THUHRILTU 7
7
Hringnun chungchâng suina
1 #
Thuv 22.1
Irhming sa chu sahriak hlutak nêkin a sa uala; suak nî nêkin thi nî hi a sa ual.
2Hruaithena ina fe nêkin chu lusûnna ina fe chu a sa ual; kha kha mi tin itong hrang chu a ni sikin, mi hringin a milunga kha kha inhre mai ri se.
3Innui nêkin chardong khom chu a sa ual, chardong hmêl hin milung a siam insa ngai sikin.
4Mi vâr milung chu lusûn ina a om ngaia, khannisian invêt milung chu raifânna ina a om ngai.
5Intohai hla sak irngai nêkin chu, mi vâr irchûna inhriat chu a sa ual.
6Invêt innui chu, ilhling meia ei hâla a’rhâi phet phet ti ang hi a ni; ite omzia nei ma.
7Mi vârin mi senkhat a huang tena chu, ama chu invêt anga om chu a nia. Khaangin fâkinrûkna hin lungrîl an siat.
8Thil chu a’rphutna nêkin a mongna chu a sa uala; milunga za’rngaithei mi chu, milunga lârirpâk nêkin a sa ual.
9 #
Jak 1.19
Ni ningmur chu indâipai ro, ningmurna hi invêthai rôpsuama kêng a om ngai.
10“Tûnlai zoro nêk hin tianlai zorohai kha itho sika sa ual ma ni?” ti no ro, kha irdonna kha vârna irthoka ni mah.
11Vârna hi irchon anga sa a nia, a ni, mi vârhaiin chu irchon tamtak nei an ti. 12Tangka chu irhrungna a ini angin, vârna khom hi irhrungna a nia; inhriatna satna chu vârna neitu hringna chu a sansuak pe a ni.
13Pathian sintho hi ngaitua ta; a kôia a isiam tâk chu tu’n mo intûn thei hrang? 14Zoro sahaia chu raifânin omin lân, zoro saloihai chu ngaitua ro; Pathianin raifânnahai le chardongnahai a zuang tîr ngaia, khasikin mi’n a sûnmaton tianga thil chu ite inhre ngai mah.
15Hi ki hring sûng chanlamboi nikhuahai hin; mi fel thi lat le, mi pualoi a pualoinaa sôttak hring hi ki hmua. 16Khasikin, fel hraiin om no’n lân, vâr hrai khomin om sa no ro; itho mo ni bingin te irthat ni ta? 17Pualoi hrai khomin om no’n lân, invêt hrai khomin om sa no ro, itho mo ni zoro a tung mânin te thi ni ta? 18Hi ni ichel khak hi a sa a ni, khataka irthok khan ni kut khom la kîr no ro; Pathian chituhaiin nang la hong suaksan ving an ta.
19Khopui sûnga roirêltu sômhai nêk khomin vârnain mi vâr chu an hrâttir ual ngai.
20Irnêng chunga hin diktaka sin sa thoa, inchâi ngailoi hi om mahai. 21Khanchu, mi thuhril murdi hi ngaisak ngai no ro, khano’nchu ni siahlo’n khua nang sâl an ti, 22nang ngei khomin khaang tak khan mi danghai khua ni lei sâlhai ti ni milungin nin hriat sikin.
23Hihai murdi hi ki vârna chu hmangin ki lei fia tâka, “Vâr ta ki ti,” ki tia; khannisian, keimaa irthokin hlatak a ni. 24Hringnun omzia hi tu’n mo hmu suak thei a ta? Eini ta hrangin chu a sân an thûka, inhriatthiam intak tak khom chu a ni. 25Khanchu vârna dik chu imo a ini, ti hmusuak hrangin a sân ki suia, thil tinrêng a omna sanhai khom chu hmusuak ki tuma. Khante, imo ki hmu suaka? Ki ihmu suak chu, hi hi a ni: pualoia om hi sa maka; lusiat anga om khom hi invêtna a ni tihai hi a ni.
26Khanchu, thil inkhat thina nêka kha ual chu ki hmua, kha kha nupang, a milung chu châng anga om le lênhai anga, a kuthai khom chu minâng anga om mi chu a ni. Mihriam, Pathian lungdo anga omtu chu zôk thei a ta, khannisian, kha nu khan mi sualhai chu chelhai a ti. 27Thuhriltu khan, “Irngai ta, hi hi ki sui za zâma ama chu ki hmusuak ta. 28A dang khom hmusuak ki tuma, khannisian hmu thei ma unga, khanchu pasal sângkhat laia pasal inkhat chu a dik hi ki hmua, khannisian nupanga chu inkhat lua hmu ma ung. 29Khanchu hi vai hi ki hmusuaka, Pathianin chu mihriam hi dik hrangin a siama, khannisian mihriamhai chu lampui kôi tamtaka an pêt tâka,” a tia.
Currently Selected:
THUHRILTU 7: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
