Popular Bible Verses from Kawˇlawˇsehˇ li‸ 3

Share

Teˇ gʼaˇ leh teˇ gʼaˇ yeunˇ hkanˍ da‸-o‸. Teˇ gʼaˇ leh teˇ gʼaˇ venˇbaˆ taˍ da‸ kuiˬ cawˬ kʼo, venˇbaˆ hpehˇ da‸-o‸. Jawˇmawˇ Gʼuiˬ sha nawˬ hui ve venˇbaˆ hta‸ hpehˇ hkʼa peuˬ ve hkʼe, nawˬ hui htawˇ venˇbaˆ hpehˇ da‸-o‸.

Miˬguiˬ hkʼoˆ lo cawˬ ve awˬ ceuˬ teˇ hpaˍ hta‸ dawˇ tcuhˉ taˍ ve taˇ te. Mvuhˇ naw ma hkʼoˆ lo cawˬ ve awˬ ceuˬ teˇ hpaˍ hta‸ dawˇ tcuhˉ taˍ-o‸.

Nawˬ hui kanˉ hkʼaˬ hkʼe ve teˇ ceuˬ te ve maˇ kʼoˆ, chaw yaˇ awˬ pon te ve maˇ heˆ, Jawˇmawˇ Yeˍsuˆ awˬ pon te ve hkʼe nyi ma pfuhˇ leh gʼaˇ hte‸ te-o.

Chi hta‸ pa taw, Gʼuiˬsha nawˬ hui hta‸ leuˆ yuˬ taˍ leh, nawˬ hui da‸ kehˬ ve leh yawˇ ha‸ ve chaw hpeh‸ ve hkʼe, chi teˇ hpaˍ hta‸ veu‸ deh-o. Ha kʼaˉ puiˉ ve, shu awˬ pon da‸ ve hta‸ te ve, nyi ma taˍ nehˬ ve, nyi ma nuˇ nuˇ nehˬ nehˬ ve leh, nyi ma dawˇ zuhˬ gaˇ zuhˬ ve, chi teˇ hpaˍ hta‸ veu‸ deh-o.

Cuˇ yiˍ maˍ yiˍ hkʼa biˇ cawˬ ve Hkri‸ ve tawˇ hkawˇ lehˬ, nawˬ hui awˬ hkʼaw lo hkʼa biˇ cawˬ piˇ-oˆ. Chiˇ mvuh ve tawˇ hkawˇ, kʼa muiˬ hkawˇ leh co ha hpawˇ hta‸ caˉ da‸ ve kʼa muiˬ hkawˇ teˇ hpaˍ hta‸ cuˇ leh, nawˬ hui teˇ gʼaˇ leh teˇ gʼaˇ hta‸ maˍ da‸ leh shaˍ ti‸ piˇ da‸-o‸. Nawˬ hui ve nyi ma awˬ hkʼaw lo Gʼuiˬsha hta‸ kʼa muiˬ chiˇ mvuh chehˇ-oˆ. Nawˬ hui hkʼa te ve hkʼa peu-eˬ awˬ hkʼaw lo, tawˇ yaw ve maˇ kʼoˆ, kanˉ te ve maˇ kʼoˆ, Jawˇmawˇ Yeˍsuˆ ve awˬ meh awˬ hkʼaw lo hkʼa peu-eˬ hta‸ te-o. Yawˇ hta‸ cuˇ leh Awˬ pa Gʼuiˬsha hta‸ chiˇ mvuh chehˇ-oˆ.

Oˇ ve hkʼa peu-eˬ awˬ hkʼoˆ ha‸ pehnˇ ve teˇ ceuˬ hta‸ veu‸ deh taˍ-o‸. Ha‸ pehnˇ ve lehˬ, hkʼa peu-eˬ biˇ la tuˬ hpeh tsuh‸ taˍ ve yoˬ.

Hkʼe te leh, nawˬ hui Hkri‸ geh teˇ geh kʼaw‸ te‸ tu la peuˬ ve kʼo, mvuhˇ naw ma hkʼoˆ lo cawˬ ve awˬ ceuˬ teˇ hpaˍ hta‸ ca-o. Hkri‸ lehˬ, oˇ kaˬ lo Gʼuiˬsha ve la‸ sha pa mui chehˇ taˍ ve yoˬ.

Hkri‸ ve dawˇ sha gaˇ sha ve teˇ ceuˬ nawˬ hui ve nyi ma awˬ hkʼaw lo uˉ peunˍ piˇ lawˬ-o‸. Chi hkʼe hpeh‸ la tuˬ ve awˬ pon, awˬ to teˇ to tiˉ awˬ hkʼaw lo Gʼuiˬsha nawˬ hui hta‸ kuˬ yuˬ taˍ ve yoˬ. Chi hkʼoˆ ka‸, yawˇ ve bon hta‸ dawˇ nawˇ-oˆ.

Nawˬ hui awˬ hkʼaw lo cawˬ ve, miˬguiˬ hta‸ caˉ da‸ ve awˬ ceuˬ teˇ hpaˍ hta‸ tiˇ pehˍ-o‸. Awˬ ceuˬ oˇ ve teˇ hpaˍ lehˬ, haˉ chawˇ haˉ paˆ te ve, cha‸ chiˆ ve hta‸ te ve, peh‸ ve tzuhˆ ve hta‸ te ve, haiˬ ve hta‸ te ve leh, shu mawˇ shu jeˬ hta‸ sheˉ lai ve, awˬ ceuˬ chi teˇ hpaˍ hpeh‸ ve yoˬ. Shu mawˇ shu jeˬ hta‸ sheˉ lai ve teˇ ceuˬ lehˬ, shaˉ ho‸ hta‸ oˉ kʼoˍ pui ve teˇ ceuˬ hpeh‸ ve yoˬ.

Awˬ lawn kʼo, nawˬ hui suh peuˬ ve chaw hpeh‸ leh, nawˬ hui ve co ha te‸ ve teˇ ceuˬ lehˬ, Hkri‸ geh teˇ geh Gʼuiˬsha awˬ hkʼaw lo faˉ taˍ ve yoˬ.

Ya‸ hkʼaˇ, chi beu‸ lehˬ nyi ma zuhˆ ve, beu‸ jaˇ ve, shu hta‸ naˬ tuˬ te gaˇ ve, shu hta‸ hkʼaiˉ ve leh, cha‸ chiˆ ve tawˇ hta‸ yaw ve, awˬ ceuˬ chi teˇ hpaˍ hkʼa peu-eˬ hta‸ baˬ taˉ-oˆ.

Teˇ gʼaˇ leh teˇ gʼaˇ taˇ heˍ da‸. Awˬ lawn kʼo, nawˬ hui lehˬ chaw awˬ piˍ hta‸ ka‸, chaw awˬ piˍ ve awˬ liˇ awˬ hkʼaˇ teˇ hpaˍ hta‸ ka‸ kʼehˆ baˬ peuˬ leh, chaw awˬ suhˉ hta‸ veu‸ deh taˍ peuˬ. Chaw awˬ suhˉ oˇ ve lehˬ, yawˇ hta‸ te hpanˍ shehˍ hpaˇ ve awˬ ho‸ awˬ han hkʼa shuˍ shuˍ, shiˍ puiˉ ve teˇ ceuˬ lehˬ, awˬ suhˉ kʼaw‸ hpeh‸ la chehˇ ve yoˬ.

Awˬ hpawˇ teˇ hpaˍ-oˬ, a shu yawˇ ve awˬ miˇ ma hta‸ ha‸ leh, yawˇ hui hta‸ hehnˇ chaweh taˇ te.

Yaˇ ehˉ teˇ hpaˍ-oˬ, teˇ ceuˬ le le awˬ hkʼaw lo awˬ pa awˬ e ve tawˇ hkawˇ hta‸ na yuˬ-o‸. Awˬ lawn kʼo, nawˬ hui chi hkʼe te ve hta‸ Jawˇ mawˇ Yeˍsuˆ nyi ma cawˇ ve yoˬ.

Awˬ miˇ ma teˇ hpaˍ-oˬ, Jawˇmawˇ Yeˍsuˆ hta‸ keunˍ da‸ ve hkʼe, a shu yawˇ ve awˬ hpawˇ awˬ hawˉ lo chehˇ-oˆ.