TITA 1

Khlimyaba

1Paul, Madai ni dangyasa jang Jisu Krista ni haijaoyasa,

Madai subung saikhoyarao khe, lonma ha didih mani ode, Madai khe khiyal khlaiyaba gede grao gibi khe mithi bani balam ha juruyaba thi du: 2mosol joyayaba Madai ning, jenba ni sagang ha ning bo hanggai kha, thaoglao ni hayu khe asa ja hi, 3bo thaoglao ni hayu khe bo bubli ha ning bai hi, phnu kha, bo grao khe bai mani khusi khe, Madai jini sogoyahsa grao riba lai deng rijaoyaba ang se.

4Ning lonma masi jayaba, ani basa hamdao thaoyaba niha: Bupha jang jini sogoyahsa Krista Jisu ni phrang khasaoma jang shanti dong pha thing.

Kret hahgojo ha Tita ni khusi dangyaba

5Khusi ragao mane lagai thaoyaba buthu khe ragao rima ni khlai hi, Kret ni hahgojo hade ning khe ang garbu ba, ode ning khe ang grao riba lai ning, khrip nolei ni khraorao khe saikho lah. 6Bikhoh ni Khrao de gajai giriyaba, bihih saosi ni basai, boni basathu lonyaba, suk khlai bani balam ha gajai giriyaba, niya khala, subung suttha niyayaba jama nang du. 7Longjom ni hoja de Madai ni jinis khe naisoyaba se bani malai jang siji jaoyayaba subung jama nang du; jar ni grao se ning hamjao layaba, khah raoyaba, ju lingyayaba subung, yao sugu baiyaba, jar ni lab ne khlai hi harbaoyaba subung jama niya. 8Subung khe lamjao ba ringyaba, ode khaithiyayaba, hamba khusi khe nangjaoyaba subung, saiphuyaba subung, gasainyaba subung, subung gathar, jar sibringba ringyaba subung jama nang du. 9Bo de grao gathang gibi khe yaowai hi, bonsi khe grao slingri phu mani khlai hi, ode badaiyarao khe niyathai phu mani khlai hi, grao gathang gibi khe sling ri hi dongba lai, lonma gnang grao khe remsongyaba subung jama nang du.

Slingriyaba gajai buthu

10Bede thikhade, gabang subung buthu de grao layayaba, haglai thuyaba ode gabang thokhi baiyababo gabang dong, oleiyaba subung buthu de rasorao ni bising ha gabang bang bi. 11Oleiyarao de lasisiyaba khe jar ni lab ne khlai hi riksai re. Ode, slingriya ginyaba jinis buthu khe sling ri hi, malai ni nokhor buthu khe bonsi hamya khlai re, odebani bonsi ni bukhuh buthu khe phrao ma nang du. 12Bonsi ni bising ni subung saosi, bonsi ni gorasali ning ede thidu: Kret hahgojo ni subung buthu de asaba bubli habo subung mosol, hamyayaba mih, sele, haslarao se. 13Ebo sakhi riyaba grao gibi se. Odebani bonsi lonma gibi ha thangphu mani khlai hi bonsi khe sajao si jo lah. 14Judarao ni kharmu haglai ha ja thing, niya khala grao gibi khe dangkhlaiyarao grao riyaba buthu khe da mani la thing. 15Gathar subung buthu ni khlai hi de khrip jinis bo gathar se, thikhabo subung regeyarao ode lonma giriyarao ni khlai hide musibo gathar giri. Bede thikhade bonsi ni buddi ode khathai buthu bo gusu se. 16Bonsi thi du, jing Madai khe tharmai du, thikhabo, bonsi jar ni khusi jang bonsi maniya, Bede thikhade bonsi subung muji jaoyayaba se, ode grao layayaba, ode asaba hamba khusi ha yaowai jayayaba se.

Currently Selected:

TITA 1: DIMASBSI

Highlight

Copy