Popular Bible Verses from 1 Yoˇhanˬ li‸ 4

Share

Ha‸ pehnˇ ve awˬ hkʼaw lo kawˆ ve teˇ ceuˬ maˇ cawˬ. Ha‸ pehnˇ ve biˇ ve teˇ ceuˬ lehˬ, kawˆ ve hta‸ mehˉ kʼai piˇ lawˬ ve yoˬ. Awˬ lawn kʼo, kawˆ ve teˇ ceuˬ lehˬ, ciˍ yanˍ ve hta‸ caˉ da‸ ve pa taw, kawˆ puiˉ ve chaw teˇ gʼaˇ lehˬ, yawˇ awˬ hkʼaw lo ha‸ pehnˇ ve teˇ ceuˬ maˇ biˇ sheˍ.

Ha‸ ve yaˇ teˇ hpaˍ-oˬ, nawˬ hui Gʼuiˬsha hta‸ caˉ da‸ ve chaw hpeh‸ leh, yawˇ hui hta‸ gʼaˇ peuˬ. Awˬ lawn kʼo, nawˬ hui awˬ hkʼaw lo chehˇ ve teˇ gʼaˇ lehˬ, miˬguiˬ hkʼoˆ lo chehˇ ve teˇ gʼaˇ a‸ kehˉ uiˍ ve yoˬ.

Gʼuiˬsha ngaˬ hui hta‸ awˉ lawˉ ha‸ ve pa taw, ngaˬ hui htawˇ ha‸ ve yoˬ.

Ha‸ ve chaw teˇ hpaˍ-oˬ, ngaˬ hui teˇ gʼaˇ leh teˇ gʼaˇ ha‸ da‸-a veuˬ. Awˬ lawn kʼo, ha‸ pehnˇ ve teˇ ceuˬ lehˬ Gʼuiˬsha geh tawˆ la ve yoˬ. Ha‸ puiˉ ve chaw teˇ gʼaˇ le le lehˬ, Gʼuiˬsha ve awˬ yaˇ hpeh‸ leh, Gʼuiˬsha hta‸ shiˍ ve yoˬ.

Maˇ ha‸ puiˉ ve chaw lehˬ, Gʼuiˬsha hta‸ maˇ shiˍ. Awˬ lawn kʼo, Gʼuiˬsha lehˬ ha‸ pehnˇ ve teˇ ceuˬ hpeh‸ ve yoˬ.

Ha‸ pehnˇ ve teˇ ceuˬ lehˬ chi hkʼe yoˬ. Ngaˬ hui Gʼuiˬsha hta‸ ha‸ ve teh‸ kʼoˆ gaˇ ve maˇ heˆ. Ya‸ hkʼaˇ, yawˇ ngaˬ hui hta‸ ha‸ leh, ngaˬ hui ve venˇbaˆ hta‸ hpehˇ hkʼa laˇ tuˬ awˬ pon yawˇ ve Yaˇ hpu peu laˇ ve hta‸ kʼoˆ ve yoˬ.

Ha‸ ve chaw teˇ hpaˍ-oˬ, Gʼuiˬsha lehˬ ngaˬ hui hta‸ chi taw taw ha‸ ve kʼo, ngaˬ hui htawˇ teˇ gʼaˇ leh teˇ gʼaˇ ha‸ da‸ cawˇ ve yoˬ.

Gʼuiˬsha ngaˬ hui hta‸ ha‸ ve lehˬ, yawˇ ngaˬ hui hta‸ chi hkʼe hpeu‸ maˍ laˇ ve yoˬ. Yaˇ hpu hta‸ pa taw ngaˬ hui co ha gʼa te‸ tuˬ, Gʼuiˬsha lehˬ yawˇ ve Yaˇ hpu tiˍ hta‸ miˬguiˬ hkʼoˆ lo peu laˇ ve yoˬ.

Ngaˬ Gʼuiˬsha hta‸ ha‸ ve yoˬ teh‸ chaw teˇ gʼaˇ gʼaˇ kʼoˆ ve htawˇ, yawˇ ve awˬ viˉ awˬ nyi hta‸ yawˇ canˇ ve kʼo, yawˇ lehˬ heˍ paˍ hpeh‸ ve yoˬ. Awˬ lawn kʼo, a shu yawˇ mawˬ chehˇ ve awˬ viˉ awˬ nyi hta‸ maˇ ha‸ ve chaw teˇ gʼaˇ lehˬ, maˇ mawˬ jaw ve Gʼuiˬsha hta‸ yawˇ hkʼaˬ hkʼe te ha‸ hpeh‸ tuˬ le.

Yeˍsuˆ lehˬ, Gʼuiˬsha ve Yaˇ hpu yoˬ teh‸ hkanˍ yuˬ ve chaw hkʼaˬ ve teˇ gʼaˇ maˇ kʼoˆ, Gʼuiˬsha yawˇ awˬ hkʼaw lo chehˇ leh, yawˇ htawˇ Gʼuiˬsha awˬ hkʼaw lo chehˇ ve yoˬ.

Gʼuiˬsha hta‸ ha‸ ve chaw lehˬ, a shu yawˇ ve awˬ viˉ awˬ nyi hta‸ htawˇ gʼa ha‸ ve yoˬ teh‸, piˇ taˍ ve tawˇ hkawˇ ngaˬ hui yawˇ geh gʼa taˍ ve yoˬ.

Ha‸ ve chaw teˇ hpaˍ-oˬ, awˬ ha teˇ maˬ le le hta‸ taˇ yonˍ. Ya‸ hkʼaˇ, awˬ ha teˇ hpaˍ lehˬ, Gʼuiˬsha hta‸ caˉ da‸ ve leh naˍ, hkʼa deh‸ lawˇ nyi sheˍ. Awˬ lawn kʼo, maˇ heˆ heˆ ve tcuh kaˍ paˍ laiˉ gʼaˇ miˬguiˬ hkʼoˆ teˇ kaˬ le le lo kʼai peuˬ. Gʼuiˬsha ve Awˬ ha hpu hta‸ nawˬ hui chi hkʼe shiˍ hpeh‸ ve yoˬ. Yeˍsuˆ Hkri‸ lehˬ, awˬ suhˍ awˬ shaˍ pfuhˇ leh laˬ ve yoˬ teh‸, shaˉ hkiˆ hkanˍ ve awˬ ha teˇ maˬ le le Gʼuiˬsha hta‸ caˉ da‸ ve yoˬ.

Yeˍsuˆ Hkri‸ lehˬ, awˬ suhˍ awˬ shaˍ pfuhˇ leh laˬ ve yoˬ teh‸ shaˉ hkiˆ maˇ hkanˍ ve awˬ ha hkʼaˬ ve teˇ maˬ maˇ kʼoˆ, Gʼuiˬsha hta‸ maˇ caˉ da‸. Chi hkʼe ve awˬ ha lehˬ, Hkri‸ ve canˇ paˍ lonˉ hta‸ caˉ da‸ ve yoˬ. Chi hkʼe ve awˬ ha laˬ tuˬ yoˬ teh‸, nawˬ hui gʼa kaˇ taˍ peuˬ ve hkʼe, chi beu‸ ka‸ miˬguiˬ hkʼoˆ lo chehˇ taˍ peuˬ.