Popular Bible Verses from Erubasa 16

Share

Isarig nu ziyà te NENGAZEN is minsan hengkey he ed-ul-ulahan nu, ne egketuman nu is menge pelanu nu.

Pinaaǥi te isip te etew edhimuwen din is pelanu zin piru iyan egiya kandin is NENGAZEN.

Is menge lalag he meupiya he ebpemineǥen, ne iring te teneb is kegedgezama ta zuen diyà te ǥehinawa ta ne ebpekevawì kenita.

Is etew, edhimu te menge pelanu, piru is NENGAZEN, iyan ebayàbayà te langun.

Deyzey pa is etew he mepelevayen, kenà is etew he veǥani; deyzey pa is etew he ed-eǥenen din is pauk din, kenà is ebihag te sengeingezan.

Is kebpelavew wey kegkemesinupaken, edrimeǥas te kezeetan.

Is langun he ed-ul-ulahan te etew, midtuuwan din he hustu, piru edsusiyen te NENGAZEN is tuyù te uman sevaha.

Is etew he ebpekeventayan din is penurù, ed-uswag sikandin, ne utew zeyzey is etew he edsarig te NENGAZEN.

Deyzey pa is deisey he ketiǥeyunan he meupiya he paaǥi is kegketiǥeyuni zuen, kenà is dekelà he ketiǥeyunan he netiǥeyunan pinaaǥi te limbung.

Duen dalan he kunaan te etew ke meupiya he ed-ikulen, iyan, diyè bes ebpekepevayà te kemetayen.

Is etew he mezaat is kebpemèbè din, ebpeketuvù te samuk wey egkehimu he hinungdan te kebpekegkuntedaha te teleemiǥu.