Popular Bible Verses from Erubasa 15

Share

Is menayù he kedtavak, ebpekepevehew te pauk, iyan, is hangger he kedtavak, ebpekepeiseg te pauk.

Is kedtehuza te NENGAZEN iyan ebpekepenurù kenita wey ki mebmetau, ne kenè ki egkezeliǥan emun ebpelavew ki.

Is lalag he menayù, ebpekepayùpayù te gehinawa, iyan, is menge lalag he ebpekelimbung, ebpekaawà te kezasig.

Egkehimu he kenè ta egkekuwa is ebpelenuwan ta te egkuwa emun wazà ebpekesambag kenita te meupiya he paaǥi, iyan, emun mahabet is ebpekesambag kenita ne egkekuwa ta.

Emun duen kelipey ziyà te ǥehinawa te etew ne ebpekeǥemen sikandin, iyan, emun mesakit is gehinawa zin ebmerembunut is kebuvuked din.

Egkaahà te NENGAZEN is minsan hendei. Egkeehè din is ed-ul-ulahan te minsan hentei, metazeng etawa lalung.

Deyzey pa is etew he zeisey zà is ketiǥeyunan din, iyan, edtahud sikandin te NENGAZEN kenà is etew he zekelà is ketiǥeyunan din, iyan, layun egkesemuki.

Is etew he melemu egkepauk, egkehimu he hinungdan te kesevaan, iyan, is etew he mepelevayen, ebpekehusey te egkesavà.

Is etew he metazeng, edtimtimbangen din edhuna a ziyà te isip din ke hengkey is idtavak din, iyan, iburaswang mulà te etew he lalung is mezaat he menge lalag.