1 THURCHI SUINA 7
7
Iskara irchihai
1Iskara hi nâipasal minli, Tola, Pua, Jasuba, le Simrona a neihaia. 2Tola hin nâi kiruk, Uzia, Refaia, Jeriela, Jamaia, Ibsama le Semuela hai an ni. Hihai hi Tola irchia an hruaitu, mihai le irhming inthanghai an ni, Davida zoro lai hin an irchia mi chu sînghni sânghni le irzaruk an ni. 3Uzia hi nâipasal inkhat Izrahia a neia, Izrahia hin nâipasal minli a neia, hihai hi an ni. Mikaela, Obadia, Juda, Isahia hai hi an hruaitu an nia. 4Dôngma an nei intama, nâi khom an nei intam a ni, irdoi mi sîngthum sângruk an om. 5Iskara irchi sûnga hin sipaia chang thei mi sîngriat sângsari irhming irziak a ni.
Benjamina le Dan irchihai
6Benjamina nâipasal thum, Bela, Bekera, Jadiela hai an ni. 7Bela hin nâi ringa, Ezbona, Uzia, Uziela, Jerimota le Iria hai a neia, irchi khat laia hruaitu an ni seng, an irchia mi hi sînghni sânghni le sômthum minli sipaia hmang thei an ni. 8Bekera hin nâipasal kuak a neia, Zemira, Joasa, Eliazara, Elioenaia, Omria, Jeremota, Abija, Anathota, le Alemeta an ni. 9Irchi tina an irtep dânin sipai fe thei mi sînghni irzahni an ni. 10Jadiela hin nâi inkhat, Bilhana a neia. Bilhana hin nâipasal sari Jeusa, Benjamina, Ehuda, Kenaana, Zethana, Tarsisa le Ahisara hai a neia. 11Annihai kha irchi khat lu seng an nia an huaisenin irhming inthang an ni, an irchi laia mi sipaia fe thei sîngkhat sângsari le irzahni an om. 12Supim le Hupima hai khom anni irchia tep inlût an ni, Husima#7.12: Supim le Hupima hi chu Ira nâipasalhai an nia, Husima hi chu Ahera nâipasal a ni. (Irp 46.23; Nam 26.39,42, en roh.) hi chu mi dang irchia mi a ni.
Naftalia irchihai
13Naftalia hin nâipasal minli, Jaziela, Gunia, Jezera le Saluma a neihaia. (Annihai hi Bilhaii#7.13: Bilhaii hi Jakoba lâksîr a nia, Dan le Naftalia hi a nâipasal inhnihai an ni. irchihai chu an ni.)
Manasea irchihai
14A dôngma Arama mi le Manasea hin nâi inhni Asiriela, Makira a neia. Makira hi Gileada pa a ni. 15Makira hin Hupima le Supim ta hrangin dôngma a zong pehaia. A farnu chu Maaki a ni, Makira nâi inhnina chu Zelofehada nâi, ama hin nâinupang ngot a neia. 16Makira dôngma Maaki hin nâipasal inhni Peresa le Seresa a neia, Peresa hin nâipasal inhni Ulama le Rekema a neia. 17Ulama hin nâi inkhat Bedana a neia, a pu chu Manasea a ni. 18Gileada farnu Hamoleketi’n nâipasal thum a neia: Isoda, Abiezera, Malaa hai hi an ni. 19(Semida hin nâipasal minli, Ahiana, Sekema, Likhia le Aniama a neia.
Efraima irchihai
20Efraima irchihai chu hihai hi an ni, Suthela, Bereda, Tahata, Eleada, Tahata 21Zabada, Suthela hai hi. Efraima hin nâipasal Ezera, Eliada, a neihaia. Khannisian Gath khua mihai belra an inrûk an that pehaia. 22An pa Efraima’n a chûla, a urênghaiin an hong pana, irtharngam an saka. 23A dôngma a’rpôlpui nôka, nâi a vonga, nâipasal a neia, an chunga buaina a tung sikin ar hming khom Beria#7.23: Beria ti hi Hebraiin “Buaina, intakna” tihna ang a ni. an iti a ni. 24Efraima’n nâinupang Seeri a neia, Beth-Horon chuanchung le chuanhnuai le Uzen-seer khuahai hi a siam a ni. 25Efraima hin nâipasal dang Refa a nei saa, a’rchihai chu hihai hi an ni. Resefa, Tela, Tahana, 26Ladana, Amihuda, Elisama 27Nuna le Josua. 28An ram thar lâk an omna ram Bethel le a kôlvêl khua ata nisua tiang Naaran khua a tunga, nitâk tiang Gezer le a kôlvêl dênin Sekem le Ai khua, le a kôlvêl khuahai a huam sa. 29Hi khopui Beth-Sean Taanak, Megido, Dor le a kôlvêl khua Manasea irchihai thu hnuaia an om, kha hmunhai khan Jakoba nâi Josefa irchihai omna ram a ni.
Asera irchihai
30Hi hi Asera irchihai suina chu a ni. Nâipasal minli Imna, Isva, Isvia le Beria hai an ni. Nâi nupang sari a nei sa.
31Beria hin nâipasal Hebera le Malkiela a neihaia, Malkiela hin Birzait khua hi a inding a ni.
32Hebera hin nâipasal thum Jafleta, Somera le Hothama a neihaia, nâinu Suai a nei sa.
33Jafleta khomin nâipasal thum Pasaka, Bimhala, Asvata a neihai.
34A sangpa Somera khom hin nâipasal thum, Roga, Jehuba le Arama a neihai.
35An mitum tak Hothama hin nâipasal minli, Zofa, Imna, Selesa le Amala a neihai.
36Zofa nâihai chu hihai hi an ni, Sua, Harnefera, Saula, Beria, Imra, 37Bezera, Hoda, Sama, Silsa, Ithrana, Beera.
38Jethera irchihai chu Jefunea, Pispa, Ara hai an ni. 39Ula irchihai chu hihai hi an ni, Ara, Haniela, Rizia hai an ni.
40Khihai khi Asera irchihai chu an ni; ar chi dang sûnga hruaitu irdoina irhming inthang le hruaitu fel ta tak an ni. Asera irchi lai ata sipai chang thei mi sînghni sângruk an om.
Currently Selected:
1 THURCHI SUINA 7: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
