Popular Bible Verses from Isaias 40

Share

Gihatagan niyag kusog ang mga maluya ug ang mga gikapoyan.

Bisan ang mga batan-on kapoyan, mangaluya, ug mangatumba, apan ang mga nagsalig sa GINOO makaangkon pag-usab ug kusog. Mahisama sila sa naglupad nga agila; kon managan sila dili sila kapoyon; kon manglakaw sila dili sila maluya.

Wala ba kamo masayod o makadungog nga ang  GINOO mao ang walay kataposan nga Dios nga nagbuhat sa tibuok kalibotan? Dili siya bation ug kakapoy o maluya, ug walay makatugkad sa iyang huna-huna.

Adunay nagsinggit sa kamingawan, “Pag-andam ug agianan alang sa GINOO diha sa kamingawan. Paghimog tul-id nga dalan alang sa atong Dios.

Ang sagbot malaya ug ang iyang bulak mangahulog, apan ang pulong sa atong Dios magpadayon hangtod sa kahangtoran.”

Unya ipadayag ang gamhanang presensya sa GINOO, ug makita kini sa tanang katawhan. Kay ang  GINOO mismo mao ang nag-ingon niini.”

Ang matag dapit nga nalupyak tambakan, ug ang matag bukid ug bungtod patagon. Ang libaong ug liko-liko nga agianan ayohon ug tul-iron.

Atimanon niya ang iyang katawhan sama sa pag-atiman sa usa ka magbalantay sa iyang mga karnero: kugoson niya ang mga gagmayng karnero ug giyahan niya uban sa kalumo ang mga inahan.

Hangad kamo sa langit! Kinsa man ang naghimo nianang mga bitoon? Ang naghimo niana mao ang Dios. Gitagsa-tagsa niya sila pagpatunga ug ginatawag niya sila sa ilang mga ngalan. Tungod sa iyang gahom walay usa kanila nga nawala.

Gihimo kini sa Dios nga naglingkod sa iyang trono ibabaw sa kalibotan, ug ang katawhan sa ubos mura lang ug mga apan-apan. Gibuklad niya ang langit sama sa kurtina. Gibuklad niya kini nga daw sama sa tolda aron puy-an.

Sultihi ninyo nga adunay kalumo ang katawhan sa Jerusalem. Ibalita kanila nga human na ang ilang pag-antos ug ang ilang mga sala napasaylo na. Kay nadawat na nila ang daghang silot alang sa tanan nilang mga sala.”

Adunay nag-ingon kanako, “Pagwali!” Mitubag ako, “Unsa ang akong iwali?” Miingon siya, “Iwali nga ang tanang mga tawo sama sa sagbot, ug ang ilang pagkainila sama sa bulak sa kaumahan. Ang sagbot malaya ug ang iyang bulak mangahulog tungod kay huypon kini sa hangin nga ipadala sa GINOO. Tinuod nga ang tawo sama sa sagbot.

Oo, miabot na ang GINOONG Dios nga gamhanan, ug maghari siya. Moabot siya dala ang ganti.

Miingon ang Dios, “Lipaya ninyo ug dasiga ang akong katawhan.

Kinsay makatakos sa tubig sa dagat pinaagi sa iyang kamot, ug makasukod sa langit pinaagi sa pagdangaw niini? Kinsay makasulod sa tanang yuta sa taksanan o makatimbang sa mga bukid ug mga bungtod? Kinsa ba ang nahibalo sa huna-huna sa GINOO o makatudlo kaniya kon unsay angay niyang buhaton? Kinsay gipangayoan niyag tambag aron makasabot siya? Kinsa ba ang nagtudlo kaniya sa hustong dalan? Kinsa ang naghatag kaniya sa kahibalo o nagtultol kaniya ngadto sa dalan sa kaalam?