1 THURCHI SUINA 23
23
1Davida chu a ulianin a hong tar ok tâka. Solomona kha Israelhai rêng a hon changtir tâka. #1 Rng 1.1-40
Levi irchihai sin
2Israel hruaituhai, ochaihai le Levi irchi murdihai chu Davida’n a bukkhômhaia. 3Levi irchia mi kum sômthum chung tianga mi a tephaia, mi sîngthum le sângriat an dêna. 4Mi sînghni le sângminlihai chu tempil sin enkoltuin a siahaia; mi sângruk chu thil irziak infela thu buaihai infel hrang a tia. 5Mi sângminlihai chu sipai sintho hrangin a tia; mi sângminli danghai chu rêngin a ipêk thil tum inring thei hai, tum puma Rengpa inpâkna hla sak hrangin a tia.
6Davida’n Levi irchihai chu an irlo fe dân enin pôl thumin a senhaia. Gersona, Kohata le Mararia pôlhai an ni.
7Gersona khan nâipasal inhni Ladana le Simeia a neia. 8Ladana’n nâipasal inthum Jehiela, Zethama le Joela a neihaia. 9Hihai hi Ladana irchia hruaituhai chu an ni. 10Simeia irchihai chu a ulian dônin hihai hi an ni; Jahata, Zina, Jeusa, Beria. 11Hi mi minlihai hi Simeia nâihai chu an ni. Jahata chu a hruaitu tak a nia, Ziza chu a hnuai renga a ni; Jeusa le Beria hin nâi nei intam mahai, irchi khat anga tep an ni.
12Kohata hin nâipasal minli Amrama, Izhara, Hebrona, le Uziela a neia. 13#Fes 28.1 Amrama hi Arona le Mosiahai pa a ni. Arona hi ar chihai le, Rengpa biakna mirimhoi thilinhlanhai inhlana bêlbûr irthiang enkoltu le Rengpa irhminga mipuihai hranga satvurna hriltu hranga indang bîk a ni. 14Pathian mi Mosia irchihai rêk chu Levi irchihai laia tep sa an ni. 15Mosia’n nâipasal inhni Gersoma le Eliezera a neia. 16Gersoma irchihai laia mi inlâr Sebuela a ni. 17Eliezera hin nâipasal inkhat vai Rehabia a neia. Rehabia hin chu nâi a nei intama.
18Kohata nâi ulian tak hnuaia Izhara’n nâipasal Selomita a neia; ama hi an hruaitu tak a ni. 19Kohata nâi nôk le Hebrona’n nâipasal minli Jeria, Amari, Jahziela le Jekameama a neia. 20Kohata nâi mitum Uziela’n nâipasal inhni Mika le Isia a neia.
21Meraria nâihai chu Mahlia le Musia an ni. Mahlia nâihai chu Eliazara le Kisa an ni. 22Eliazara hin nâinupang vai a neia, nâipasal nei loiin a thia. A nâinu hi Kisa nâipasalin a neia. 23Meraria nâipasal Musia hin nâi inthum Mahlia, Edera le Jeremota a neia.
24Hihai hi an irchihai chunga irhming irziak ving, Levi irchihai chu an ni, kum sômhni chung tianga mihai chu, 25Davida’n, “Rengpa Israelhai Pathianin a mihai chu râlirvei loiin an omtirhaia. Jerusalema a om mai hrang sikin. 26#Dhn 10.8 Levi irchihaiin Rengpa omna hrang bokrop le bungrua danghai chu irzôn thi thiai nang ta no ni,” a tia. 27Davida thu angin Levi irchihai chu kum sômhni an kâiin chu sinthothei hranga irhming irziak ving an ni. 28#Nam 3.5-9 Hi sinhai hi an itho hrang chu a ni. Arona irchia ochaihai Pathian biakna changpui le tempil kholâia tentan sûnga bêlbûr irthiang vong infâi, 29Pathian ta hranga bai ser inhlan hrang siam le, chol kop loihai thep le baidi oliv hriak leh irzêl, tempila thil inhlan lei lâka irtê infel. 30A sûn a zâna Rengpa inpâka hla sak hi a ni. 31Sabat nihaia, tha thar nî sûna, kût nî sûna, hâlirvôm thilinhlan laia inpâkna hlasak hrang mi an inkunghaia, khahai khan inpâkna hla an isak mai hrang a ni. 32Hmun irthianga Biakbuk in chu enkol an ta, ochai Arona irchi le an urênghai sin an itho pehai hrang a ni.
Currently Selected:
1 THURCHI SUINA 23: HRACLBSI
Highlight
Copy
Compare
Share
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
