DANGYASARAO 28

Malta hahgojo ha

1Hamhi jing go bani yaohon ha se, bo hahgojo ni bumu khe Malta thihi jing tharmai kha. 2Bo raji ni subung buthu jing khe hamsi ning khasao hi, hadi hahi bonsi magain jao bani, bonsi wai suhi jing khrip khe bonsi khaja ba. 3Boha, Paul bon khathaisi, wai ha sao ba, ode bo dung bani jbu baigo phai hi boni yao ha repding ba. 4Bo raji ni subung buthu boni yao ha jbu diyaba khe nuhi bonsi thi ba, Ebo subung de subung sthaiyaba se, sagor ni phrang khai la khabo, baslai layaba de bo thang nang niya kha. 5Thikhabo, Paul ning jbu khe wai ha thisa khlai hi, bo musibo jaya. 6Bo dukhu dada, srap galai hi thih nang thihi bao ba. Odebani, budu galao jon hi bonsi nai ba, thikhabo bo de musibo jaya thihi bonsi tharmai hi, bonsi jarni baothai slai dada thi ba, Ebode Madai se, thihi bonsi thi lai ba.

7Bo hathan sere bere ni hahgojo ni Raja Publia ni hathan jang raji dong ba. Bo jing khe jarni noh ha lang hi, nokha saintham sosi nohma thao ri kha. 8Publia ni bupha de limba jang hoh thangba jang jahi thuyam ha bo thuhi dong ba. Paul bokhe nai hi boni bokhro ha yao deng hi Madai bi dada bo hamlang la kha. 9Boni yaohon ha de, bo hahgojo ni gibin subung limyaba sayaba khrip boni ha phai hi, bonsi hamthar ba. 10Bonsi hamsi ning jing khe bakhan khlai hi, mophosol thangba ha jing nangba si khe rung basao ha bonsi jinthane deng ri ba.

Paul Rom ha sori kha

11Nokha dain tham ni yaohon ha masi rung, maising ha bo hahgojo ha dongyaba, Aleksandria ni rung Diaskuro thiyaba ha jing thang la kha. 12Surakus nogor ha jing sohi dada, oraha nokha saintham jing dongthao ba. 13Oraha ni phrang jing daoding hi, Rhegium ha jing sohi kha; ode sainsong sainsi sain kharthi yaoda ni phrang bar sip hi, gibin basain ha Puteoli ha jing sophin hi kha. 14Oraha ni daphlungrao khe jing goron hi, bonsi niha sain sni dongthao mane bonsi jing khe mathao ba; ode, olei jing thangpha lang hi Rom nogor ha jing sohi kha. 15Rom nogor ni daphlungrao jini graojma khe khnaba jang Appia Dukhan jang Naorai nothao magatham sosi bonsi jing khe lamjao ba; bonsi khe nu dada Paul Madai niha khajama ni grao thi dada, bonsi khitha raodao ba.

Rom nogor ha Paul grao thi ba

16Rom nogor ha jing hap hiba jang Paul khe siphaiya saosi jang noh gibin ha dong mane bonsi hukhum ri kha.

17Nokha saintham ni yaohon ha, Paul oraha ni Juda ni hojarao khe bo longthim ba. Ode, bonsi phaiba jang bonsi niha thi ba, Daphlung rao, jini phagrarao ni Dara baiglai hi ja thing, musi ani dang gajai giri hibo Jerusalem ha ang khe bonsi remhi, Rom sorkar ni yao ha ang khe ri ba. 18Bonsi ang khe singbrim hi ani basao ha, thih mane sosi bonsi musibo gajai maiya bani bonsi haigerma bao ba. 19Thikhabo, Judarao bo khe bonsi niya bani Kaisar niha soya hi jaya bonsi ang khe khlai ba; thikhabo, ani greng buthu khe gajai khlai mane ang ebo khe dangya. 20Odebani, nisi jang ang goron laima nangjao hi nisi khe ang longthim ba, bede thikhade, Israelrao asa khlai du, Mesia ni khlai hi ang sikhol jang khajao du, bo ode thi ba.

21Bonsi thiphin ba, Judai raji ni phrang nini grao ni balam ha musi khebo laijma jing maiya, daphlungrao ni bising ha nini grao ni balam khe hamba gede ja thing, hamya gede ja thing, sainthi mani khlai hi saosibo phaibabo bonsi phaiya. 22Ebo dol khe khrip hathan ni subung sijiyaba khe jing khna hi, nini baothai khe jing khna ma nangjao ba, bonsi ode thi ba.

23Ode, bonsi basain deng hi, bo basain ha de bo nohma thaoyaba noh ha gabang subung boni ha phai ba, phorong ni phrang sainbli sosi, bonsi niha bo grao khe thiphla rihi Madai ni raji ni grao khe bonsi ne sakhi ri dada, Moses ni Dara ni sastro grao ode gorasali ni sastro laisi ni grao jang Jisu ni gede bonsi khe bujai ba. 24Boha gejesi bo grao thiyaba khe bonsi lon ba, ode bonsi gejesi de lonya. 25Odebani, bonsi miliya jahi, Paul ebo grao thaisi khe thihi bonsi baigo lang la kha. Bo grao thiyaba de ebo se: Bese Gathar jang gorasali Isai ni khuh jang nisi ni greng buthu niha thilangyaba grao hamsi ning gibi ja kha! 26Bede thikhade, bo thi ba,

Thang hi ebo subung buthu niha sainthi lah

Khmao jang nisi khna nang, thikhabo nisi buji nang niya,

Nuba de nisi nu nang, thikhabo nisi nuphu nang niya.

27Bede thikhade, ebo jadi buthu ni khah rao kha,

Bonsi ni khmao nathong ja kha

Bonsi mudim thar kha.

Ode niyakha de jini muthai jang jing nu nang,

Jini khmao jang jing khna hi

Jini khah jang jing buji nang.

Ode niyakha de jing phaiphin nang

Ode bo jing khe ham ri jao nang bonsi ode thi ba.

28Odebani, Madai ni sogolam ni grao khe Jentailrao niha haiha ba, ode bonsi khnabo khna ma se, bo ode thiba. 29Ebo grao buthu khe Paul thi bani yaohon ha, Judarao de degaothar ba, ode, bonsi jar jang jar hamsi ning grao banglai ba.

30Paul de nokha maithaigin noh bara lahi bo dong ba, ode boni ha phaiyarao si khe bo khaja hi lamjao ba. 31Madai ni raji ni grao khe bo sainthi ba, ode Raja Jisu Krista ni grao khebo khitha raoma jang bonsi khe sling ri re, saosibo bokhe magnaya.

Currently Selected:

DANGYASARAO 28: DIMASBSI

Highlight

Copy