DANGYASARAO 27

Paul Rom gede thang ba

1Itali raji gede rung ha thang mane bonsi bisar khlai ba jang, Paul jang baosi phatho ha dongyarao sereba buthu khe Augusta dol ni siphaiya rjasi ni hoja Julia thiyaba ni yao ha bonsi deng ba, 2Adramutiam hathan ni rung, Asia raji ni sagor ni dergong ha nolei dongyaba buthu ha thang mane rung ha jing gahi, sagor ha jing thang ba; Makedonia raji ni subung Aristarka, Thessalonika ni subung jini ha bo dong ba. 3Gibin basain ha, Sidon nolei ha jing thang ba, ode Julia Paul khe khasao hi, boni lugurao niha smao ri mane khlai hi bo daobaima haiha ba. 4Oraha ni phrang, sagor ha jing thangphin hi, bar jang niyayaba gede siplang bani bar raoyayaba Kupra hahgojo gede jing thang ba. 5Ode, Kilikia raji jang Pamphulia rogong ha, sagor khe lailang bani yaohon ha, Lukia raji ni Mura nogor ha jing sohi kha. 6Oraha siphaiya rjasi ni hoja de, Aleksandria nogor ni rung, Itali raji ha thangginyaba bo mai hi, oraha bonsi jing khe ga ri ba.

7Gabang basain khre khre jing thang hi Knidos nogor phrangsong, dukhu jang blaiya si sohi, bar jang bo mathao bani Salmoni nolei rogong rogong thanghi Kret hahgojo bar giriyaba gede jing thang ba; 8boha, gabang dukhu jang hakhong ha dopha hi rung mathao than majang ha jing sohi kha; bo rogong ha ning Lasai thiyaba noleibo dong.

9Jing oraha gabang basain phlai kha bani yaohon ha, rung jang thangba khin kha bani, bo bubli ha hoh khongja dong bani basain khe lailang kha; odebani, Paul bonsi khe ede thi hi bujai ba, 10Hoi lugurao, duha jing rung ha thangba ha de hamya jang jamyaba hamsi ning jing goron ma se thihi ang tharmai du. Jinis jang rung ni basao ha se ning ang thiya, jini basao habo ang thiba se, thihi bo thi ba. 11Thikhabo, siphaiya rjasi ni hoja de Paul grao thiyaba thane rung soleiyaba jang rung bubra ni grao thiyaba khe se bo londao ba. 12Bo rung mathaothan ha magainba khe phlai mane asa giri bani, subung bangdao hi, oraha ni phrang baigo dada Phoiniki nogor ha, asaba dara jang sohi, oraha maising magainba khe phlai mane bonsi saikho ba. Phoiniki nogor de masi Kret hahgojo ni rung mathaothan se; ode, sain kharthi yaoda, sain kharthi yaosi gede mukhang sagang hi dong ba.

Sagor basao ha baryungma goron ba

13Sain yaosi gede ni phrang barsra sip ba jang ning, jini nangjaoma khe phura mai kha bao hi, serni khungkhai jang khaikhu ba, ode hahgojo ni hakhong khe bijing bijing dopha hi thang ba. 14Thikhabo, khaisa yaohon ha hakhong gede ha baryungma sip phai ba, bo bar ni bumu de Eurokuilo thi re. 15Boha, rung khe baryung sip pha phai hi, sagang gede bar jang jaophuya hi jing haiger kha, ode bar jang jing khe langla kha. 16Kaoda hahgojo gijisa ni rogong ha lailang ba ha jing baryung ni phrang gijisa sogoma mai kha, dukhu jang rung khasiba khe jing sogo phu kha. 17Rung khasiba khe rungma ha sugu dada berkhaoya mani wadu jang hamsisi bonsi repding ba. Libua raji ni dergong ha, sirtia hajengling ha sip hi langjaoma khin bani, rung ha khasiyaba khe kho khlai ba. Odebani, jing bar jang langpha lang kha. 18Baryung jang dithon baikhu hi ning dong bani dakhna ha de rung ni jinis buthu khe danghun phin kha. 19Dakhna soniha de bonsi ni yao jang ning rung ni jinis buthu khebo dangkhlai phin kha. 20Basain galao sain jang sathrai khebo nai ba maiya. Bar jang hamsi ning raohi jing khe ripha phai du, jing thang hi dong mane asa giri kha.

21Bonsi budu galao makham jiya hi dong bani yaohon ha, Paul bonsi ni gejer ha song hi thi ba, Ajurao, Kret ni hahgojo ni phrang jing baigoya kha de elei hamya jang gmayaba khe jing goron nang niya mu. 22Thikhabo, asaba bo khah santi jang dong mani khlai hi ning khe jing sibring du, nisi ni bising ha saosi bo nisi ni hayu gma nang niya, thikhabo rung de gma ma se. 23Sere Madai ni khusi khe ang dang ba ar sere khe ang khlim ba, boni degla saosi dini hor ha ani rogong ha songphai hi, ani ha thi ba, 24Hoi, Paul, da khin, Kaisar ni sagang ha ning songma nang ma; ode, nai lah, rung ha ning jang baosi thang phayarao khrip khebo ebo Madai ning ninthane riba se. 25Odebani, ajurao, nisi khah santi jang dong lah; Madai khe ang lon du, bede bo ang khe thiba, olei ning jama se. 26Thikhabo, asaba hahgojo masi ha bo jing khe siplang ma se.

27Andria sagor ha ejang nar, ojang nar ha bar jang sipding hi sipding hi, bohor jang bisagin horbri phura jaba ha, hokjer ha rung ni subung buthu asaba raji ni rogong ha soma ja kha thihi bonsi tharmai kha. 28Odebani, dihthuba khe bonsi suhi lamkhon jadu thihi bonsi tharmai kha. Ode khaisa thang hi olei ning bonsi suphin ba, ode dihthuba lamjra jadu thihi bonsi tharmai kha. 29Rung khidung gede ser ni khungkhai mabri bonsi dangsing ba, ode niyakha de longthai ling hathan ha jing siplang jao mane khin ba, odebani nokha naiba khe jonso phuya ja ba. 30Boha, rung ni subung buthu de rung ni bokhro gede ser ni khungkhai khe dangsing ma lai jamai si hi rung khasiba khe sagor ha bonsi dangsing hi rung khe dangkhlai langma bao ba. 31Boha ning, Paul siphaiya rjasi ni hoja jang siphaiyarao niha thi ba, Ebo buthu de rung ha ning dongya thikha de, bonsi go nang niya. 32Odebani, siphaiyarao de rung khasiba ni wadu buthu khe raso hi bonsi gajao ri kha.

33Nokha naima japhai hi, Paul khrip subung khe makham ji mane haiha ba, Dini ha basain sain jhi bri phura ja kha, musi khe bo jiya hi nisi jon ba, nisi jiya hi ning dong ba. 34Odebani, nisi khe makham ji mane khlai hi ang haiha du; nisi ni bising ha saosi bo boni khnairim rimsi jahi bo gma nang niya, thihi bo thi ba. 35Ebo grao khe thi blai hi, Paul hon laha dada, khrip subung ni sagang ha bo Madai niha hamjaoma ni grao khe bo thi kha, ode, saso hi bonsi ji jen kha. 36Bonsi khrip bo santi jang ji lai kha. 37Rung ha subung gayarao khrip jang rjagin bisatham jhidoh jing ja du. 38Bonsi jihasi ji blai bani yaohon ha rung khe rejengdao ri mani khlai hi bonsi ni mairong khe sagor ha dangsing kha.

Rung hamyaba

39Sain baigoba jang, hakhong khe braha ja lang kha thihi bonsi tharmaiya ja ba; thikhabo, wari gede rung khe hajengkhong ha deng ma bao ba. 40Ser ni rung khaithao ni wadu buthu khe bonsi raso hi, sagor ha haiger ba. Bo jang baosi baitha khayaba buthu khebo khuru hi, rung ni sagang gede rilamyaba khe barmai mane bonsi guju sugu ba, ode hajengkhong gede bonsi thangpha lang kha. 41Thikhabo, diraoyaba dibra magin suphlayaba hathan ha jing hapma khe khin hi, rung khe hah ha baipha ri kha. Odebani, rung bokhro gede sagai hi, smao phuya hi ning thao kha, thikhabo rung ni khidung gede dithon jang berekkhao ba jen kha. 42Boha, siphaiyarao phatho ha dongyarao khe sthai mane bisar khlai ba, ode niyakha de, dih riyao dada bonsi khailang ma se thihi bonsi khin ba. 43Thikhabo, siphaiya rjasi ni hoja Paul khe sogoma nangjao hi, bonsi khusi dangma baoyaba khe bo magna ba. Dih riyaoba ringyarao khrip sagor ha birsing hi hakhong ha sagang baigoda mane ode, 44subung gibin buthu khe, gejesi bongkhlap basao buthu ha, gejesi gibin jinis buthu ha gakhu mani khlai hi bo hukhum ri ba. Olei ning bonsi jamthar si hakhong ha gakhu hi gothar kha.

Currently Selected:

DANGYASARAO 27: DIMASBSI

Highlight

Copy