2 THURCHI SUINA 33
33
Juda rêng Manasea
(2 Rng 21.1-9)
1Kum sômhleihni a niin Manasea chu Judai rama an lal irphuta, Jerusalema kum sômringa le ringa an lala. 2#Jer 15.4 Khan, Rengpa sikin an ihnôlna rama namhai thil intirom thohai ang kha a thoa. 3A pa Hezekia’n a lei insiatpai tâk, nam dang pathianhai biakna hmun irsânghai kha a sin insatira, Baal makunga irbôlna inhlanna hranga maichâm an sintira, pathiannu Aseri irlimhai an sintira, ârsihai chubai a mûka. 4#2 Tsn 6.6 Kumtuanga Rengpa biakna hrang tempil an kunga khan nam dang pathian maichâm a sina. 5Tempil tentan inhnia khan ârsi biakna hrang maichâm a sina. 6Hinom irhôra hâlirvôm thilinhlanna’n a nâipahai an hlana; 7#1 Rng 9.3-5; 2 Tsn 7.12-18 tasânhai le kutzia en theihai, ârsi en theihai a hmanga, mithi châ theihai, tasân theihai a hmanghaia. Rengpa’n a sa a iti loihai a thoa, a ning an mur pe ta a ni. 8A millim siam chu tempila a siaa, Pathianin Davida le Solomona kuanga, “Israel nam murdihai laia Jerusalem le hi in hi ki’rhming lamna hranga inthang a ni. Kumtuanga ki thupêk murdi an zôma, ki thu’nkunghai le ki dânhai, ki siahlo Mosia ihrilhai kha an zômin chu Israelhai hi itiklai khoma an pahai kuanga ki ipêk hrang ram ata hi inhnotsuakhai no ning,” a tih tâka.
9Manasea’n Judai ram le Jerusalem mihai chu thil dik loi an thotirhaia, Israelhai makunga a inhnotsuak namhai ti nêka sual lian ual an tho tâk a ni.
Manasea irsîrna
10 Rengpa’n Manasea le a mihai kuang thu a hrila, irngai pe nuam mahaia; khasikin Assuria sipai hruaitu chu Rengpa’n Judai ram an doitira. 11Manasea chu an chela, zîngziri hrui leh an vîka, Babulon-a thîrhrui leh an kaia. 12A chardong hrai sikin Pathian Rengpa makunga irhnuai takin, changpuina ar zong tâka. 13Manasea chongchaina chu a le’rngaitua pea, a izonghai chu sâmin Jerusalema an fetir nôk tâka. Manasea’n chu Rengpa chu Pathian a nih ti an hriat infel thei tâka. 14Kha zoiin chu Davida khopui nisua tianga kul bang pên tiang khan Manasea’n in a zom irsânga, Gihon tui omna irhôr hmâr tianga Nga mikot kôla ‘Ofel’ an itihna dênin a sina. Judai rama kul nei khua tina sipai pâl khat, hruaitu inkhatin a siahaia. 15Tempil ata nam dang pathian irlim le millim inluan, ama isiahai chu a thonpaia. Tempil mual le Jerusalem khua nam dang pathian biakna maichâm om khom kha a lâka, a paia. 16Rengpa biakna maichâm balhai kha a sina, irngeina thilinhlanhai; lômthu hrilna thilinhlanhai an hlana, Judai rama mi murdi chu Israelhai Pathian Rengpa an biaktirhaia. 17Mipuihai kha irbôlna hmun pângaia la irbôl maihai khomsian, Rengpa kuang vai an irbôl ta a ni.
Reng Manasea zoro hnungkhôn
(2 Rng 21.17-18)
18Manasea thil tho dang murdi, Pathian kuanga chongchaina hai, Israelhai Pathian Rengpa irhminga deipuhaiin a kuanga an thuhrilhai chu Israel rênghai thurchi irziakna bua a chuang. 19Reng Manasea chongchaina le Pathian isâmna hai, a irlet zoia thilsual a ithohai thurchi, nam dang pathian biakna hmun irsânghai, Aseri irlim sina, a millim inluan a ibiakna thu hai, deipuhai thurchi irziakna bua a chuang sa ving a ni. 20Manasea chu a thia, rêng ina an phûma, a nâipa Amona chu ama irthûlin an lal tâka.
Juda rêng Amona
(2 Rng 21.19-26)
21Amona chu kum sômhni inhni a niin Judai rama an lal irphuta, Jerusalema kum hni an lala. 22A pa Manasea angin Rengpa chunga thilsual a thoa, a pa millim inluanhai chu chubai a mûkhai tâka. 23Khan, a pa angin irngaiintômna nei maka, Rengpa tiang irhei nuam maka, a pa nêkin a isual ual a ni. 24A rualhaiin an khita, a ina an thata, 25Judai rama mihaiin Amona thattuhai kha an thathaia, a nâipa Josia chu rêngin an siama.
Currently Selected:
2 THURCHI SUINA 33: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
