FESUAKNA 38
38
Hâlirvôm thilinhlan maichâm
(Fes 27.1-8)
1Thilinhlanhai hâlna hrang maichâm sitim thing le irki minli nei, mûk ringa sei, mûk thum irsâng a siama. 2A’rki minlia khan a’rki inchortirin a intuanthal a ni; dârin maichâm le a’rkihai kha a tuam vinga. 3Maichâma hmang hrang hmangruahai, irvut bêlhai; irvut luakna, khuri hai, thîr kuaikim le mei luakna dârthîrin a siama. 4Dâr tuana om hmor hnuai tiang khan irkualin an inkhopa, maichâm chimrip a idel a ni. 5A’rzônna hrang a kalna minli siamin irki minli khan an khopa, 6a’rzônna hrang sitim thing tuan a siama, dâr leh a tuama. 7Maichâm kil tianga kalna khan a rola, maichâm chu thingphêk leh a siama, a sûng chu a ir-ôngtir a ni.
Dâr tâbor
(Fes 30.18)
8 #
Fes 30.18
Rengpa omna puan in mikot kôla sintho ngai nupanghaiin hlîmena an ihmang ngai dâr irtêk ngaia irthokin dâr tâbor le a toihmun chu a siama.
Rengpa omna puan in dâi
(Fes 27.9-19)
9Patzâiirhmia không puan in kha a’rkula. Sim tianga puan mûk irzakhata sei puan a hmanga, 10chopui sômhni le an toihmun dâr sômhni, thil bângna hrang kuaikim le a zarna hrang sumru tuanhai siamin. 11Hmâr tianga dâi khom khaang ngêt khan a nia. 12Nitâk tianga khan puan mûk sômringa sei a zara, chopui sômkhat le an toitirna hmun dâr sômkhat a siama, a chopuia khan thilinchor a oma, puan bângna hrang sumru tuan a om sa. 13Nisua tiang, mikot omna khom khan dâi mûk sômringa irzat a ni. 14-15Mikot irzat lam chu mûk sôm hleiringa a ni, a sîr hitiang hitianga zâr hrangin patzâiirhmi thûr sai không zoi loi a ni. 16Mikot kôla puanzâr murdi chu patzâi irhmia siam ving a ni. 17Chopui intoitirna chu dâra siam a nia, a kuaikim ngul le a chopui sîp tuamnahai chu sumru rônga siam a ni. A’rkulna dâr chopui chu a rênga sumrua inluan ving a ni. 18A lûtna mikota puanzâr chu patzâiirhmi thûr sai, samul dum, a senduk, a sen leh irzêl enhoi taka zepa không a ni. A sei lam chu mûk sômhni, a’rsâng lam chu mûk ringa; puan in irkulna puanzâr danghai anga khan; 19An toitirna dârthîr minli inver sai sûnga phun chopui minlia indet a ni. 20Puan in le a irkulna dâi hêmvuak murdi kha dâra siam ving a ni.
Rengpa puan ina hmang hrang rângachak sumru le dârhai
21Thupêk sôm irziak chuangna lungphêk an isiana Rengpa omna puan ina sin hrang rângachak sumru le dârhai an ihmang tam lam chu hiang hi a ni. Mosia thupêkin ochai Arona nâipa Ithamara hruaina hnuaia Levi irchihai a tam lama insâp suak an ni. 22Juda nama mi, Hura tupa Uria nâipa Bezalela’n Mosia kuanga Rengpa thupêk angin itinrêng a siama. 23A sinthopui, Dan nama mi, Ahimasaka nâipa Oholiaba chu thil ker theia enhoi lam a siam thei, patzâiirhmi le samul dum, a senduk le a sena irzêla không nuam mi a ni.
24Puan in irthiang sinna hranga Rengpa kuanga hrang rângachak an hong inhlan chu her sângkhat a ni, kha zoroa khotâng tho lam le ngaidân dik taka varin. 25#Fes 30.11-16 Irteppui an neia, mi tin an chôitum hranghai bituk an siama, sumru an hong ichôi bûm chu her sâng thum irzaminli sômthum a ikâi a ni, khotâng varh dân diktaka varin. 26#Mt 17.24 Hi hi kum sômhni kâia irteppuia tep sa chu, mi nuai ruk sângthum irzaringa sômringa haiin sekel irzakhat an hong ipêk irangpui kha a ni. 27Puan in irthiang le puanzâr intoitirna irzakhat siam hrang sumru her sâng thum irzaminli hmang a nia, an toitirna inkhat hrangin her sômthum minli hmang a ni. 28A hmang zoi loi sumru her sômthûm la om chu, Bezalela puan zârna thiltuan chopui hranga kuaikim le a sîp tuamna hrangin a siama. 29Rengpa hranga dâr an ipêk chu her sâng hni irzaminli sômhni ringa a ni. 30Hihai ata hin Rengpa omna puan in mikot toihmun dâr maichâm le indettirtu dâr tuan ram, maichâma hrang hmangrua murdi; 31puan in irkulna dâi le a mikot irnghatna hai, puan in le a’rkultu dâi indettu hrang hêmvuakhai a siamsuaka.
Currently Selected:
FESUAKNA 38: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
