FESUAKNA 8
8
Uichok intâm
1Khan Rengpa’n Mosia chu hiang hin a ti pea, “Faroa kuang va fe’n lân, Rengpa’n ki mihai khan ki sin an tho theina hrangin insuahai roh. 2Nin suatir nuamhai zel no’n chu, nin ram sip khakin uichok insuahai ki ti. 3Nail vadung khom uichokin sip an ta, nangma in sûnga khom lût an ta, ni zâlna hmun, ni puanthahai le ni sinthotuhai in sûng khom sip zoi an ti, ni mihriam omna hmun tina sip an ta, ni buhmun le ni khalâia khom fuan sup supin om an ti. 4Khakhêla uichokhai chu nang le ni mihai le ni sinthotuhai laia sip zitin om a ti, a ti va ti ro,” a tia.
5Khanchu Rengpa’n Mosia kuang, “Arona kuanga ni khianghrol kha tui chunga khan irlekin lân, Aigupta ram sûnga hin uichok hong suak ni ta ri se, va ti ro,” a tia. 6Khanchu Arona’n Aigupta ram vadunghai chunga khan a kut a phara, khanchu uichok an hong suak tâka, Aigupta ram murdi an hong bit zit tâk a ni. 7Khan tasân theihai khomin an dôihai hmangin khaang khan an thoa; Aigupta rama khan uichok an hong insuaktir pehaia.
8Khanchu Faroa’n Mosia le Arona a koihaia, “Rengpa kha koi unglân, ki mihai le ki kôl ata uichokhai hi lapai sianlân; khanchu Rengpa kuang an irbôl theina hrangin mipuihai hi infetirhai ki ti,” a tia. 9Khanchu Mosia’n Faroa kuang, “Hi inzak irlâkna ata hi nangin ni nei pe’n lân, nangma le ni ina uichokhai hi nin boitir pe hrang le vadunga fea om mai hrangin ni mi le ni siahlohai le nangma ta hrangin itika mo nangni ki la izong pe hrang?” a tia.
10Khanchu Faroa’n, “Zînga duah,” a tia. Mosia’n “Ni thu ang takin ni ri se: Rengpa kin Pathian ang hi mi tûte om mahai, ti nin hriat theina hrangin. 11Khanchu uichokhai khan ni mihai le ni siahlohai, ni in le nangma irthokin fesuak an ta; ivadunga om ta an ti,” a tia. 12Khanchu Mosia le Arona chu Faroa kuanga irthokin an fesuak tâka: Mosia’n, Faroa chunga uichok a ikêlsua chungchânga khan Rengpa a koi tâka. 13Khanchu Rengpa’n Mosia thu angin a hong tho pea; khanchu uichokhai chu loi le kho sûnghaia, in sûnga an thi khup tâka. 14An bukkhômhaia, an thu lulin an mirim a siata. 15#Lk 11.20 Khannisianlân Faroa’n an boi tah ti thu an hriatin, a milung an ngartira; Rengpa’n a lei ihril tâk angin an thu hril uksak nôk ta maka.
Phersedîp intâm
16Khanchu Rengpa’n Mosia kuanga, “Arona kuanga ni khianghrol kha inlekin lân, hnuai chunga vâiphin kha vîk ro, Aigupta rama phersedîp an hong tam theina hrangin, tho ro,” a tia. 17Khanchu a hong thoa, Arona’n a kuta hmol kha an leka, hnuaia vâiphin kha a vîka, sa le mihriamhai chunga khan phersedîp an hong om tâka. 18Khanchu tasân theihaiin an dôi hmangin phersedîp intâmtir hrangin an thoa, khannisianlân tho thei mahai; khanchu sa le mihriam chunga hrikhai an hong om tâka. 19Khanchu tasân theihaiin Faroa kuanga khan, “Hi hi Pathian kut chal a ni,” an tia. Faroa lungrîl chu an ngartira; Rengpa’n a lei ihril tâk angin an thu hrilhai chu irngai ual loiin.
Thoivâi intâm
20Khanchu Rengpa’n Mosia kuang khan, “Zînga thoiin lân, Faroa kuanga va ngîr ro: irngai roh tui chôi hrangin hong suak a ta, a kuang khan, ‘Rengpa’n hiang hin a ti, ki sin an tho theina hrangin ki mihai infetirhai roh. 21Ki mihai nin fetirhai no’n chu, ni in sûng le ni mihai chunga, ni siahlohai chunga le nangma chunga thoivâihai hong tîr ki ta: Aigupta mihai omna le an inhaia thoivâi hong sip zoi an ti. 22Khanchu kha ni tena chu, ki mihai omna Gosen ram chu zêkpai ki ta, thoivâi om viat no nihai; hnuai chunghai khom hin Rengpa ki ni, ti an hong inhriat theina hrangin. 23Khanchu ni mihai le ki mihai kâra saninzôkna thua teina sia ki ti; kha inhriatna kha chu zînga hong tung a ti,’ ti ro,” a tia. 24Khanchu Rengpa’n khaang khan a hong tho tâka. Faroa in sûng le a siahlohai in sûnga khan thoivâi irkhêl takin an hong tama; kha thoivâihai leh khan, Aigupta ram murdi insiatin a hong om tâka. 25Khanchu Faroa’n Mosia le Arona a koihaia, “Fe unglân, ram kâra nin Pathian kuang irbôl roi,” a tia.
26Mosia’n, “Khaanga tho kha a sa ti maka; Aigupta mi intiromna kha chu kin Pathian Rengpa kuanga ki irbôl sa hrang a nia, irngai ro, Aigupta mi intiromna chu an mit hmua kin irbôl sa’n chu, lung leh an ni idêng loi hrang ma ni? 27Thu a ni ipêk angin, ramchârna hmun, sûn thum fena lam hlataka fe kin ta, Rengpa kin Pathian kuang irbôl kin ti,” a tia.
28Khanchu Faroa’n, “Rengpa nin Pathian kuang khan, ramchârna nin irbôl theina hrangin nangni infetir ki ti. Aniachu, ram hlataka fe thei no chin ni; kha kha ni zong pe roi,” a tia. 29Khanchu Mosia’n, “Ni kuang ata fesuak ki ta, Faroa le a siahlohai, a mihai rengata, thoivâihai hi zînga irthokin chu an rot theina hrangin Rengpa chu nghî ki ti; khannisian mipuihai chu Rengpa kuanga irbôlna hmuna infetirhai loiin, hmûsit takin Faroa’n enhai mai ta no ri se,” a tia.
30Khanchu Mosia chu Faroa kuang ata a fesuaka, Rengpa kha a ngêna. 31Khan, Rengpa’n Mosia iti angin a tho pea, a lâkpai pe vinga, inkhat khom hôi pe loiin. 32Hi zoro khom hin Faroa lungrîl chu a ngar pea, mipuihai chu infetirhai ta mah.
Currently Selected:
FESUAKNA 8: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
