AMOSA 7
7
Inlârnaa khâi pâl
1 Rengpa Pathianin inlârna a nir hmutira, kha khan khâihmimse pâl tamtak a isiamhai kha ki hmua, irngai u ta, hi hi dongtu’n fapui an ât zoia, hloisûl hong mông irphut nôk ang a ni. 2Khan, kha rama sûlhna an fâk zit hnungin, “O Rengpa Pathian, ngaidam ro, hi nang ki ngên; Jakoba chu itin mo a ingîr thei hrang, ama kha a chîna?” ki tia.
3Hi thu tiang hin Rengpa kha ar hei kîra Rengpa khan, “Ni nôk ta no ni”, a tia.
Mei hmu thu
4 Rengpa khan inlârna a nir hmutir nôka, a mihai hremna hrangin mei a ikoi lai ki hmua, mei khan tui inthûk tak kha a kâng zita, ram khom kâng hrang a nia. 5Khan, keima’n, “O Rengpa Pathian mong ro, nang ki ngên: Jakoba kha itin mo a inding thei hrang? Ama kha a chîna,” ki tia.
6Hi thu tiang hin Rengpa kha ar heikîra; Rengpa khan, “Hihai khom hi zuang tung no ni” a tia.
Enirmîlna hmu
7Hiang hin a nin entir nôka; khataka khan, Rengpa kha bang irdîn taka irfûktir kôla a ngîr ki hmua, a kuta enirmîlna a oma. 8Khan, ki kuang Rengpa khan, “Amosa, imo ni ihmu?” a tia.
Khan, keiin, “Enirmîlna,” ki tia.
Khan, Rengpa khan, “Irngai ta, ki mi Israelhai laia enirmîlna sia ki ta; anni khêlhai ta no ninga. 9Khan, Isaka hmun irsânghai kha hong ram an ta, Israel hmun irthianghai kha insiat ni a ta; khan, Jeroboama sûngkuahai khandaiin doi ki ti,” a tia.
Amosa le Amazia
10Khan, Bethel khuaa ochai Amazia khan Israel rêng Jeroboama kuang, “Amosa khan Israela sûngkuahai laia inrûkin nang a doia: ram khan a thu murdi kha tuang thei mah. 11Amosa khan hiang hin a tia, ‘Jeroboama kha khandaiin thi a ta, irlêkloiin a ram ata Israel kha sala hruai suak a ta,’ tiin thu a thona,” a tia.
12Khan, Amosa kuang Amazia khan, “O nang deipu! fe’n lân, Judai rama rotin lân, kha khan bu nêkin lân, thu hril roh: 13Khannisianlân Bethel khuaa thu hril nôk ta no ro; rêng hmun irthiang le rêng in a ni sikin,” a ti saa.
14Khan, Amazia kuang Amosa khan, “Deipu ni ma unga, deipu nâipa khom ni ual ma ung; sâ pâl enkoltu le theipui thing enkoltu ki ni ual a ni. 15Khannisian, Rengpa khan belra pâl enkolna ata kha a ni lâka, Rengpa khan ki kuang, ‘fe’n lân, ki mi Israelhai kuang thu hril ro,’ a ni tia. 16Khanchu atûn Rengpa thu kha inhre ro: nangin Israel doiin thu hril no’n lân, ni tia; Isaka sûngkuahai doiin ni thu inthâ no roh, ni tia. 17Khasikin Rengpa khan hiang hin, ‘Ni dôngma kha khopuia notizuar ni a ta, ni nâipahai, ni nâinuhai kha khandaiin tûk an ta, ni ram kha irkhîna hruiin sem an ta; khan, nangma ngei kha ram irthiang loi sûnga khan thi ni ta, irlêkloiin Israel kha a ram ata sala hruai irhmang a ta,’ a ti,” tiin a sâma.
Currently Selected:
AMOSA 7: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
