JOHN 4
4
Jisu ode Samarijik
1Jisu thangpha lang ba, ode baptisma bo ripha lang ba, odebani Johan tha bangdao hi boni rikphayarao ja ba thihi Pharisairao khna ba. 2(Jisu jar de baptisma riya, thikhabo boni rikphayarao se ri ba.) 3Jekhali Jisu ebo khe tharmai ba, bo Judai raji khe gar ba, ode phin phinsi Galili ha thangphin ba. 4Samari haphai khe lama ha bailang ma nang du.
5Samari haphai ni masi nolei Sukar thijaoyaba ha sophai ba. Ebo nolei ha Jakob jarni basa Josep ne riyaba hah hari se. 6Jakob ni dihkhor oraha dong ba. Jisu lengjao kha bani dihkhor gabaha kham ba. Bo bubli de sainjer bubli beren se.
7Boha saosi Samarijik dih khao mane phai ba. Jisu bokhe thi ba, Ning anthane dih ling mane ri lah. 8(Boni rikphayarao jikhu lingkhu barai mane nolei ha thang ba.)
9Haingajik Jisu khe thiphin ba, Ning saosi Judasa, ode ang saosi Samarijik se. Bede khlaihi ning aniha dih ling mane sainling ba kho? (Bede thikhala, Judarao Samarirao jang musibo dopha laiya)
10Jisu bokhe thiphin ba, Jodi ning Madai ni yaosandi khe ar nini ha Dih ling ri lah thihi thiyaba khe mithi re thikhade, ning boni phrang dih sain mai ma, ode bo ningthane dih gathang khe rima mu.
11Haingajik bokhe thi ba, Gedema, nini ha dih khao mane musibo giri, ode dih khor bo thubi, thikhala, ebo dih gathang khe ning braha ni phrang mai phuma kho? 12Jini phagara Jakob ebo dihkhor khe galang ri ba, ode boni jarni basathubo ode mih buthu jang jarbo ebo dih khe ling ba. Ning jini Abai Jakob thabo dedao kho?
13Jisu thiphin ba, “Sere ebo dihkhor ni dih khe ling re, khrip bo dih gangphin ma se. 14Thikhabo, ang bone riginyaba dih khe sere ling re thikhade, dih gangphin thaoya kha. Ang riyaba dih boni khasu ha dihmu ni dih baigo songba lai thaoglao ni hayu lai jama se.”
15Haingajik boni ha thi ba, Gabra, bo dih khe anthane ri ri, odese ang dih gang phinya ma, thikhase ang eraha dih khao mane phaima bo nang nang niya kha.
16Jisu bokhe thi ba, Thang, nini nohbra khe long tha, ode phaiphin.
17Bo thiphin ba, Ani nohbra giri.
Jisu bokhe thiphin ba, Ning ebo khe thila du, nini nohbra giri, thikhade ning gibi khe ning thiba se. 18Nini nohbra bowa dong ba, ode ning duha sere miyah jang dongpha ba, bobo nini nohbra niya. Odebani ning snadi khe thiba bo gibi se.
19Haingajik thi ba, Gedeba, ang baophnang ba lai thikhade ning saosi gorasali se. 20Jini phagrarao ebo hading ni basao ha se Madai khe khlim re. Thikhabo ning Judarao thi ri du, jing khlim mani bo hathan de Jerusalem ha se.
21Jisu bokhe thi ba, Haingajik, ang grao thiyaba khe lon lah, ebo hading ha se ning niya hi, Jerusalem ha se ning niya hi, Bupha khe nisi khlim mani bubli sophai kha. 22Nisi Samarirao sere khe nisi khlim ba, bo khe nisi tharmaiya. Thikhabo, jing Judarao sere khe jing khlim ba, bokhe tharmai du. Bede thikhala, sogolam de Judarao ni phrang se ja ma. 23Thikhabo, bubli sophai du, ode sophai hi ning dong, bedehe gibi maniyasa Bupha khe Bese ode gibi jang khlim ma se. Bede thikhala, Bupha jarni khlai hi olei khlimyasa khe smai du. 24Madai ning Bese. Odebani bokhe maniyarao si Bese ode gibi jahi mani ma nang du.
25Haingajik thi ba, Ang tharmai la du, Messiah (Krista thiyaba) sophai ma ja kha, jekhali bo sophai nang thikhade khrip jadi khe bo jinthane thi ri ma.
26Odehe, Jisu bokhe thi ba, Ang snadi grao khe ning jang sainlai ba, bo ning ang se.
27Boha ning boni rikphayarao sophai ba, ode haingajik saosi jang bokhe sainlaiba khe nuhi gmang giji jalai ba. Thikhabo, Ning bo haingajik niha snadi khe nangjao ba? Bo jang ning snadi jabani sainlai ba? thihi saosi bo singya.
28Odehe, haingajik jarni dihdig khe galang hi nolei ha thangla ba, ode subung niha sainthi ri ba. 29Phai, ode saosi subung khe nai lah, sere ang snadi khe dangba bo buthu khrip khe anthane sainthi thar ri ba, thikhala, bo ning Krista niya kho? 30Bonsi nolei ni phrang baigo hi boni gede thang ba.
31Boha ning, boni rikphayarao Jisu niha khainsu ba, Rabbi, asaba khe ji da lah.
32Odebani, Jisu bonsi niha thi ba, Ani ha jimani khlai hi oleiyaba jikhu dong, bokhe nisi mithiya.
33Odehe, boni rikphayarao saosi jang saosi thilai ba, Sereba saosi bonthane jimani khlaihi asaba khe labu ri ba?
34Jisu thi ba, Ani jikhu de ebo se, sere ang khe haiha ba, boni khusi maphi ang dang ma nang du, ode boni khusi khe bo dangso rima nang du. 35Nisi edehe thi du, Ra bli jamane duha nokha dainbri lai dong kho. Thikhabo, ang nisi khe thi ri du, jarni muthai khe sugu hi hadih gede nai lah, bo buthu ra mani khlai hi minthar kha. 36Ode rayarao bo yaowai mai du, thaoglao ni hayuni khlai hi mai khe bojom khlai du. Odese, gaiyaba ode rayaba gini bo mili lai hi khaja ma. 37Ebo grao de gibi se, Saosi gai re ar gibin subung ra re. 38Ang nisi khe bo hadih ha ra mani khlai hi haiha ba, braha ning dukhu khlaiya, gibin se dukhu khlai ba, odening boni dukhu ni khlai hi maiyaba ha nisini phantha dongpha ba.
39Bo noleini Samarirao Jisuni basao ha gabang ning lon ba, bede thikhala bo haingajik sainthi riba, Ang snadi khe dang ba, bo khrip khe aniha thiri ri ba. 40Odehe, Samarirao boni ha phaihi khainsu ba, bonsi jang dongpha mane bokhe khainsu ba. Odebani bo oraha nokha saingini dong lang ba.
41Ode boni grao ni khlai hi bangdao hi subungrao bokhe lon ba. 42Bonsi haingajik niha thi ba, Duha de ning thibani thihi de jing londaoya. Jing jar ning khna la kha, ode tharmai kha, ebo ning phirthi ni sogoyahsa se.
Gedeba ni basa khe ham riba
43Nokha saingini ni yaohon ha, bo hathan khe gar dada, Galili gede thang la kha. 44Jisu jar ning thi la ba, Gorasali de jarni raji ha de man maiya. 45Jisu jekhali Galili ha sophai ba, bo raji ni subung buthu bokhe khaja hi lamjao ba. Bede thikhala, Jerusalem ha Baiglai ni Busu ha bo bislei khusi dang ba, bonsi khrip nu thar ba, bo Busu ha bonsi khrip dong ba.
46Odehe, Galili raji ni Kana nolei, dih khe ju jariyaba hathan ha phaiphin ba. Oraha, sorkar ni saosi gedema dong ba, boni basa lim hi Kapernaum ha thao ba. 47Bo gedema Jisu Juda raji ni phrang Galili ha sophai kha thihi khna khali ha, boni ha thang ba, ode Kapernaum ha thang hi boni basa khe ham rimane khainsu ba, bo ansa de thih ma jahi dong ba. 48Jisu boni ha thi ba, Nisi gmang thaosisiyaba khusi ni sin khe dangphu ba nuya si de nisi long nang niya.
49Gedema Jisu niha thi ba, Gabra, ani basa thih mani sagang ha sohima nang du.
50Jisu bokhe thi ba, Thang phin lah, nini basa ham kha.
Jisu thiyaba grao khe lon hi bo subung thang la kha. 51Bo lama ha hem saiba ha boni saosi dangyasa boni ha graojma sainthi ri ba, Nini basa ham kha.
52Bo bonsi khe boni basa hamphin bani bubli khe sing ba. Bonsi thiphin ba, Miyani bubli masni ha boni limma ham kha. 53Bo ha, ebo bubli ha ning Jisu bokhe, Nini basa ham kha thi kha thihi boni bupha wainso phin la kha. Odehe, bo ode boni nokhorsi bo lon ba.
54Judai raji ni phrang Galili ha phai hi ebo gmang thaosisiyaba sin khe Jisu dang phnuyaba dang gagin se.
Currently Selected:
JOHN 4: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.