2 RÊNGHAI 21
21
Manasea Judahai rêng
(2 Tsn 33.1-20)
1Kum sômhleihni a ni kumin Manasea chu Judahai rêng a chang irphuta, Jerusalema kum sômringa an lala. A nu chu Hezibi a ni. 2#Jer 15.4 A mipuihai laia, Rengpa inhnotsuakhai nam tho dân intiromtak takhai khom Manasea’n a thoa, Rengpa mithmua thil saloi a thoa.
3A pa Hezekia insiat, nam dang pathian biakna hmun irsânghai chu a siam insata, Baal ta hrangin maichâm a siama, Israel rêng Ahaba ang khan Aseri irlim a phuna, irvâna ârsihai khom a biak ngaia. 4#2 Sam 7.13 Jerusalem khua hi nin ni ibiakna hrang hmun chu a ni; tiin Rengpa’n a inthang a ni; kha tempila khan maichâm chi tinrêng a isia a ni. 5Tempil sûnga tentan inhnia khan irvâna ârsihai hrang maichâm ar tâng inbita. 6A nâipa inkhat chu hâlirvôm thilinhlanna hrangin a thata. Kutzia en le tasân a hmang uara, ramkhohri le mithi kaithoi theihai an phûthai ngaia. Rengpa mithmua thilsual tamtak a thoa, a milung an natir pe a ni. 7#1 Rng 9.3-5; 2 Tsn 7.12-18 Davida le a nâipa Solomona kuanga Rengpa’n, “Hi Jerusalem khuaa tempil hmun hi Israel nam sôm le nam hnihai laia ram murdihai ni biakna hmun hranga ki inthang a ni a ti, tempil sûnga khan Aseri irlim a iphun a ni.
8“Israel mihaiin ki thupêkhai an zôma, ki dân, Mosia ihril kha an zôm zita a niin chu an irchihai hi, ram ki ipêkhai ata hi inhnothai no ning, a ti a ni. 9Judai rama mihaiin Rengpa thu zôm loiin, an matona Rengpa inhnotsuakhai nam tho dân anga thilsual ual tho hranga Manasea’n a ihruai a ni. 10Rengpa’n a siahlo deipuhai hmangin hiang hin a hril. 11‘Manasea’n thil intiromtak takhai, hi rama an om mân ata om Kanaan mihai itho ngai nêka intirom a thoa, millim siamin Judahai a ihruai insual a ni. 12Khanchu, kei Rengpa, Israelhai Pathian hin, an hriat murdihaiin a’rkhêl an ti thei hrang dôrin Jerusalem le Judai ram siatna intungtir ki ti. 13Samari khua le Israel rêng Ahaba ki isoisak ang khan, Jerusalem khom soisak ki ti. Khêng ei irsûkinfâia ei inkhub ang hin Jerusalem khom a sûnga omhai hi irsûkinfâihai ki ti.
14Ki mi, la thi zoi loihai khom hi hnôlhai ki ta, an râlhai kuta la pe ki ta, khanchu an nuam takin soisakhai an ti. 15An irchihai Aigupta ram ata an hong suaka irthokin, atûn ten hin, an la itho insual a ni! ki iti anga om loiin ki ningmak an la itho mai ang hin ki mihai a sate’n la soisakhai,’ ki ti.
16Manasea’n ite ti loihai a that intamhaia, Jerusalema thisen a iluang hluk a ni. Juda mipuihai chu millim biak an uartirhaia, Rengpa ta hrangin thilsual an itho a ni ta. 17Manasea sintho dang thilsual a ithohai chu Juda rênghai thurchi irziakna lekhabua a chuang. 18Manasea chu a thia, a rêng irhuan, rêng Uzia irhuan sûnga an phûma, a nâipa Amon chu a’rthûlin an lal nôk ta.
Juda rêng Amon
(2 Tsn 33.21-25)
19Amon chu kum sômhni inhni a ni kumin Judahai rêng a changa, Jerusalema kum hni an lala, a nu chu Jotba khuaa mi Haruza nâinu Mesulemiti a ni. 20A pa Manasea angin Rengpa mithmua thilsual a thoa. 21A pa tho dân a lâka, a millim biak ngai a biak uara, 22An irchibulhai Pathian Rengpa chu a hnôla, Rengpa thupêkhai zôm nuam loiin a oma. 23A ituanghai laia mihaiin an khitphiara, rêng in sûnga an thata. 24Judahaiin Amon nâipa Josia chu ar thûlin rêngin an siam nôk ta. 25Amon sintho danghai chu Juda rênghai thurchi irziakna lekhabua a chuang. 26Amon chu Uzia irhuan thâna khan an phûma, a nâipa Josia chu a’rthûlin an lal nôk ta.
Currently Selected:
2 RÊNGHAI 21: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
