JOHN 5
5
Dih kharnai ha hamthai
1Eboni yaohon ha, Judarao ni masi mel mani mane Jisu Jerusalem ha thang ba. 2Jerusalem ni Melma ni derga gabasi ha masi kharnai dong ba, Hebrairao ni grao jang bokhe Bethesda thi re. Boni rogong ha ronda mabowa dong ba. 3Bo ronda ha gabang limyarao-gana, khora, adur jayarao thuhi dong ba. 4Dih smaophaiba khe bonsi jon ba. Hatho hatho ha dih kharnai ha Gabrani degla akhai buhi, dih khe smao phai re. Dih maoba ha, sere dih ha hapsing da du, boni limthai asaba ja la thing, bo ham lang du. 5Oraha subung saosi dong ba, maithai thimjhi maithaijaih sosi limhi thao ba. 6Jisu bokhe oraha thaolaba khe nu ba, ar bo oraha dongyaba bubli lao kha thihi tharmai ba, ar boni ha, Ning ham mane nangjao du? thihi bokhe sing ba.
7Adur jayaba thiphin ba, Gedeba, dih maobani bubli ha angkhe kharnai ha nakhai sing ri ginyaba subung ani ha saosi bo giri. Odebani ang nakhai singma jaba ha ning, gibin subung nakhai singda lang du.
8Odehe, Jisu bokhe thiphin ba, Baija lah, nini yam khe sugu lah ode hem lah. 9Boha ning bo subung ham lang la kha, bo jarni thuyam khe sugu hi hemlang la kha.
Ebo basain jakha de Lenggo Basain se. 10Odehe, Judarao bo hamphinyaba subung niha thi ba, Ebo la Lenggo Basain se, ning jarni thuyam khe dibai mani jini dara ha giri.
11Bo thiphin ba, “Sere angkhe ham riba, bo ani ha thi ba, nini thuyam khe sugu lah ode hem lah.”
12Bonsi sing ba, Ebo khe dang mane ning khe thiyaba subung la sere?
13Thikhabo, bo subung khe sere thi hi ham ri ba subung khe bo tharmaiya. Oraha subung githimyarao hamsi ning bang bi, ode Jisu oraha ni phrang phirik phirik thang la kha.
14Yaohon ha, Jisu bo subung khe Madai khoh ha nuhi bokhe thi ba, Nai lah, duha ning ham kha! Phap khusi da dangphin, niyakhade nini basao ha hamyadao hi japhin ma se.
15Bo subung thang hi Judarao niha bokhe hamriyaba de Jisu se ning thihi khna ri ba. 16Odehe, Lenggo Basain ha ebo khusi khe dangbani Judarao Jisu khe dukhu ri ba. 17Jisu bonsi khe thiphin ba, Ani bupha nalai bo khusi dang re, angbo olei ning dang ma nang du.
18Ebo graothai ni khlai hi Judarao bokhe sthaima nangjao dao ba. Lenggo Basain baigalai bani se ning niya hi, Madai khe Ani Bupha thihi jar khe jar Madai jang baosi sugu labani khlai hi se.
Basa ni khemotha
19Jisu bonsi khe thiphin ba, Ang gibi jang nisi khe thi du, Basa sao jang musi khebo dang phuya, Bupha dangyaba nuyaba khe garhi, Bupha dangba lai se Basa bo dang re. 20Bupha Basa khe khasao du, nisi gmang mani khlai hi bo dangyaba si khe phnu ri du, ebo tha dedaoyaba khusi khebo bo ne phnu ri nang. 21Bupha githirao khe sugu hi mathang phinba lai ning, Basa bo sere nangjao ba bokhe mathang du. 22Bupha saosi ni basao habo bisar khlaiya, bisar de Basa niha yaopha thar kha. 23Khrip subung bo Bupha khe man khlai ba lai Basa khebo bonsi man khlai mane se. Sere Basa khe man khlaiya, boni haihayaba Bupha khebo man khlaiya.
24“Gibi jang ang nisi khe thi du, sere ani grao khe khnahi ang khe haihayaba khe lon kha de, thaoglao ni hayu mai ma, bisar ha gajai giriya hi dong la ma, githi ni phrang baigo hi hayu ha hapsing ma. 25Ang gibi jang nisi khe thi du, bo bubli sophaima ja kha, duha bo sophai sai kha, githirao Madai ni Basa ni khurang khe khna nang, sere khna ba, bo thanghi dong nang. 26Bupha bedehe hayu ni yaderma jaba lai ning, Basa khebo hayu ni yaderma jamane ri ba. 27Odehe, Marsi ni Basa jabani bokhe bisar khlai mani khemotha bo ri ba. 28Ebo buthu khe da gmang; bubli sophai ma ja kha, bo bubli ha githirao boni khurang khe khna ma, 29Ode, jarni mangkhlong ni phrang baigo ma. Hamba khusi dangyarao hayu khe mai hi baijaphin ma, hamya khusi dangyarao de gajai jahi baijaphin ma.”
Jisuni sakhi
30“Ang sao jang musi khebo dang phuya, ang khe thiba lai ning ang bisar khlai re, ani bisar gibi se. Ani nangjaoma lai ang dang ma baoya, ang khe haihayaba ni nangjaoma khe ning ang dong ba se.”
31“Ang jar ni grao khe se ning thikha de, ang grao sainthiyababo gibi ja nang niya. 32Thikhabo, ani balamha grao thiyaba de gibin subung se, ar bo ani balam ha grao sainthiyaba de gibi se thihi ang tharmai du. 33Johan niha nisi subung haiha kha, bo gibi khe se ning bonsi khe tharmai ri kha. 34Subung ni sakhi ang nang bani niyahi, nisi golam mai mane nisi ne bo grao buthu khe ang thi du. 35Johan de thaophari sringyaba ar jnayaba lai se, boni jnama ha nisi khajama maima nangjao ba. 36Thikhabo, ani ha dongyaba sakhi de Johan ni sakhi thane bo dedaoyaba se. Dang mane ani ha ani Bupha riyaba khusi buthu ani khlai hi grao jo ba, ar Bupha ang khe haiha ba thihi tharmai ri du. 37Ang khe haihayaba Bupha ning ani khlai hi sakhi ri du. Musi khalibo nisi boni khurang khe khna ba giri, ar boni mukhang khe bo nuba giri. 38Ode, bo haihayaba khe nisi lonya bani khlai hi boni grao bo nisini khah ha dengya. 39Madai ni laisi buthu nisi hamsi ning phuri re, bonsini bisingha thaoglao ni hayu mai nang thihi nisi bao re. Bo buthu ani balam ha sakhi riyaba se. 40Thikhabo hayu mai mane nisi ani ha phaima nangjaoya.”
41Subung bakhan riyaba khe ang nangjaoya. 42Thikhabo, nisi niha Madaini khlai hi hamjaoma giri thihi ang mithi du. 43Ang Bupha ni hukhum jang phai du, thikhabo nisi ang khe lamjaoya; malai jarni bumu jang phaikha de nisi bokhe lamjao nang. 44Masi mang mangyaba gibi Madai ni phrang baigoyaba khe bakhan rima smaiya hi jar jar khe bakhan rima baokha de, bedehe nisi lonphu ma? 45Nisi khe Bupha niha ang thising ma thihi da bao; nisi khe thisingyaba saosi subung dong, bo de nisini asama dengyaba Moses se. 46Nisi Moses khe lonkha de, ang khebo lon nang mu, bo de ani balam ha grao rebyaba se. 47Bo grao rebyaba khe nisi lonya kha de, bedehe ang grao sainthiyaba khe lon ma? thihi thi ba.
Currently Selected:
JOHN 5: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.