MATHI 22
22
Kiyir Benjong agi O-entepba
(Luk. 14.15-24)
1Yisui tanaben parnok den o-entepba agi jembi. 2“Kotak Yimliji chuba kati pei chir asoshi kiyir benjong ka renemba mesüker. 3Tejaokertem benjong jagi arung ta ajatsü asoshi pai pei kilirtem yok, saka parnoki maru. 4Ano pai tanüngba kilirtem yoka ashi, ‘Tejaokertem dang shiang, kü benjong renema kar, kü nashi pungchi aser tejepketba shirurutem tepseta kar; oda kechisarena renema kar. Kiyir benjongi arung.’ 5Saka parnoki temulung magütsüi oadok. Ka pei lui ao, aser ka pei shishidaki ao, 6aser tanüngbatemi pa kilirtemji atsüa arua, mezüngmeshi asü aser parnok tepset. 7Idangji chubaji ain adok; aser pai pei temerangertem yok, aser nisung tepsetertemji samatsü aser parnok yimti rongtoktsü. 8Idangji pai pei kilirtem dang ashi, ‘Kiyir benjong renema lir, saka tejaokertem metemsü. 9Anungji nenoki tongtibang lenjemi oang, aser nenoki ajuruba ajak benjongi jar arung.’ 10Anungji kilirtemji lentitemi ao aser tajung majung na kwika parnoki ajuru item ajakji anir aru; aser kiyir kiji aener agi asüng. 11Saka tesentepertem ajidangtsü chubai aidang, idakji kiyir sü mabenba nisung ka pai angu. 12Chubai pa dang ashi, ‘Temba, kiyir sü mabeni kodaser na yagi aru?’ Aser pai koda mesüi ali. 13#Mat. 8.12; 25.30; Luk. 13.28 Idangji pai kilirtem dang ashi, ‘Pa tetsüng-teben alenang aser kimalen tammangdak ajungdokang. Idakji tajepba aser tepu shitepba alitsü.’ 14Kechiaser aika ajar saka ishika dang shimteter.”
Kaisar Nem Ali
Melen Agütsüba
(Mar. 12.13-17; Luk. 20.20-26)
15Idangji Farisitemi oa pai jembiba o nung koda aputsü ta tasa asa. 16Parnoki pei nütsüngtem den oa Herod nütsüng kar dena Yisu dangi yoka ashi, “Tesayur na ochishir, aser nai ochi nung Tsüngrem lenmang sayur, aser shinga metsübur ta onoki metet; kechiaser nai nisung jak merepranger. 17Anungji Kaisar nem alimelen agütsütsü tim asü masü? Nai kechi bilemer? Onok dang shiang.” 18Saka Yisui parnok tamajungba tasaji meteta ashi, “Anemsübatem, nenoki kechiba ni atitanger? 19Alimelen sen ka kü dang sayuang.” Aser parnoki adholi ka Yisu dangi bener aru. 20Yisui parnok dang ashi, “Ya shiba noksa aser tenüng züluba?” 21Parnoki pa dang ashi, “Kaisar.” Idangji Yisui parnok dang ashi, “Ajangla kechi Kaisar meyong aji Kaisar nem agüjang; aser kechi Tsüngrem meyong aji Tsüngrem nem agüjang.” 22Aser parnoki aji angashidang süngmang, aser pa toktsür oadok.
Shia Aruba Indang Tasüngdangba
(Mar. 12.18-27; Luk. 20.27-40)
23 #
TMa. 23.8
Iba anogo nungji tasürtem shia marutsü ta jembiba Sadukitemi pa dangi arua asüngdanga ashi, 24#Taz. 25.5 “Tesayur, nisung kati techir meli-i süadokra tenui pa kibutsü agitsü, aser pa asoshi metsü adokdaktsütsü, ta Mosai ashi. 25Tang onok rongnung adianu tenet liasü. Aser mezüngbubaji ki yimer asü, aser metsü meli-i pa kinungtsü pei tenu nem toktsü. 26Iba amaji ano tanabuba, aser tasembuba, aser tenetbuba tashi dak atalok. 27Aser parnok ajak sülen tetsürji asü. 28Anungji shia arudang tenet rongnungji la shiba kinungtsü alitsü? Kechiaser parnok ajaki la agi.” 29Saka Yisui parnok dang ashi, “Laishiba mesüra Tsüngrem tashi nenoki memetet nung jimir. 30Kechiaser tanaben shia arudang parnoki ki mayimer, mesüra kiyi meyoker, saka kotak nung tenyartem ama lir. 31Saka tasürtem shia aruba indang Tsüngremi nenok dang jembiba, 32#Ani. 3.6 Ni Abraham Tsüngrem, Isak Tsüngrem aser Yakob Tsüngrem, ya nenoki mezüngdang no? Tsüngremji tasürtem Tsüngrem masü, joko akümlir Tsüngrem lir.” 33Ya angashia teloki pai sayuba nung süngmang.
Ozüng Tulutiba
(Mar. 12.28-34; Luk. 10.25-28)
34Saka pai Sadukitem ola madoki kümdaktsüba angashidang, Farisitemi külemi sentep. 35Parnok rongnung ozüng metetba kati pa atitanga asüngdang, 36“Tesayur, ozüng rongnung koba tulutiba asütsü?” 37#Taz. 6.5 Pai pa dang ashi, “Ne taküm ajak agi, ne tanela ajak agi aser ne mulungsentsü ajak agi nai Kibuba ne Tsüngrem meimang. 38Ya tulutiba aser mezüngbuba temelaba ozüngji lir. 39Ibai mesüka tanabubaji ya lir, ‘Nai ne kiyonger pei ama meimang.’ 40Item temelaba ozüng ana dak ozüng ajak aser ainkar o ajak itaka lir.”
Khrista indang Tasüngdangba
(Mar. 12.35-37; Luk. 20.41-44)
41Kodang Farisitem külemi sentep, Yisui parnok dang asüngdang, 42“Nenoki Khrista indang kechi bilemer? Pa shir chir?” Parnoki pa dang langzü, “Dawid Chir.” 43Idangji pai parnok dang ashi, “Ajangla, tanela nung, Dawidi pa dang Kibuba ta ajar, ta shia aliba ama,
44 #
TKe. 110.1
‘Kibubai kü Kibuba dang ashi,
ni ne tsükchirtem ne tetsüng kübok mayu tashi,
na kü teka tajichilen menang.’
45“Dawidi pa dang Kibuba ta jarabang, ajangla pa koda par chir asütsü akok?” 46Aser shingaia pa dang o kata melangzütet, aser iba anogo nungjagi shingaia pa dang asüngdangtsü temulung moulutet.
Currently Selected:
MATHI 22: AONAGABSI
Highlight
Copy
Compare
Share
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
