1 KORINTH 7

Dising bani balam ha nam khormu

1Duha, nisi ni grao rebyaba ni balam ha de:

Miyahsa ni khlai hi masainjik jang dophayayaba hamdao 2Thikhabo, gaori jaba khe khin bani asaba miyahsa ni bihih masi ja thing, odehe asaba masainjik ni basai masi ja thing. 3Basai de bihih niha sisaigin jayaba ni phantha khe ri la thing, olei jasosi ning bihi jayaba bo basai ne khlai hi boni phantha khe ri la thing. 4Bihih de jarni saomang ni basao ha hukhum giri, boni basai niha se hukhum dong ba; olei jasosi ning, basai bo jarni saomang ni basao ha hukhum giri, boni bihih niha se hukhum dong ba. 5Nisi saosi jang saosi gibin da dong, thikhabo khaisa bubli sosi ne khlai hi jar jarni hainthi jang Madai bi mani khlai hi gibin dong lah, thikhabo srap mili lai lah, odehe masi jahi dong lah. Ode niyakha de, khah ha mathao phuyayaba ni khlai hi Soithan nisi khe thokhijao nang.

6Thikhabo, ebo grao khe grao riba lai smai hi ang thiba niya, riyaba grao ni balam ha se ang thi ba. 7Khrip subung ang lai jamthar si ja mani ang nangjao du; thikhabo, khrip subung de Madai ni phrang jinis riyaba khe bonsi mai lai kha, sereba bajangbai gede, sereba jakha de gibin gede.

8Duhabo maiyayarao odehe banjikrao de ang lai ning dong kha de bonsi ni khlai hi ham nang thi hi ang bao du. 9Bonsi dong phuya khade, miyah bo masainjik bo noh ja la thing. Saomang ni nangjaoma khe mathao phuya thikhade noh jaba hamdao.

10Noh jayarao niha ebo grao khe ang ri du, (ang riba niya hi Gabra se ri ba), bihih jayaba jarni basai jang da degaolei thing. 11Thikhabo, gaolei khade basai gibin laya hi dong la thing, niyakha de jarni basai jang miliphin la thing; odehe basai jayaba bo jarni bihih jang da gaolei thing.

12Khrip subung gibin buthu niha Gabra niya hi, ang ning thiba se: Daphlung asaba bo lonyayaba khe noh jahi, boni bihih de boni ha dongsongma nangjao khade bo jang gaolei ma niya. 13Odehe masainjik asaba bo lonyayaba jang noh jahi, boni basai de boni ha dongsong ma nangjao khade bo jang gaolei ma niya. 14Basai lonyayaba de jarni bihih ni khlai hi gathar khlaijao ma; bihih lonyayaba bo jarni basai ni khlai hi gathar khlaijao ma se. Ode niyakha de nisi ni basathu gusu jama se, thikhabo, bonsi gathar se. 15Thikhabo, lonyayaba ning gaolei ma nangjao kha de, gaolei la thing. Oleiyaba grao ha de, bahandao ja thing, buphlung ja thing, khajaoya kha. Thikhabo, Madai de milima ni khlai hi se nisi khe long ba. 16O masainjik, nini basai ning khe sogo mani ar sogoyah mani bedehe ning mithi ba? O basai, nini bihih ning khe sogo mani ar sogoyah mani ning bedehe mithi ba?

Madai ning khe longba lai ning dong lah

17Asaba ja thing, Gabra khrip subung ni dongthai bede riba odehe Madai bo longthai lai ning dongpha lang thing. Ebo de longjom khrip ne ani dara khe ang slamyaba se. 18Jogai bujuh rasoba ni yaohon ha longjaoya ba dong? Sjam ma da bao thing. Jogai bujuh raso jaoya hi longjaoyaba dong? Da raso thing. 19Jogai bujuh rasoba de musibo niya, jogai bujuh rasoyayaba bo musibo niya, bo nangdao thaoyaba de Madai grao riyaba khe maniyaba se. 20Khrip subung bedehe longjao ba, olei ning dong la thing. 21Ning khe leng ne khlai hi se long ba thikhade ning waimu da nang, thikhabo, ning sadhin ja kha thikhade olei ning khusi dang lah. 22Leng jahi Gabra ha longjao hi dongyaba de Gabra nisi khe leng ja riyaba leng se, olei jasosi ning leng niya hi, longjaoyaba de Krista ni leng se. 23Dam jang nisi khe barai kha; subung ni leng ha da dong si. 24Daphlungrao, nisi sadhin ne longjaoyaba, oraha ning Madai jang baosi dong lah.

Naga mala ode banjikrao

25Duha, naga mala gatharrao ni balam ha de Gabra riyaba musi khebo ang maiya, thikhabo, Gabra khasao bani khlai hi lonjao ma ang ja bani dara jang ani baothai khe ang ri du.

26Duha ni khah waimu khe bao hi, jar nalai dong ba lai dongba de hamba se thihi ang bao du. 27Bihih jang ning khahjao ba? Gaolei ma da bao thing, ning bihih maiya kho? Bihih giri thikhade bihih da smai lah. 28Thikhabo, ning noh ja lakha bo ning phap khlaiya; ode mala noh ja lakha bo phap khlaiya. Thikhabo, miyah masainjik noh jayarao de bonsi thanghi dong bani bubli ha gabang dukhu jama se, bokhe se ang de sogoma bao ba.

29Daphlungrao, bubli gabang songthe kha bani, ebo grao khe ang thi du; duha ni phrang de, bihih maiyaraobo bihih giri lai dong la thing. 30Odehe khahbai hi grayarao bo khahbai hi graya lai dong la thing, khajayarao bo khajaya lai dong la thing, jinis braiyarao bo giri lai dong la thing, 31odehe habsao ni jinis buthu ha gmayarao gmaya lai dong mane ang nangjao du. Duha habsao ni dongthai slaipha lang du.

32Khah waimu giri hi nisi dong mane ang nangjao du, bihih maiyayaba miyah de Gabra khe khaja ri mani khlai hi Gabra ni jinis buthu ha bo khah waimu nang re. 33Thikhabo, bihih maiyaba de, jarni bihih khe khaja ri mani khlai hi habsao ni jinis gede bo khah waimu nang re, 34odebani, basai maiyaba jang mala gathar de baosi jaya; basai maiyayaba de jar ni saomang jang jar ni bese ha gibi jang gathar jahi dongphu mani khlai hi Gabra ni jinis gede boni khah waimu nang re, thikhabo basai maiyaba de jarni basai khe khaja riphu mani khlai hi habsao ni jinis gede boni khah waimu nang re.

35Ebo khe nisi ne ham mani khlai hi se ang thi ba, nisi khe wadu jang kha mani ang thiya. Nisi majang sisi dongphu mani odehe, Gabra ni khusi khe gibi jang nisi dangphu mani khlai hi se ang thi ba.

36Asaba subung bo, jarni bihih ne sandi rihi dising jaoya kha thihi bisar khlai du thikha de, boni balam ha de bonsi ni sandi dangsing jaoyaba ni gede ha gajai khe bonsi mithi khade, bo masainjik de noh jaya hi thao la ma se; bobo thaojao phuya thikha de, bo nangjaoba lai ning noh ja la thing. 37Thikhabo, noh jamani bol jang nesingya hi, bo noh ja ma nangjaoyaba lai ningbo dong ma bao kha de, bo masainjik niha sandi dangsing hi noh jaya hi dong ba de hambi. 38Odebani, bo mala niha sandi dangsingyaba noh jayaba de hamba khusi dang ba se; bo noh jayayaba de hamba dangphin dao ba se.

39Bo masainjik de jarni basai thang hi dong du si de bo khajao kha. Thikhabo, boni basai thih kha de, bo nangjaoba lai japhu mani khlai hi bo sadhin mai kha, thikhabo, bo subung de Gabra niha dongyaba subung ja ma nang du. 40Thikhabo, ani baothai hade bo dongyaba ha ning dongsong khade, bo ar khajadao ma se. Ang bo Madai ni bese anihabo dong thi hi bao du.

Currently Selected:

1 KORINTH 7: DIMASBSI

Highlight

Copy