MATHI 21
21
Yirusalemi Takok Ngua Aiba
(Mar. 11.1-11; Luk. 19.28-40; Yoh. 12.12-19)
1Kodang parnoki Yirusalem anasa arua Oliv tenem nung aliba Bethfage atong, Yisui nütsüng ana yoka, 2parnok dang ashi, “Nenok jakdang aliba yim jagi iang aser idangyongji gado ka sentaka aliba aser iba den techanu ka nenoki angutsü. Parnok salar kü dangi anir arung. 3Aser kari nenok dang langka shira, nenoki yamai shiang, ‘Kibuba asoshi parnok tenüngdaktsü lir;’ aser idangyongji pai parnok yoktsü.” 4Ainkar ajanga kechi jembizüka aka aji ataloktsü asoshi ya ataloker:
5 #
Zek. 9.9
“Zion jala dang shiang,
ajiang, ne Chuba ajemalua gado dak sanger,
oda gado chanu ka dak sanger, ne dangi arur.”
6Anungji nütsüngtemi ao, aser Yisui parnok dang melaba ama inyak. 7Parnoki gado aser techanuji anir aru aser parnoki pei sü parnok madak lemtsü aser Yisui iba ma nungji amen. 8Aser telok tulu kati pei sü lenmang nung lemtsü aser tangartemi süngdong nungi kongsangtem lepzüker itemji lenmang nungji lemtsü. 9Pa tejaklen aser tesülen aoba teloktemi ayimtena ashi, “Dawid Chir dang Hosanna sang! Kibuba tenüng nung shiba arur pa sangang. Tematiba nung Hosanna sang!” 10Pa kodang Yirusalemi ai, yimti ajak nüngnüngtepa ashi, “Ya shiba?”
11Teloktemi ashi, “Ibai Galil nungi aruba Nazaret nunger, ainkar Yisu.”
Tenla Ki Meshitetba
(Mar. 11.15-19; Luk. 19.45-48; Yoh. 2.13-22)
12Aser Yisui tenla kidangi atu, aser ki telung nung tayoker aser talirtem langbang, aser guduru ayokertem menden meküpdoktsü. 13#Isa. 56.7; Yer. 7.11 Aser pai parnok dang ashi. “Ya zülua lir, kü ki dang sarasademba ki ta ajatsü, saka nenoki aji rakzükraktemer leprungki kümdaktsür.”
14Aser nükpokertem aser tsüngtsükertem tenla kidangi pa dangi aru aser pai parnok anebtsü. 15Saka kodang Yisui tesüngmangtsü mapatem inyakba, aser tila tanurtemi tenla kidang, “Dawid Chir dang Hosanna sang” ta ayimtenba angu, puti-ungertem aser tezülurtemi ain adok. 16#TKe. 8.2 (LXX) Aser parnoki pa dang asüngdang, “Parnoki kechi ashir nai aji angashir südi?” Yisui parnok dang langzü, “Hau, kinütem aser mamayongertem bang nungi tenüngsang peridaktsüogo ta nenoki mezüngdang no?” 17Idangji Yisui parnok toktsü, aser yimti nungi adoka Bethani yimtaki ai aser idakji ali.
Mungudong Atakatemba
(Mar. 11.12-14,20-24)
18Tang anepdang yimti jagi meyipa arudang pa ya-adok. 19Aser lenmang tezülen mungudong ka ngua pai iba anasa arua, tuo dak alema kecha mangu. Anungji Yisui iba dang ashi, “Tang nungi na teti tejang tetang.” Idangyongjisa mungudongji azüladok. 20Aser nütsüngtemi aji angudang süngmanga ashi, “Kechi koda tang yongi mungudongji azüladok?” 21#Mat. 17.20; 1 Ko. 13.2 Yisui parnok dang ashi, “Atangji ni nenok dang ashir, nenoki matidaki amangra, mungudong dak kechi inyak, aji dang masü, saka nenoki iba tenem danga, Na ajungketang aser tzüyim nung ajungokang ta ashi nunga aji ataloktsü. 22Amanga sarasademba agi nenoki kechisa meshidir ajak nenoki angutsü.”
Yisu Tashi-ain Indang Asüngdangba
(Mar. 11.27-33; Luk. 20.1-8)
23Kodang pai tenla kidangi ai aser pai sayutsüngia alidang, putiungertem aser nübur tamburtem pa dangi arua ashi, “Kechi tashi agi nai itemi inyaker? Shibai ne nem iba tashi agütsü?” 24Yisui parnok dang langzü, “Nia nenok dang o ka asüngdangdi, nenoki kü dang aji shira kechi tashi agi ni item mapa inyaker ni nenok dang shidi, 25Yohan Baptitsüba kong nungi? Kotak nungi asü? Nisung nungi?” Parnoki parnok rongnung jembitepa ashi, “Kotak nungi ta asenoki shira, ajangla kechiba nenoki pa dang mamang ta pai asenok dang ashitsü. 26Saka ano asenoki nisung nungi, ta shira asenoki telok tsübur; kechiaser ajaki Yohanji ainkar ka ta agizüker.” 27Anungji parnoki Yisu dang langzü, “Onoki memetet.” Yisuia parnok dang ashi, “Ajangla ni kechi tashi agi item mapa inyaker aji nenok dang meshili.
Jabaso Ana agi O-entepba
28“Saka nenoki kechi bilemer? Nisung ka jabaso ana liasü. Aser pai mezüngbuba dangi arua ashi, ‘Tebu, oang aser tanü tsükmenatzü lu nung inyakang’ 29Aser pai langzü, ‘Ni maotsü’ Saka tesü pa pei sasa temulung meyip, aser ao. 30Ano pai tanabuba dangi arua aji odasa ashi, idangji pai langzü, ‘Tamarener, ni odi’ saka pai mao. 31Iba ana rongnung tebui mulungba shibai inyak?” Parnoki ashi, “Mezüngbubai.” Yisui parnok dang ashi, “Atangji ni nenok dang ashir, alimelen sarurtem aser nüktapangta tsürtem nenok dang tama Tsüngrem yimli-i air. 32Kechiaser Yohani temeshiba lenmang nung nenok dangi aru, aser nenoki pa dang mamang; saka alimelen sarurtem aser nüktapangtatsürtemi pa dang amang; aser aji nenoki nguaka, tesülen nenok sasa temulung memeyip aser mamang.”
Tsükmenatzü Lu Aser Aluyimertem
(Mar. 12.1-12; Luk. 20.9-19)
33 #
Isa. 5.1,2 Yisui ashi, “Ano tanga o-entepba ka angang, Kibur nisung ka liasü, shibai tsükmenatzü lu ayim; aser pai aji meketa atsü atsü, temenüngdak atu aser mitsa ka yanglu, aser pai aji aluyimertem ket nung nungloka toktsür alinük tanga kati ao. 34Kodang süngjang aongtsü mapang anasa atong pai pei shilem süngjang angutsü asoshi aluyimertem dangi pei kilirtem yok. 35Aser aluyimertemi par kilirtem apu aser ka dak azük; aser tangar ka tepset, aser tangar ka lung agi onset. 36Tanaben pai mezüng dang nungi timba tanga kilirtem yok; aser parnoki yamajisa parnok dak inyak. 37Saka tesülen pai pei chir yok aser ashi, ‘Parnoki kü chir dangbo akhüm tsübutsü.’ 38Saka aluyimertemi techirji angudang, parnok rongnung jembitepa ashi, ‘Ibai senmangerji lir. Arung, asenoki pa tepsetdi aser pa senmangji agidi.’ 39Parnoki pa apu aser tsükmenatzü lu nungi aridok aser pa tepset. 40Anungji kodang alu kiburji arudir, pai item aluyimertem dang kechi inyaktsü?” 41Parnoki pa dang ashi, “Pai tamajungertemji taochi makai samatsütsü aser mapang tatong nung aluyimer shiri pa nem süngjang agütsütettsü ibala aluyimer nem pai tsükmenatzü luji yimdaktsü.”
42 #
TKe. 118.22
Yisui parnok dang ashi, “Nenoki ya laishiba nung kodanga mezüngdang asü?
‘Kisürtemi koba lung magi,
aji kinük nung tongtiba aküm;
IbaiKibuba i inyakba liasü,
aser aji asen nükdang tesüngmangtsü lir.’
43“Anungji ni nenok dang ashir, nenok nungi Tsüngrem yimli bener aotsü aser iba nungjagi süngjang tangtsüba kin ka nem agütsütsü. 44Iba lungma nung shiba tsükdir pa anüka raksatsü; saka shiba dak ibai tsükdir, iba jagi pa auyi küma menüngsatsü”
45Puti-unger aser Farisitemi pa o-entepba angashidang, pai parnok indang jembir ta parnoki angatet. 46Anungji parnoki pa aputsü bushi, saka parnoki telok tsübu, kechiaser parnoki pa ainkar ka ta züngshi.
Currently Selected:
MATHI 21: AONAGABSI
Highlight
Copy
Compare
Share
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
