BAKHAN NI RAJABTHAI 42
42
PHANTHA GIN
(42—72)
Leng ni Bithai
Rajab hoja ni khlaihi: Kora ni basathu ni Maskil.
1Misai dikhongsa ni dih khe ling mane libihi dongba lai ning
O Madai, angbo ning khe khah nanghi libi re.
2Ani hayu Madai khe libihi
Madai gathang khe libihi dih gangjao du.
Madai ni sagang ha bakhali ang nujao phu ma?
3Ani mudi de sain-hor ani jimu ja kha
Ani sotrurao thi phu la re, Braha nini Madai la?
4Lailangyaba bubli khe wainso kha de ang gabang ning dukhu nang du,
Sagang ha de subung gabang khe langhi bikhoh gede thang re ne,
Bakhan ni rajabthai khe rajabhi khajama ni dongyaba bubli khe baobai re.
5Snadi jabani elai dukhi ang ja kha?
Snadi jabani elai khah ha leng ba?
Gabra ha ang ani asa khe deng nang.
Ani sogoyah ni mukhang khe naihi ang bokhe bakhan ri la nang.
6O Madai, ani khah bislei waimu nang du?
Hermon hading ha, Mizar hading ha,
Jordan raji ni phrang nalaibo ang ning khe wainso re.
7Nini dithon biring ba ode nini dithon baiphalai ba lai
Ang khe khrip gede phungkhlip kha.
8Sain habo Gabra jarni khasaoma-mayama khe phnu kha
Hor habo boni bakhan ni rajabthai jang ang khe thu ri kha
Ang khe hayu riyaba Madai niha ang bi la ma.
9Madai, ani longthaima niha
Snadi jabani ang khe blao ba,
Ani sotrurao ni yao khe snadi jabani ani basao ha hokkhlai ri ba? thihi thi nang.
10Begreng grip ba lai sosi ani sotrurao ang khe sijihi khah rain rihi thi re
Braha nini Madai la?
11Snadi jabani ani khah naikhlaihi dong ba?
Snadi jabani ani khah ha gmang-giji ja ba?
Madai niha asa deng lah,
Bokhe ang bakhan khlai ma se,
Bo ani mukhang khe majang riyaba ode ani Madai se.
Currently Selected:
BAKHAN NI RAJABTHAI 42: DIMASBSI
Highlight
Copy
Compare
Share
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
