1 THESSALONIKA 5
5
Gabra ni bubli ne khlai hi salai lah
1Daphlungrao, bo bubli jang basain ni balam khe de nisi ne reb ridao ma nang daoya. 2Bede thikhade, Gabra ni basain de hor ha makhao lai se bo phai ma thi hi nisi jar ning hamsisi tharmai la du. 3Subung buthu, Khaja sisi musi khebo khin mane giri thi hi bonsi thisaiba ha ning masainjik sao goba ha saba lai, bonsi ni basao ha jamyaba de srap sophai nang, ode bo bubli khe saosi bo laiphu nang niya. 4Thikhabo, daphlungrao, nisi de bo basain ha makhao lai nisi ni basao ha phai mane da gmang, bede thikhade nisi andar ha dongya. 5Nisi khrip bo jnayaba ni basathu se, nisi jamthar si sain ni basathu gaja se; odebani, jing hor ni subung niya kha, ode andar ni subungbo niya kha. 6Odebani, gibin subung buthu lai thu hi da dong si, jing smao hi salai hi dong lai nang. 7Bede thikhade, thuyarao bo hor ha se thu ba, ju baola jayaraobo hor ha se ju baola ja ba. 8Thikhabo, jing de sain ni subung se bani, lonma jang hamjaoma ni phi khe pha hi, sogoma ni asa khe khrothu yaowai hi salai dada jing dong la nang. 9Thamsi jang dukhu ri mani khlai hi, bo jing khe saikhoya, jini Gabra Jisu Krista ni gede ja hi sogoma mai mane se bo jing khe saikho ba. 10Jing smao lakhabo, thu lakhabo, bo jang baosi jing thang hi dongphu mani khlai hi, bo jar ning jing thima ni baslai ha jar thih kha. 11Odebani, nisi nalai dangba lai ning saosi jang saosi khe shanti ri lai hi, nisi rao ri lai lah.
Sibringma jang khlim ba
12Daphlungrao, nisi khe ang khainsu du, nisi ni bising ha dukhu jang khusi dang hi, Gabra ha nisi ni gedebarao ja hi nisi ne slingriyaba khe man khlai lah. 13Bonsi khusi dang bani hamjaoma jang hamsi ning guju bao hi nisi mililai hi dong lah.
14Daphlungrao, nisi khe jing khainsu du, selerao khe ran lah, khah ha raoyayarao khe sibring lah, leng jaoyarao khe juru lah, ebo buthu khrip ni basao ha khah lao hi dong lah. 15Saosi khebo hamyayaba khe hamyayaba jang suphinya mani khlai hi girik lah, hamba khusi khe dang ri mane nisi smai lah, khrip niha hamba khusi dang mane chesta khlai lah.
16Nalai bo khaja lah, 17thaoya si Madai bi lah, 18khrip ha khajama ni grao khe sainthi lah, ebo khe nisi ni khlai hi Krista Jisu hade Madai ni nangjaothai se.
19Bese khe da sthai, 20grao sainthiyarao khe mujiya da ja bai, 21Khrip grao khe nai nai hi, beleiyaba hamdao bokhe remsong lah. 22Khrip jadi hamya ni phrang go hi dong lah.
23Shanti ni Madai jar ning nisi khe phura gathar khlai thing; jini Gabra Jisu Krista phaiphin ba bubli sosi, nisi ni bese jang nisi ni khasu ode nisi ni saomang khe musibo gajai giri hi phura raokhi la thing. 24Nisi khe longyaba de lonma gnang se, ode dangbabo olei ning dang ma se.
25Daphlungrao, anthane khlai hi Madai bi ri lah.
26Khrip subung khe gathar khudimthai jang khlim lah.
27Ebo laijma khe khrip khna hi phuri mani khlai hi Gabra ni bumu jang ang nisi khe khainsu du.
28Jini Gabra Jisu Krista ni khasaoma nisi niha dongpha thing.
Currently Selected:
1 THESSALONIKA 5: DIMASBSI
Highlight
Share
Copy
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
