Rengpa’n Faroa lungrîl chu a la’nngartir pea, Rengpa’n Mosia kuanga a lei ihril tâk angin, anni thuhril chu irngai ual mah.
Irial
13Khan, Rengpa’n Mosia kuang, “Zînga thoiin lân, Faroa kôla ngîrin lân, a kuang, Hebraihai Pathian Rengpa’n hiang hin a ti, ki sin an tho theina hrangin ki mihai infetirhai roh. 14Hnuai chunga hin keima ang hi tûte om mahai ti nin hriat theina hrangin, atûn a zoro hin chu, ni mihai le ni siahlohai le nangma chunga khom, hi hri hi hong tîr ki ti. 15Atûn hin ki kut irlek ki ta, ni mihai le nangma khom hripuiin nangni hrem ki ta, hnuaia irthokin sâtpai ni ta ni ti. 16#Rom 9.17 Khannisianlân hi thil ki ithôna ang taka hin ki sinthotheina chu inentir a ni theina hrangin le, rammual pumpuia ki’rhming puang indarh a ni theina hrangin nang ki la indam mai a ni hi te. 17Ki mihai chunga hin nangma le nangma chôiindômin, annihai chu ni la infetir nuamhai loi mo? 18Irngai ro, zînga hiang tika hin chu irial inrik takin zuan thotir ki ta; hiang dôra Aigupta ram a’rzir ata a vuan tena hin a la ihrât ngai loi chu hong om a ti. 19Khasikin, atûn hin mi tîrin lân, loia ni thil nei murdi le ni sahai chu hong hruai lat ri sehai; sa le mi loia om murdi chu, an chunga irial hong tho a ta, thi ving an ti, in sûng tianga hong thei hrang tûte om ta no nihai, a tih tiin hril ro,” a tia. 20Faroa siahlohai laia Rengpa thu chia omhai chu an siahlohai le an sahai in sûnga thun inlût an ta, 21khan Rengpa thu irngai loituhai siahlohai le sahai chu loia an inomtira.
22Khanchu Rengpa’n Mosia kuang, “Aigupta ram pumpuia, loia chîmu tinrênghai chunga le, sa chunga le mihriam chunga, Aigupta ram pumpuia irial tamtak a hong tho theina hrangin, irvân tiang ni kut phar ro,” a tia. 23Khanchu Mosia’n a khianghrol chang tiang an leka; khanchu Rengpa’n khonri le irial a zuang insua tâka, hnuai chunga mei angin a hong irtêktir tâka, Rengpa’n Aigupta ram sûnga irial an thotir tâka. 24#Thup 8.7; 16.21 Khanchu, irial le michêk tâk chu a’rkoptira, irkhêl takin Aigupta ram pumpuia, nam inkhat ram a hong chang ata la hmu ngai loi chu a hong om tâka. 25Aigupta ram pumpuia khan, loia thil om murdi chu sa le mihriam khom a dêng thathai vinga; irialin loia sûlhna om murdi a dêng that vinga, rama thingkung khom a dêng that zoi ta. 26Israel irchihai omna, Gosen ram ti no chu irial tâk loina om mah.
27Khanchu Faroa’n mi a tîra, Arona le Mosia an koitirhaia, an kuang, “Atûn hin chu ki lei insual ok a ni ta: ki mihai le kei chu kin tukul a liana, Rengpa chu a fel a ni. 28Ruk ta ri se, irial le khonri irvân inrûm hi a boi theina hrangin, Rengpa kha nghi tan lân, khanchu infetirhai ki ta, om ta no chin ni,” a tia.
29Mosia’n a kuang, “Khopui ki suaksan zoiin chu, Rengpa tiang ki kut phar ki ta, hnuai hi Rengpa ta a nih ti nin hriat theina hrangin, irvân inrûmhai mong a ta; irial khom tho ta no ni. 30Khannisian, nangma le ni siahlohai chu, Rengpa Pathian la chi ual no chin ni, ti kin hriat,” a tia.
31Khan, patkung le fachaihai dêng thatin an oma, fachai vûi lai tak le pat khom a ra lai tak a nia. 32Bupui le chîmu danghai chu dêng that ni mahaia, an la mông no sikin.
33Mosia chu Faroa kuang ata khopui a suaksanin chu, Rengpa tiang a kut a phar tâka; khanchu irvân inrûm le irial chu a mong ta, rua khom inthotir ta maka. 34Khan, Faroa’n rua le irial, irvân inrûm chu om ta mah ti an hriat khomin, a la tho’nchâi maia, a siahlohai le an lungrîl a la ngar maia. 35Khan, Faroa lungrîl inngarin a la oma, Mosia bâia Rengpa’n a lei ihril tâk angin, Israelhai chu infetir nuam maka.
Currently Selected:
FESUAKNA 9: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
