DANIELA 2
2
Reng Nebukadnezara irmang
1Nebukadnezara roirêl kum hninaa khan, Nebukadnezara’n irmang a neia; a lungrîl a buai pea, in thei loiin a oma. 2Khan rêngin a’rmang hrilfia hrangin dôitheihai, mitphil le tasân theihai Kaldai mihai koi hrangin thu a pêka. An honga, rêng kôla an ngîra. 3Rêngin an kuang khan, “Irmang ki neia, kha irmang inhria’nfel hrangin ki lungrîl a sôl zoi ta,” a tia.
4Khan, Kaldai mihaiin Aramaik#2.4: Hi irchâng rengata bung sari ten hi Hebrai chong ni loiin, Aramaik chong an ihmang a ni. chongin rêng kuang khan, “O rêngpa kumtuangin dam ro: ni’rmang chu ni siahlohai hi hrilin lân, a hrilfiana chu hrilhai kin ti,” an tia.
5Rêngin Kaldai mihai kha a donhaia, “Ki kuang ata thusuak sai a ni ta, irmang le a hrilfiana chu ki makunga nin inlangtir thei no’n chu sâtpai ni nin ta, nin inhai khom nimnok siana ni a ti. 6Irmang le a hrilfiana nin inlangin chu, keima ata thilpêk le lômman chôiirsângna roiinpui hmu nin ti. Khasikin irmang le a hrilfiana chu nin hril roi,” a tia.
7Anni’n hiang hin an sâma, “Rêngin kha irmang kha chu a siahlohaiin nin hrilhai sian, an entirna chu hrilhai kin ti,” an tia.
8Rêngin a sâma, “Zoro sôt lam vai kêng nin ingaitua ti kin hriat; 9keima ata chu thu a suak tâk khom nin inhriat, keima ata irmang khan nin inlang loina hrang dân inkhat vai a om; minlak hrila, ki kuanga hril hrang minlak le thu chanlamboi nin isin a ni; khasikin irmang kha ni hril roi, khanchu a hrilfiana khom nin entir thei nin tih ti inhria ki ti,” a tia.
10Khanchu Kaldai mihai khan rêng kuang, “Rêng ni inphûta entîrthei mi inkhat khom irnêng chunga hin om mahai: rênghai, ulianhai, roirêltu tûte’n hi thil hi dôi theihai, tasân theihai, Kaldai mihai la’rdon ngai mahai. 11Khanchu rêng inphût hi thil intak a nia, taksa inlang theiloi mi pathianhai ti no’n chu a entir thei hrang tûte om mahai,” an tia.
12Khasikin rêng kha a ning an mur pea, a thang a tôm pe tâka; Babulon mi vâr murdi thatpai ving hrangin thu a pêka. 13Khanchu thupêk kha an sua tâka, mi vârhai chu that ni hrang an ni tâka; khan Daniela le a rualhai khom that hrangin an zonghaia.
Pathianin Daniela kuang irmang omzia a hril
14Khan Daniela’n Babulon mi vârhai that hranga hong suak, Arioka rêng hrungtu chu vâr takin hiang hin a sâma; 15Rêng hrungtu pâla hruaitu Arioka kuang khan, “Ithoa mo rêng thupêk chu kha dôra a irhnot?” tiin a va sâma. Arioka’n Daniela kha a hrila. 16Khanchu Daniela kha a lûta, rêng kha hrilfiana inentir hrangin hun inkian roi tih a ngêna.
17Khanchu Daniela chu in tiang a fea, a rualhai Hanania, Misaela le Azaria a hrilhaia. 18Babulon mi vâr danghai laia Daniela le a rualhai an irhmang loina hrangin hi thu’rthup chungchânga hin irvân Pathian kuang lungkhamna an zonga. 19Khanchu kha thu’rthup kha zân inlârnaa Daniela kuang a hor lang pea, Daniela’n irvân Pathian an pâk ta.
20Daniela’n, Pathian irhming chu kumtuang dênin inpâkin om ri se:
Vârna le sinthotheina khom a ta a ni sikin.
21Hunbihai le zorohai an danglam theia:
rênghai a sonpai theia, rênghai an dettir thei:
Mi vârhai kuang vârna a pêka;
an hretheitu kuang inhriat theina a pêka.
22Thil inthûk le thil irthuphai an langa:
inthima om inhriatin, a kuanga vâr a pêk ngai.
23O, ki’rchihai Pathian, vârna le theina ni petu,
ni kuanga kin izong nin hriattirtu chu,
Lômthu hril pumin nang kin pâk:
Rêng thil chu ni nin hriattir tâk sikin ti a hrila.
Daniela’n irmang chu a hrila, hrilfiana
24Khanchu Daniela’n Babulon mi vârhai irhmangtir hranga rêngin a inkung Arioka kuang a fea, a kuang, “Babulon mi vârhai chu irhmangtirhai no ro: rêng kuang ni hruaiin lân, rêng kuang a hrilfiana inentir ki ti,” a va tia.
25Khanchu Arioka’n Daniela kha irhnot takin rêng kuang a hruaia, “Juda sala om nâihai laia rêng kuanga a hrilfiana inhriattu mi inkhat ki hmu ta,” a tia.
26Rêngin Daniela, ar hming Beltesazzara kuang khan, “Irmang ki nei nôka a omzia mo ni hril theiin?” a lei ti pea.
27Daniela’n rêng kuang khan, “Thil irthup, rêng inhriat nuam tak chu, mi vârhai, kutzia en theihai, dôi theihai le tasân theihaiin rêng an ihrilfia pe theiloi; 28khannisian thil irthup inpuangtu Pathian chu irvâna a oma, rêng Nebukadnezara hi thil la hong om hrang a inhriattir nuam a ni hi te. Ni’rmang le ni zâlhmuna inlârna omzia chu hiang hin a ni.
29O, inlaltak, ni zâlhmuna thil la hong om hranghai ni’rngaituaa, thil irthup inpuang ngaitu’n thil la om hranghai nang a inhriattir a ni. 30Keima hin mi danghai nêka fingna ki nei sika, hi thil irthup hi ki kuanga inpuang ni maka, rêng kuanga a hrilfiana inhriattir hrang vai a ni, ni lungrîla ni ingaituahai nin hriat theina hrang vaia a ni.
31O, inlaltak, ni hong tanga, irngai ro, millim roiinpuitak a oma. Kha millim lianpa, irtêk dûra om kha, ni kôla a ngîra; an lang dân khom phûkinthing om tak a ni. 32Kha millim kha a lu rângachak irthiang tak a nia, a rôp le a bânhai chu sumru, a pum le a malpuihai chu dâr thîr, 33a kehai chu thîr, a kezapha chu thîr le pil irzêl a nia. 34Nangma’n chu lung, kuta sin suakna lâk hrang dân ni en laiin, millim khan a ke thîr le pila siam khan a hong dela, an khoi chita. 35Khanchu, thîrhai le pil, dâr, sumru le rângachakhai a rêngin a koidara, misa lum laia hruizôla bu’rsi angin an om tâka: phâivua’n a sêm indarhaia, an omna hmun inhriat thei ni ta ma: millim deltu lung chu tâng liantak a chang tâka, irnêng a sip zita.
36“Hi hi a ni, ni’rmang chu, a hrilfiana khom rêng kuang hin hril kin ti. 37O inlaltak, nang chu rênghai rêng, irvân Pathianin ramhai, sinthotheinahai, hrâtnahai, roiinpuinahai a ipêk chu ni ni; 38khasikin kho hmuna khom mihriam nâihai omna murdia, ramsa le vatêhai ten khom ni kuta a pêka, an rênga laia roirêl hrangin a pêk chu ni nia: rângachak lu chu nangma hi ni ni. 39Khan ni hnunga hin ram dang mi nangma nêka chîn ual hong lian a ta; khan, dâr, ram inthumna irnêng murdia roirêl hrang chu om nôk a ta. 40Khan, ram minlina chu thîr anga ngar om a ta; thîrin chu thil tinrêng a insiat thei angin, ama khom insiatin a idel indi hrang a ni. 41A kezapha le a’rzunghai chu bêl siamtu saihlûm, a sen a zâr thîr anga ni ihmu ang taka khan, ram irsen ni a ta, khannisian amaa khan an ngarna chu om mai a ti, thîr le pilhlûm irpol ni ihmu ang khan. 42A kezapha tianga thîr le pilpok ni ihmu ang khan ram senkhat tiang a siat ol a ta, senkhat tiang siat loiin om a ti. 43Thîr le pil irzêl ni ihmu khan, anni khom mihriam irchi irpol ni a ti. Khannisian thîr le pila irzêl tatak thei loi ang khan, irzêl thei lik no nihai. 44Kha nia rênghai khan irvâna Pathianin ram zuan ding a ta, kha ram kha chu siat ta ngai no ni; an lalna khom mi danghai hrangin mâksan ni ta no ni; hi ram murdihai hi insiatin inhek zoi a ti, a ram chu kumtuangin inding mai ta a ti. 45Tâng tianga lung, kut ni loia tuk suakin, thîr, dâr, saihlûm, sumru, le rângachakhai a siata ni ihmu ang khan, Pathian roiinpuitak khan rêng makunga hin nakana thil hong om hrang chu inpuang a ni: khanchu irmang kha a tak ngêta, a hrilfiana khom a diktak a ni,” a tia.
Rengin Daniela lômman a pêk
46Khanchu, rêng Nebukadnezara chu a khûksadelin Daniela kha chubai a mûka, a kuanga thilinhlan le mirimhoihai inhlan hrangin thu a pêka. 47Rêngin Daniela kuang khan, “Hi thilirthup ni inpuang theinaa hin, nin Pathian chu pathiante-hai Pathian, rênghai RENG, thilirthup inpuangtu a lei ini pial kêng a ini,” a tia. 48Khanchu rêng khan Daniela kha a donsuia; thilpêk roiinpui tamtak a pêka, Babulon ram bial pumpuia roirêl hrang le Babulon mi vârhai murdi chunga a hruaitutak ni hrangin a sia tâka. 49Khan Daniela izong angin rêng khan, Sadraka, Mesaka le Abednego-hai chu Babulon bial chungchânga hruaituin a siahaia, Daniela rêk chu inlaltak roirêlna khan a om ta.
Currently Selected:
DANIELA 2: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
